সোমবাৰে পুৱতি নিশা ৰহাৰ চাপৰমুখ ৰে’ল জংচনত নগাঁও আৰু ৰহা আৰক্ষীৰ অভিযানত উদ্ধাৰ হয় বৃহৎ পৰিমাণৰ গাঞ্জা ৷ ৰাণী কমলাপতি এক্সপ্ৰেছৰ এটা ডবাৰ শৌচাগাৰৰ ভিতৰৰ বক্সত সৰবৰাহকাৰীয়ে লুকুৱাই আনিছিল গাঞ্জাখিনি ৷ আৰক্ষীয়ে জব্দ কৰাৰ গাঞ্জাৰ পৰিমাণ ১ কুইণ্টল ১২কেজি বুলি জানিব পৰা গৈছে ৷
আগৰতলা-মধ্যপ্ৰদেশ হাবিবগঞ্জ ৰাণী কমলাপতি এক্সপ্ৰেছত অভিযান চলাই হোজাইত আৰক্ষীয়ে জব্দ কৰে কমেও ৩কোটি টকা মূল্যৰ অবৈধ গাঞ্জা ৷ ত্ৰিপুৰাৰ পৰা কেইবাটাও মাফিয়াই উক্ত ট্ৰেইনেৰে সৰবৰাহ কৰাৰ চেষ্টা কৰিছিল গাঞ্জাখিনি ৷হোজাইত গোপন সূত্ৰৰ পম খেদি আৰক্ষীয়ে বহুকেইটা গাঞ্জা পেকেট সহ চাৰিতাকৈ গাঞ্জা মাফিয়াক আটক কৰে ৷ পৰৱৰ্তী সময়ত গাঞ্জা মাফিয়া কেইটাৰ স্বীকাৰোক্তিৰ ভিত্তিত একেখন ৰে’লতে জব্দ কৰে বৃহৎ পৰিমাণৰ গাঞ্জাখিনি ৷ ৰে’লৰ এটা ডবাৰ শৌচাগাৰৰ ভিতৰৰ বক্সত লুকুৱাই অনা গাঞ্জাখিনি আৰক্ষীয়ে কাটাৰমেচিন ,হাতুৰী আদিৰে বক্স ভাঙি উদ্ধাৰ কৰিবলৈ সক্ষম হয় ৷
উক্ত অভিযানটোৰ নেতৃত্ব দিয়া নগাঁও জিলাৰ অতিৰিক্ত আৰক্ষী অধীক্ষক ধ্ৰুৱ বৰাই জানিবলৈ দিয়া মতে ঘটনা সন্দৰ্ভত অব্যাহত আছে তদন্ত ৷
