এপ্ৰিলফুল আহিলেই অৰ্থাৎ এপ্ৰিল মাহৰ ১ তাৰিখ অহাৰ কেইদিন মানৰ আগৰ পৰা নিজকে সঁকিয়াই থাকো এপ্ৰিল ফুল আহিল , সাৱধান হ’বৰ হ’ল। সৰুতে অৰ্থাৎ স্কুলীয়া দিনবোৰত এপ্ৰিল ফুল লৈ বৰ আনন্দ উপভোগ কৰিছিলো। এপ্ৰিলৰ ১ তাৰিখে ৰাতিপুৱা কেনেকৈ কাৰোবাক মিছা কথা কৈ ঠগাব পাঁৰো তাৰ চিন্তাতে থাকো। কাৰোবাক ঠগাব পাৰিলে হাঁহি হাঁহি ক’ব নোৱাৰা হৈ যাওঁ। কেনেবাকৈ নিজে ঠগ খালে লাজ পোৱাৰ লগতে নিজকে বুৰ্বক যেন লাগিছিল। তাৰ পিছত স্কুলত গৈ শিক্ষকক এপ্ৰিলফুল কৰাৰ হেঁপাহ। সদায় শিক্ষকৰ ভয়ত থকা শ্ৰেণী কথাটো যেন সিদিনাখন এটা বেলেগ পৰিবেশ হৈ উঠে। চিয়াহী নথকা কলম শিক্ষকক দিয়া বা আলোচনী আদিত ক’ভাৰ লগাই পাঠ্য-পুথি বুলি ছাৰক দি এপ্ৰিল ফুল কৰাৰ মজাই বেলেগ আছিল। আজি কিছু বছৰ আগলৈকে এপ্ৰিল ফুলক লৈ বহুত আনন্দ-ধেমালী কৰা হৈছিল যদিওঁ বৰ্তমান সময়ত এইবোৰ কথা অৰ্থহীন হোৱাৰ দৰে হৈ গ’ল। এপ্ৰিল ফুল কি হয় তাৰ বিষয়ে ভালকৈ নজনাকৈয়ে এই বিষয়টোলৈ বহুত ফুৰ্তি কৰা তেতিয়াৰ প্ৰজন্মৰ হাতত সময় বহুত আছিল। আজিৰ প্ৰজন্মই মিছা কথা কোৱাৰ দিন এটাৰ বিষয়ে ইমান ভাবি থাকিবলৈ সময়ৰ অভাৱ হ’ল। কিন্তু আমাৰ মনবোৰত এতিয়াও এপ্ৰিল ফুলৰ নিচা এটা লাগিয়ে থাকিল। স্কুল -কলেজ-অফিচত যোৱাৰ আগতে আজি এপ্ৰিলফুল বুলি সকলোকে মনত পেলাই দিয়াৰ দায়িত্ব আজিৰ দিনতো সজীৱ হৈয়ে আছে।
আপুনি যদি ১৯ শতিকাৰ ৭০/৮০/ দশকৰ প্ৰজন্মৰ হয় , শেষৰ এপ্ৰিল ফুলটো কেতিয়া কৰিছিল মনত আছেনে বাৰু ? যদি মনত পৰা নাই মনত পেলাব চেষ্টা কৰকচোন ,অজানিতে আপোনাৰো মনত এক অবুজ আনন্দই আগুৰি ধৰিব। কি ঠিক সেই দিনটো আজিও হ’ব পাৰে , যদিহে আপোনাৰ সংযোগত আপোনাৰ প্ৰজন্মৰ ধেমেলীয়া বন্ধু-বান্ধৱী বা আন কোনোবা আছে।
আজি প্ৰায় ১০ বছৰ মান আগৰ কথা। মাতৃ তুল্য মানুহ এগৰাকীয়ে যাক মই বাইদেউ বুলি মাতো (নগাঁওত তেখেতৰ ঘৰত ভাড়া আছিলো ) হঠাতে ফোন কৰি মোক ঘৰৰ ঠিকনা বিচাৰিলে। মইও খুব ফুৰ্তি পালো বাইদেউ আহিব বুলি ঠিকনা দি খোৱা বস্তু অলপ ৰেডি কৰিলো। কিছু সময়ৰ
