“মাছ ডিপ্ৰেচন” ৰ শেষ ক’ত !

কমলাৰ বেপাৰী আৰু গ্ৰাহকৰ মাজত দৰদামৰ কথা বতৰা দেখি প্ৰায়ে ভৱা যায় ‘কোন সচাঁ!’বেপাৰীজনে লব বিচৰা দামটো নে গ্ৰাহকজনে দিব বিচৰা দামটো!
একেটা প্ৰশ্নই বাৰে বাৰে খুন্দিয়াই থাকে মগজুত। কোন সঠিক??
প্ৰতিযোগিতাৰ দৌৰত হৰা জিকা নে জীৱনৰ পৰা হৰা জিকাক একাষৰীয়া কৰা!কি সচাঁ? ধৰ্ষিতাৰ যোনীৰে বৈ যোৱা তেজৰ চেকুঁৰা নে ধৰ্ষণকাৰী পুত্ৰৰ মৃতদেহত বাগৰি কন্দা মাতৃৰ চকুলো!
জনপ্ৰিয়তাৰ হিচাপ নিকাচত ও একেই খেলিমেলি! বেছি সত্য কোন? ফেচবুক, টুইটাৰ, ইনষ্ট্ৰাগ্ৰাম নে প্ৰকৃত সামাজিক পৰিচয়! মিলিয়ন ফ’ল’ৱাৰচ থকা থকা মৰম লগা ছোৱালিজনীয়ে কিয় কৰে আত্মহত্যা! দুদিনলৈ গৃহবন্দী মৃতদেহৰ খবৰ কোনেও নললে? বন্ধুহীন জনপ্ৰিয়তাৰ অৰ্থ ক’ত!গৰ্ভৱতী পত্নীৰ বুকুত গুলিয়াব পৰাজন ভীৰু নে সাহসী!
জানিবৰৈ মন যায় লাজ নিবাৰণৰ বাবে গছৰ বল্ক পৰিধান কৰাৰ পৰা এতিয়ালৈকে এই সুদীৰ্ঘ বিবৰ্তনৰ কিবা অৰ্থ আছে নেকি যেতিয়া হিজাব অথবা চুটি কাপোৰ পিন্ধাক লৈ আমি বিতৰ্ক কঁৰো! বিতৰ্ক মানে কি সিয়ো এক উত্তৰহীন প্ৰশ্ন। একপক্ষীয় সিদ্ধান্তই বিতৰ্কক উপহাস কৰে। প্ৰকৃতিয়ে আমাক বাৰে বাৰে সোঁৱৰাই দিছে তোমালোক শ্ৰেষ্ঠ নহয়। তোমালোকৰো হ’ব পাৰে মতিভ্ৰম। সেয়ে তুমি সভ্যতাৰ চূড়ান্ত শিৰত ৰৈ যুদ্ধ কৰিছা। ঈশ্বৰৰ অট্টহাস্য তুমি নুশুনা!
গণতন্ত্ৰৰ শ্ৰেষ্ঠতম পৃষ্ঠভূমি বুলি অভিহিত ইংলণ্ডত এটা প্ৰবাদ আছে “তোমাৰ অধিকাৰ সিমানৈলৈকেহে বিস্তৃত য’ত দ্বিতীয় এজন নাগৰিকৰ নাকটো আৰম্ভ হৈছে”। অৰ্থাৎ তোমাৰ লাঠিডাল ঘূৰাঁওতে তুমি সাৱধান হ’বই লাগিব যাতে বেলেগৰ নাকটো নাভাগে। অথচ সেইদেশৰে মেগ্‌নাকাৰ্টাক অনুসৰণ কৰা ভাৰতীয় সংবিধানৰ কি অৱস্থা!
অতিকে নিঃকিন বুলি ভৱা নিগনিটোৰ দৰে আমি কেৱল দৌৰিছো। কিন্তু ক’লৈ?শেষ আছেনে?
একেবোৰ প্ৰশ্নই যেতিয়া সমাজক থকা সৰকা কৰে তেতিয়া ই কেৱল প্ৰশ্ন হৈ নাথাকে। ই হৈ পৰে “মাছ ডিপ্ৰেচন” অথবা “গণ হতাশা”। মাছ ডিপ্ৰেচনৰ বলি কেৱল এটা জাতি বা এখন দেশ হৈ থকা নাই। সমগ্ৰ পৃথিৱীলৈ বিয়পিছে ইয়াৰ লক্ষণ।
তথাপি আমাৰ আশা ভাল দিন আহিব! বিশ্বশ্ৰেষ্ঠ গ্ৰন্থ “গীতা” ৰচিত হৈছিল এনে এক হতাশা ভৰা পৰিৱেশতেই। কুৰুক্ষেত্ৰৰ যুদ্ধভূমি এৰি যাব খোজা বীৰ যুদ্ধা অৰ্জুনক বুজাইছিল ভগৱান কৃষ্ণই। কৃষ্ণৰ অভয় বাণীৰেই লিখিত ৰূপ “গীতা” আজি সৰ্বতে চৰ্চিত।
আমি নিশ্চয়কৈ মুক্ত হ’ব পাৰিম মাছ ডিপ্ৰেচনৰ পৰা ।গণহতাশাৰ শেষ হ’ব সেইদিনাই যিদিনা আমি সঁচা আৰু মিছা, শুদ্ধ আৰু অশুদ্ধৰ যথাযথ উত্তৰ বিছাৰি উলিয়াব পাৰিম। সুস্থ গণতন্ত্ৰই দিব আমাক সঠিক উত্তৰ।