অৱশেষত স্বদেশৰ মাটিত ভৰি দিলে লাভলীনা বৰগোঁহায়ে। টকিঅ’ অলিম্পিকত অংশ গ্ৰহণ কৰি আজি মাতৃভু উভতি আহিছে এই গৰাকী অসম কন্যা। উল্লেখ্য যে নতুন দিল্লীত উপস্থিত হোৱা খেলুৱৈ গৰাকীক সম্ভাষণ জনাবৰ বাবে উপস্থিত থাকে ক্ৰীড়া সংগঠন, কেন্দ্ৰীয় চৰকাৰৰ প্ৰতিনিধিসকল । বিমানবন্দৰত উষ্ম আদৰণি জনোৱা হয় অসমৰ এই গৰাকী খেলুৱৈক ।
দিল্লীৰ অশোকা হোটেলত বিশেষভাৱে সম্বৰ্ধনা জনোৱা হয় অসমৰ এই গৰাকী খেলুৱৈক। উল্লেখ্য যে লাভলীনাৰ লগতে নীৰজ চোপ্ৰা আৰু ভাৰতীয় পুৰুষ হকী দলটোও ইতিমধ্যে দিল্লীত উপস্থিত হৈছে। আনহাতে আজি দিল্লীত উপস্থিত হোৱা লাভলীনাই অহা ১১ আগষ্টত উপস্থিত হ’ব গুৱাহাটীত ।
উল্লেখ্য যে ৰাজ্য চৰকাৰে ক্ৰীড়াবিদ গৰাকীক আদৰিবলৈ বিশেষ অনুষ্ঠানৰ আয়োজন কৰিছে। জানিবলৈ পোৱামতে গুৱাহাটী বিমানবন্দৰত বিহু হুঁচৰিৰ জৰিয়তে খেলুৱৈগৰাকীক আদৰণি জনোৱা হ’ব। গুৱাহাটীত উপস্থিত হোৱাৰ পাচত বিলাসী হোটেল তাজ ভিভান্তাত জিৰণিৰ ব্যৱস্থা কৰা হৈছে খেলুৱৈ গৰাকীৰ বাবে।
প্ৰাপ্ত তথ্য অনুসৰি শংকৰদেৱ কলাক্ষেত্ৰত ৰাজ্য চৰকাৰৰ দ্বাৰা সম্বৰ্ধনা জনোৱা হ’ব খেলুৱৈ গৰাকীক। খেলুৱৈ গৰাকী অসম চৰকাৰৰ পৰা লাভ কৰিব লগীয়া পুৰষ্কাৰ সমূহ উক্ত দিনা প্ৰদান কৰা হ’ব বুলি জানিব পৰা গৈছে ।বিভিন্ন ক্ৰীড়া সংগঠন তথা দল সংগঠনে আদৰণি জনোৱাৰ পাচতহে গোলাঘাটৰ বাৰমুখীয়াৰ নিজ গৃহত উপস্থিত হ’বগৈ খেলুৱৈ গৰাকী।
আনহাতে সম্পূৰ্ণৰূপে ক’ভিড প্ৰট’কল মানিহে অসমৰ মাটিত আদৰণি জনোৱা হ’ব দেশলৈ গৌৰৱ কঢ়িয়াই অনা এই গৰাকী খেলুৱৈক ।