পিছত ফোন কৰিলে তুমি কোৱা মতে এপাৰ্টমেণ্টটোত আহিছো কিন্তু তোমাৰ ফ্লেটটো বিচাৰি নাপাই তলতে আছো। হাতত ম’বাইল লৈ দৌৰি যোৱাদি গ্ৰাউণ্ড ফ্লৰলৈ গ’লো আৰু বাইদেউক নেদেখি ক’ত বা গ’ল বুলি ভাবি ফোন কৰিলো । লগে লগে ভাঁহি আহিল ‘এপ্ৰিল ফুল’। হাঁহিম নে কান্দিম একো ভাবিয়েই নাপালো। এপ্ৰিল ফুল খোৱা লাজতকৈ বাইদেউ নহাৰ কথাটোহে বেছি দুখ দিলে। প্ৰতি বছৰে এপ্ৰিল ফুলৰ দিনাখন বাইদেউৰ কথা মনত পৰে। তেখেত য’তে আছে কুশলে থাকক। এইযে সৰু সৰু স্মৃতিবোৰে আমাক অকল এদিনৰ কাৰণেই আনন্দ নিদিয়ে । এই আনন্দবোৰে আমাৰ বুকুত ঘৰ সাজে , কঢ়িয়াই লৈ ফুঁৰো সযতনে। সেই আনন্দবোৰ আমি গোটেই জীৱন কালত উপভোগ কৰি থাকিব পাঁৰো।
১ এপ্ৰিলত কিয় ‘এপ্ৰিল ফুল’ দিন পালন কৰা হয় তাৰ কোনো নিৰ্দিষ্ট কাৰণ নাই যদিওঁ এই বিষয়ে বহুত কাহিনী প্ৰচলিত আছে—–
জনা যায় যে , ৰজা ৰিচাৰ্ড জয়ী আৰু বোহেমিয়াৰ ৰাণী এন্নে ১৩৮১ চনৰ ৩২ মাৰ্চত তেওঁলোকৰ এংগেষ্টমেণ্ট হ’ব বুলি ঘোষণা কৰিছিল। এংগেষ্টমেণ্টৰ খবৰ শুনি জনসাধাৰণ সুখী হৈছিল যদিওঁ পিছত বুজি পাইছিল যে মাৰ্চৰ ৩২ তাৰিখেই নাই। জনসাধাৰণে বুজি পালে যে তেওঁলোকক বুৰ্বক বনোৱা হৈছে আৰু ১৩৮১ চনৰ পৰাই ৩২ মাৰ্চ অৰ্থাৎ ১ এপ্ৰিলৰ দিনটো মুৰ্খ দিৱস হিচাপে পালন কৰা হৈছিল। ( কিছুমানৰ মতে ১৩৮২)
কাহিনী অনুসৰি ইউৰোপৰ দেশ সমূহত এপ্ৰিলৰ ১ তাৰিখে নৱবৰ্ষ উদযাপন কৰা হৈছিল। কিন্তু যেতিয়া পোপ গ্ৰেগৰী ১৩ ৰ নিৰ্দেশ অনুসৰি জানুৱাৰীৰ ১ তাৰিখৰ পৰা নতুন কেলেণ্ডাৰ গ্ৰহণ কৰা হ’ল তেতিয়াৰ পৰা জানুৱাৰীৰ ১ তাৰিখত নতুন বছৰ উদযাপন কৰিবলৈ ধৰিলে। কিছুমান লোকে ১ এপ্ৰিলৰ দিনটোতে নতুন বছৰ উদযাপন কৰি আছিল বাবে সেই মানুহবোৰক মুৰ্খ বুলি ঠাট্টা কৰিবলৈ ধৰিলে আৰু এনেকৈয়ে ১ এপ্ৰিল তাৰিখটো মুৰ্খ দিৱস হিচাপে পালন হ’বলৈ ধৰিলে।
১৯ শতিকাৰ ভিতৰত ‘এপ্ৰিল ফুল’ দিন বহুত জনপ্ৰিয় হৈ পৰিছিল।
ভাৰতত ১৯ শতিকাত ইংৰাজ সকলে আৰম্ভ কৰিছিল ‘এপ্ৰিল ফুল’ দিন। আজিৰ দিনতো ভাৰতৰ মানুহে এপ্ৰিলৰ ১ তাৰিখে বন্ধু-বান্ধৱী বা আপোন জনৰ লগত ধেমালী কৰে।
আহকচোন ব্যস্ততাভৰা জীৱনৰ পৰা অকণমান সময় উলিয়াই আমিও উদযাপন কঁৰো ‘এপ্ৰিল ফুল’ দিন। এপ্ৰিলফুল এক অৰ্থহীন বা মুৰ্খৰ দিন হিচাপে গণ্য নকৰি আনন্দ উপভোগ কৰি কাষ চাপি যাওঁ এজনে আনজনৰ ওচৰলৈ । হয়তো এনেবোৰ আনন্দই আমাক বহুত বেমাৰৰ পৰা আঁতৰাই ৰাখিব নাইবা কিছু চিন্তা-ভাৱনাৰ পৰা অলপ সময়ৰ বাবে সকাহ পাবলৈ সক্ষম হ’ম। অৰ্থহীন কথাবোৰো অৰ্থময় কৰি তোলো মানসিক আনন্দৰ কাৰণে ভৱিষ্যতৰ দিনত যিবোৰ আনন্দক স্মৃতি হিচাপে লৈ গুণগুণাব পাৰোঁ প্ৰতিজনে।
