গামোছা বিতৰ্কত কি কলে বাংলা সাহিত্য সভাই

“বাংলা সাহিত্য সভা, অসম”-ৰ প্ৰথম ৰাজ্যিক প্রতিনিধি সন্মিলন উপলক্ষে অতিথি-সংবৰ্ধনাৰ ক্ষেত্ৰত অসমীয়া সমাজৰ ফুলাম গামোছাৰ সৈতে বাঙালী সমাজৰ মঙ্গলঘট আৰু উৎসৱাদিত ব্যৱহৃত গামছা যোগ কৰি নতুনকৈ এটি সংবৰ্ধনাবস্ত্ৰ কৰা হৈছিল।‌ এই
সংবৰ্ধনাবস্ত্ৰ আমাৰ সৃষ্টি কৰা নহয়।‌ আমাৰ উদযাপন সমিতিৰ অভ্যৰ্থনা উপসমিতিৰ উঠি অহা প্ৰজন্মৰ কিছুসংখ্যক সদস্যই সামাজিক মাধ্যমৰ এখন ছবিৰ পৰা এই আৰ্হি গ্ৰহণ কৰিছিল। এইখন ছবি দেৰ বছৰমানৰ পুৰণি। শিলচৰৰ এটি অনুষ্ঠানত কোনোবা সংগঠনে মাননীয় সংস্কৃতিমন্ত্রীক এইখন দিয়াৰ ছবি আছিল, কাষত শিলাদিত্য দেৱ ডাঙৰীয়াও আছে। তেখেত অসমৰ ভাষিক উন্নয়ন পৰিষদৰ অধ্যক্ষ হিচাপে আমাৰ পৃষ্ঠপোষক। সেহেয়ে তেখেতৰ সন্মতি গ্ৰহণ কৰি এইখন প্ৰস্তুত কৰা হৈছিল।
যোৱা দেৰ বছৰ ধৰি এই বিষয়ে কোনো প্ৰতিক্ৰিয়া হোৱা নাছিল। এইবাৰ হৈছে, সেয়েহে আমি বৰ বিব্ৰত অনুভৱ কৰিছোঁ। আনৰ বস্তু গ্ৰহণ কৰিবলৈ গৈ এটি বিভ্ৰান্তি আৰু বিতৰ্কৰ জন্ম হ’ল।‌ এয়া আমাৰ ইচ্ছাকৃত নহয়, কাম্যও নহয়। আমি কোনো বেয়া উদ্দেশ্য আগত ৰখা নাছিলোঁ। তথাপি অসমৰ একাংশ ৰাইজে বিষয়টো গ্ৰহণ নকৰিলে। অজানিতে যদি আমি আঘাত দিছোঁ, সেইবাবে আমি আন্তৰিকভাবে দুখ প্ৰকাশ কৰিছোঁ আৰু অহা দিনত যাতে এনে ধৰণৰ পৰিস্থিতি নাহে, এই সম্পৰ্কে আমি সচেতন থাকিম।
আমাৰ মঞ্চৰ এফালে আছিল শ্ৰীচৈতন্যদেৱৰ ছবি, আনফালে শ্ৰীমন্ত শংকৰদেৱৰ ছবি। আছিল ৰবীন্দ্ৰনাথ আৰু লক্ষ্মীনাথ বেজবৰুৱাৰ ছবি।আমি উদ্বোধনী অনুষ্ঠানৰ প্ৰথমেই গাইছিলোঁ ৰবীন্দ্ৰনাথৰ “ও আমাৰ দেশেৰ মাটি”, আৰু শেষত লক্ষ্মীনাথৰ ” অ’ মোৰ আপোনাৰ দেশ”। এফালে বিহু, আন ফালে ধামাইল নৃত্য।
আমি বৰাক-ব্ৰহ্মপুত্ৰৰ সমন্বয়ৰ বাবে আপ্ৰাণ চেষ্টা কৰিছিলোঁ। মুক্ত মনেৰে। মনত দুখ লাগিছে এনে এক অপ্ৰীতিকৰ অনভিপ্ৰেত বিতৰ্কৰ সূচনা হোৱা দেখি। এই বিতৰ্কৰ ইয়াতে সমাপ্তি হওক আৰু আমাৰ মাজত অহা দিনত অধিক মিলন সম্প্ৰীতিৰ পৰিৱেশ গঢ়ি উঠক, সেই কামনা কৰিছোঁ।