বৰ্তমান ভাৰতত আত্মগোপন কৰি আছে বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাই । কিন্তু তেওঁৰ পৰৱৰ্তী গন্তব্যস্থান কি হ’ব, বিশ্ব কূটনৈতিক মহলত ইয়াক লৈ জল্পনা-কল্পনাৰ সৃষ্টি হৈছে। বিভিন্ন অনিশ্চিত সূত্ৰই দাবী কৰিছে যে বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাই ব্ৰিটেইনত ৰাজনৈতিক আশ্ৰয় বিচাৰিছে। কিন্তু তথাপিও সেই দেশৰ চৰকাৰৰ পৰা কোনো সেউজ সংকেত লাভ কৰা নাই। কিন্তু হাছিনাৰ পুত্ৰ ছাজিব ৱাজিদ জয়ৰ দাবী যে তেওঁৰ মাতৃয়ে কোনো দেশতে আশ্ৰয় বিচৰা নাছিল।
হাছিনাই আশ্ৰয় বিচৰাক লৈ বহু জল্পনা-কল্পনাৰ সৃষ্টি হৈছে। একাংশ সূত্ৰই দাবী কৰিছে যে বাংলাদেশৰ প্ৰাক্তন প্ৰধানমন্ত্ৰীগৰাকী ব্ৰিটেইনলৈ যাব পাৰে। আন এটা সূত্ৰই জনোৱা মতে, হাছিনাৰ আমেৰিকালৈ যোৱাৰ পথ বন্ধ হৈ পৰিছে। আমেৰিকাই তেওঁৰ ভিছা বাতিল কৰিছে। আনকি, ফিনলেণ্ডকে ধৰি কেইবাখনো দেশৰ নামো এই চর্চালৈ আহিছে। কিন্তু এই সকলোবোৰ জল্পনা-কল্পনা দূৰ কৰি সংবাদ মাধ্যম এনডিটিভিক দিয়া এক সাক্ষাৎকাৰত হাছিনা পুত্ৰই কয় যে তেওঁৰ মাতৃৰ আশ্ৰয়ৰ বাবে কৰা অনুৰোধ সন্দৰ্ভত ছপা হৈ থকা সকলো প্ৰতিবেদন সম্পূৰ্ণ ভুল। তেওঁ ক’তো আশ্ৰয় বিচৰা নাছিল। গতিকে ব্ৰিটেইন বা আমেৰিকাই আশ্ৰয়ৰ অনুৰোধ নাকচ কৰাৰ বিষয়টোও অসত্য।” জয়ে এইটোও দাবী কৰে যে আমেৰিকাৰ সৈতে মাকৰ আশ্ৰয়ৰ বিষয়ে কোনো আলোচনা হোৱা নাছিল।
জয়ে প্ৰথমে ঘোষণা কৰিছিল যে হাছিনা আৰু ৰাজনীতিত নাথাকে। ধাৰাবাহিক আন্দোলনৰ হেঁচাত প্ৰধানমন্ত্ৰীৰ পদৰ পৰা পদত্যাগ কৰাৰ পিছতে হাছিনাৰ ৰাজনৈতিক ভৱিষ্যতক লৈ জল্পনা-কল্পনা আৰম্ভ হৈছিল। সেই প্ৰেক্ষাপটত জয়ে এক সাক্ষাৎকাৰত দাবী কৰিছিল যে তেওঁৰ মাতৃ ৰাজনীতিলৈ ঘূৰি নাহে। তেওঁৰ কঠোৰ পৰিশ্ৰমৰ পিছতো যিদৰে আন্দোলন চলি আছে, তাক লৈ অত্যন্ত হতাশ হৈ পৰিছে।
জয়ে লগতে কয় যে হাছিনাই এতিয়া পৰিয়ালৰ সৈতে সময় কটোৱাৰ পৰিকল্পনা কৰিছে। কিন্তু ক’ত বা কেনেকৈ সিদ্ধান্ত লোৱা হোৱা নাই। হাছিনা-পুত্ৰই কয় , “মই এতিয়া ৱাশ্বিংটনত আছো। মোৰ ভনী লণ্ডনত থাকে। গতিকে আমি এতিয়াও নাজানো তেওঁ ক’ত থাকিব।”
সোমবাৰে বিয়লি হাছিনাই ভগ্নী ৰেহানাৰ সৈতে ঢাকাৰ বাসগৃহৰ পৰা পলায়ন কৰে ৷ সন্ধিয়ালৈকে তেওঁ ভাৰতত উপস্থিত হয় । তেওঁৰ বিমান দিল্লীৰ সমীপৰ উত্তৰ প্ৰদেশৰ গাজিয়াবাদৰ হিন্দন বায়ুসেনা ঘাটিত অৱতৰণ কৰে। পিছদিনা নিশা ভাৰতৰ ৰাষ্ট্ৰীয় নিৰাপত্তা উপদেষ্টা অজিত ডোভালে হাছিনাক সাক্ষাৎ কৰে। বাংলাদেশৰ প্ৰাক্তন প্ৰধানমন্ত্ৰীগৰাকীয়ে ভাৰতত আশ্ৰয় বিচৰা নাছিল বুলি ইতিমধ্যে জনা গৈছিল। সেয়েহে তেওঁৰ পৰৱৰ্তী গন্তব্যস্থানৰ বিষয়ে জল্পনা-কল্পনা আৰম্ভ হৈছে । ভাৰতৰ বৈদেশিক মন্ত্ৰী এছ জয়শংকৰে কয় যে হাছিনাই অতি কম সময়ৰ ভিতৰতে ভাৰতলৈ আহিবলৈ অনুৰোধ কৰিছিল। ভাৰতে সেই অনুমতি দিয়াৰ পিছত তেওঁ ভগ্নী শ্বেখ ৰেহানাৰ সৈতে ভাৰতলৈ আহিছিল। অৱশ্যে জয়শংকৰে হাছিনা বা বাংলাদেশৰ সৈতে ভাৰতৰ ভৱিষ্যতৰ পৰিকল্পনাৰ কথা প্ৰকাশ কৰা নাছিল।
