এইবাৰ বাজেট অধিৱেশনত তৃণমূল কংগেছৰ লোকসভাৰ সদস্য মহুৱা মৈত্ৰ্যক লোকসভাৰ অধ্যক্ষ গৰাকীয়ে নিৰ্ধাৰিত ১৩ মিনিট সময়ো ভাষণ দিবলৈ নিদিয়াত তেওঁ বাহিৰলৈ আহি প্ৰতিবাদ কৰা দেখা গ’ল। তেওঁৰ ভাষণত বাধা প্ৰদান কৰাৰ ফলত কেইটামান মূল্যবান কথা ক’বলৈ থাকি যোৱা বুলি সন্মানীয় সদস্য গৰাকীয়ে অভিযোগ উত্থাপন কৰিছে। সদস্যা গৰাকীয়ে যেতিয়া অতি খৰকৈ, সাৱলীলভাৱে, বলিষ্ঠভাৱে চৰকাৰৰ জনবিৰোধী কাৰ্যকলাপক তীব্ৰভাৱে সমালোচনা কৰি গৈছিল, বিপৰীত দিশৰ পৰা হাহিঁ, শব্দৰ ফৰ্মূতি শুনিবলৈ পোৱা গৈছিল।
ৰাহুল গান্ধীয়ে যেতিয়া সংসদত ভাৰতৰ নিবনুৱা সমস্যাক প্ৰাধান্য দি ধনী আৰু দুখীয়া হিচাপে দুখন ভাৰত সৃষ্টি কৰা বুলি প্ৰধানমন্ত্ৰীক সমালোচনা কৰিছিল তেতিয়াও একেই তাচ্ছিল্যভৰা শব্দৰ ফৰ্মূতি শুনিবলৈ পোৱা গৈছিল।
অসম বিধানসভাৰ হৈ যোৱা অধিবেশন সমূহতো একেই দৃশ্য। মূখ্যমন্ত্ৰী জনে কথা কৈ থাকিলে বা অন্যান্য মন্ত্ৰীবৰ্গই কথা কৈ থাকিলে বিৰোধী সদস্যৰ ফালৰ পৰা চিঞৰ বাখৰ কৰা হয়। বিৰোধীয়ে কথা ক’লে সিটো পক্ষই কৰে তুচ্ছতাচ্ছিল্য।
বিভিন্ন ৰাজ্য তথা কেন্দ্ৰত লোকসভা আৰু বিধান সভাৰ মজিয়াত চকী দলিওৱা প্ৰথাৰ কথা নকলোৱেই বা!
ক’ৰ পৰা আৰম্ভ হ’ল এনে অপ সংস্কৃতিৰ। ভাৰতীয় সংবিধানৰ ক’তো উল্লেখ নাই অভদ্ৰামিৰে সংসদৰ মজিয়াক মলিন কৰাৰ উপদেশ। এজন সদস্যই কথা কৈ থাকিলে দিত্বীয় পক্ষই তেখেতক শেষ কৰাৰ সুবিধাকন দিব নোৱাৰেনে! ইমান অসহনশীলতাৰ ধৃষ্টতা কেনেকৈ দেখাব পাৰে এজন জনপ্ৰতিনিধিয়ে আন এজন প্ৰতিনিধিক! চাৰিও প্ৰান্তৰ পৰা চাই থকা দেশৰ নাগৰিক সকলক তেওঁলোকে কি দেখুৱাব বিচাৰে! এইয়াই ৰাজনীতি নেকি! সদনৰ দৰে পবিত্ৰ মঞ্চত য’ত তেওঁলোকে স্ব ইচ্ছাৰে ঠিয় দিব নোৱাৰে, তাতে তেওঁলোকৰ এনে আচৰণ! প্ৰতিবাদ মানে হৈ হাল্লা, অপমান, তাচ্ছিল্য নেকি! প্ৰতিবাদৰ ভাষা কিয় নহয় গঠনমূলক! যুক্তিলৈ, সমালোচনালৈ ভয় কৰা তেওঁলোক একোজন পলৰীয়া নেকি! সংসদত এটা সমষ্টিৰ জনপ্ৰতিনিধিক কৰা অসন্মান সূচক ইংগিতে বা ব্যৱহাৰে সেই সমষ্টিটোৰ জনসাধাৰণক অসন্মান কৰা সূচায়।
আমি কিয় নেহৰু বা বাজপেয়ী দেৱক অনুসৰণ নকৰো? বাজপেয়ী দেৱে সংসদত নেহৰুক কৈছিল “আপোনাৰ মাজত চাৰ্চিল আৰু চেম্বাৰলিন দুয়োজনৰে ব্যক্তিত্ব মই দেখা পাওঁ”- কিমান সুসংগত আছিল তেখেতৰ মন্তব্য। আকৌ আন এটা ভাষণত তেওঁ কৈছিল যে চাউথ ব্লকত এখন নেহৰুজীৰ ফটো আৰিঁ থোৱা হৈছিল। এদিন সেই ফটোখন নেদেখি তেওঁ উদ্বিগ্ন হৈ পৰিছিল। পুনৰ সেই ঠাইত নেহৰুৰ ফটোখন আৰিঁ দিয়া হৈছিল। কিমান সন্মান দিছিল বিৰোধী দলৰ জেষ্ঠ্য নেতাজনক।
আমি সেই একেখন দেশতে বাস য’ত নেহৰু আৰু বাজপেয়ী দেৱৰ দৰে ব্যক্তি প্ৰধানমন্ত্ৰী হৈছিল। আজি আমি সেইখন দেশৰে নাগৰিক য’ত প্ৰধানমন্ত্ৰীৰ আৰু মূখ্যমন্ত্ৰীৰ মিমি বনাই হাহোঁ। য’ত সংসদ আৰু বিধানসভাৰ মজিয়াত এজনে আনজনৰ গালৈ চকী দলিয়াই বিৰোধ প্ৰদৰ্শন কৰোঁ!
আমি ক’লৈ গৈ আছো!
