আজি বিদ্ৰোহী কবি প্ৰসন্নলাল চৌধুৰীৰ ওপজা দিন । ১৮৯৮ চনৰ আজিৰ দিনটোতে কামৰূপ জিলাৰ পলাশবাৰীত তেওঁৰ জন্ম হয় । ১৯২৮ চনত তেওঁ কলিকতাৰ ছেইণ্ট পল কলেজৰ পৰা স্নাতক ডিগ্ৰী লাভ কৰি কেইবাখনো বিদ্যালয়ত শিক্ষকতা কৰাৰ পিছত ১৯৬৫ চনত বৰপেটা বিদ্যাপীঠৰ প্ৰধান শিক্ষক হিচাপে অৱসৰ গ্ৰহণ কৰে । ছাত্ৰাৱস্থাৰ পৰাই তেওঁ লেখা-মেলা কৰিছিল । কবিতা, গীত, গল্প, নাটক, শিশু-সাহিত্য আদি সকলো দিশতে তেওঁ অৰিহণা যোগাইছিল যদিও এগৰাকী কবি হিচাপেহে অধিক প্ৰসিদ্ধ ।অগ্নিমন্ত্ৰ, গুঞ্জৰী, মধুৰ বিপাক আদি তেওঁৰ প্ৰকাশিত গ্ৰন্থ । তেওঁ প্ৰকাশ নামৰ সাপ্তাহিক কাকত এখনো সম্পাদনা কৰিছিল । ১৯৭৮ চনত গোলাঘাটত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । সাহিত্যিকগৰাকীলৈ আমাৰ প্ৰণাম ।
আজি বিশিষ্ট সাহিত্যিক যজ্ঞেশ্বৰ শৰ্মাৰ ওপজা দিন । ১৯০৬ চনৰ আজিৰ দিনটোতে তিতাবৰৰ হামদৈ বগীৰ গাঁৱত তেওঁৰ জন্ম হৈছিল । তেওঁ আছিল এগৰাকী প্ৰবন্ধকাৰ, অনুবাদক, সাহিত্য সমালোচক তথা অধ্যাপক । ১৯২৯ চনত তেওঁ কলিকতা বিশ্ববিদ্যালয়ৰ পৰা ইংৰাজী বিষয়ত স্নাতকোত্তৰ ডিগ্ৰী লাভ কৰি শিক্ষকতাৰে তেওঁ কৰ্মজীৱনৰ পাতনি মেলে । কিছুদিন কাশী বিশ্ববিদ্যালয়ত অধ্যাপনা কৰাৰ পিছত তেওঁ যোৰহাটৰ জগন্নাথ বৰুৱা মহাবিদ্যালয়ত যোগদান কৰে । ১৯৪৪ চনত তেওঁ নগাঁও মহাবিদ্যালয়ৰ প্ৰতিষ্ঠাপক অধ্যক্ষ ৰূপে যোগদান কৰে আৰু ১৯৬৮ চনত অৱসৰ গ্ৰহণ কৰে । সৰুৰে পৰাই সাহিত্য সাধনাত ব্ৰতী হোৱা যজ্ঞেশ্বৰ শৰ্মাৰ প্ৰথম কবিতাটো আছিল দিনৰ সপোন । তেওঁৰ প্ৰকাশিত গ্ৰন্থসমূহৰ ভিতৰত শতপত্ৰ, লেফাফা, ফুল আৰু জুই, সাহিত্য-সংস্কৃতিৰ প্ৰবাহ আদি অন্যতম । ১৯৭৬ চনত টিহুত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । সাহিত্যিকগৰাকীলৈ আমাৰ প্ৰণাম ।
আজি বিশিষ্ট সাহিত্যিক, সাংবাদিক, সমালোচক হোমেন বৰগোহাঁঞিৰ ওপজা দিন । ১৯০২ চনৰ আজিৰ দিনটোতে লক্ষীমপুৰ জিলাৰ ঢকুৱাখনাত তেওঁৰ জন্ম হৈছিল । কটন কলেজৰ পৰা ইংৰাজী বিষয়ত স্নাতক ডিগ্ৰী লৈ ১৯৫৫ চনত তেওঁ অসম প্ৰশাসনিক সেৱাৰ বিষয়া হিচাপে কৰ্মজীৱনৰ পাতনি মেলে । পিছলৈ তেওঁ চৰকাৰী পদবী এৰি ১৯৬৮ চনত সাপ্তাহিক নীলাচলৰ প্ৰতিষ্ঠাপক সম্পাদক হিচাপে যোগদান কৰে । তাৰ পিছত তেওঁ নাগৰিক, লোকায়ত, অসমবাণী, সূত্ৰধাৰ,সাতসৰী, দৈনিক বাতৰি, আমাৰ অসম, নিয়মীয়া বাৰ্তা আদি কাকত-আলোচনী সম্পাদনা কৰে । সাত বছৰ বয়সতে তেওঁ কৰিতাৰে সাহিত্যিক জীৱনৰ পাতনি মেলিছিল । তেওঁৰ সাহিত্য কৃতিসমূহৰ ভিতৰত গল্প আৰু নক্সা, সুবালা, অস্তৰাগ, হালধীয়া চৰায়ে বাও ধান খায়, মৎস্যগন্ধা, প্ৰজ্ঞাৰ সাধনা, আত্মানুসন্ধান, হৈমন্তী, এশ বছৰৰ অসমীয়া কবিতা আদি অন্যতম । ১৯৭৮ চনত তেওঁৰ পিতা-পুত্ৰ উপন্যাসখনৰ বাবে তেওঁ সাহিত্য অকাডেমি বঁটা লাভ কৰে । ১৯৯২ চনত লাভ কৰে অসম উপত্যকা সাহিত্য বঁটা । তেওঁ অসম চৰকাৰৰ শ্ৰীমন্ত শংকৰদেৱ বঁটাও লাভ কৰে । ২০০১ চনত ডিব্ৰুগড়ত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । সাহিত্যিকগৰাকীলৈ আমাৰ প্ৰণাম ।
