বৃহস্পতিবাৰে ৰাজ্যৰ বিত্তমন্ত্ৰী অজন্তা নেওগে বিধানসভাৰ মজিয়াত দাঙি ধৰা অসম চৰকাৰৰ বাজেটে ৰাজ্যৰ চাহ উদ্যোগৰ বাবে কেইবাটাও আশাৰ বতৰা কঢ়িয়াই আনিছে বুলি মন্তব্য প্ৰকাশ কৰিছে নৰ্থ ইষ্টাৰ্ণ টি এচ’চিয়েছন চমুকৈ নেটাই। এক প্ৰেছ বিবৃতিযোগে নেটাৰ উপদেষ্টা বিদ্যানন্দ বৰকাকতিয়ে কয় যে অসম চৰকাৰৰ ২০২৩-২৪ বিত্তীয় বৰ্ষৰ বাজেটখনত ৰাজ্যৰ চাহ শ্ৰমিক সকলৰ লগতে সামগ্ৰিক ভাৱে চাহ খণ্ডৰ উন্নয়নৰ গতি ত্বৰান্বিত কৰাৰ ক্ষেত্ৰত কেইবাখনো আঁচনি গ্ৰহণ কৰা হৈছে আৰু ইয়াৰ বাবে ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্ম্মা আৰু বিত্তমন্ত্ৰী অজন্তা নেওগ ধন্যবাদৰ পাত্ৰ। বাজেটত ঘোষণা কৰা অনুসৰি অসমৰ চাহৰ ২০০ বছৰীয়া জয়ন্তী ৰাজ্য চৰকাৰৰ উদ্যোগত আড়ম্বৰপূৰ্ণভাৱে অনুষ্ঠিত কৰা হ’ব। বিশ্ববিখ্যাত অসমৰ চাহৰ ২০০ বছৰীয়া জয়ন্তী উপলক্ষে সমগ্ৰ দেশৰ আগশাৰীৰ নগৰ -চহৰসমূহত ৰোড শ্ব’ পতাৰ বাবে ৰাজ্য চৰকাৰে গ্ৰহণ কৰিবলৈ লোৱা পদক্ষেপে চাহক এক ব্ৰেণ্ড হিচাপে প্ৰতিপন্ন কৰাৰ লগতে অসমৰ চাহ শ্ৰমিকৰ আৰ্থ সামাজিক আৰু সাংস্কৃতিক ঐতিহ্যই সমগ্ৰ দেশতে প্ৰচাৰ লাভ কৰিব আৰু ইয়াৰ
পৰিপ্ৰেক্ষিতত দেশত চাহ সেৱনকাৰীৰ সংখ্যা ( জনমূৰি হিচাপত) বৃদ্ধি পোৱাৰ পূৰ্ণ সম্ভাৱনা আছে। ইয়াৰ উপৰিও অসম চাহ উদ্যোগ বিশেষ অনুদান আঁচনি, ২০২০ৰ অনুসৰি অৰ্থডক্স চাহৰ উৎপাদনত চৰকাৰী ৰেহাই মূল্য প্ৰতি কেজিত পূৰ্বৰ ৭ টকাৰ পৰিৱৰ্তে বৰ্তমান ১২ টকা কৰাতো আন এক আদৰণীয় পদক্ষেপ বুলি বিদ্যানন্দ বৰকাকতিয়ে জানিবলৈ দিয়ে। আনহাতে চাহ বাগিচাৰ শ্ৰমিকৰ লাইনলৈ যোৱা বাট পথৰ উন্নয়ন, শ্ৰমিকৰ পৰিয়ালৰ বিদ্যুৎ সংযোগৰ পূৰ্বৰ বকেয়া ৰেহাই দিয়া, ৰাজ্যৰ চাহ বাগিচাৰ গৰ্ভৱতী মহিলা শ্ৰমিকৰ বাবে চৰকাৰে আগবঢ়োৱা অনুদান বৰ্তমানৰ ১২ হাজাৰ টকাৰ পৰা ১৫ হাজাৰ টকালৈ বৃদ্ধি কৰা, চাহ বাগিচাৰ গুৰুত্বপূৰ্ণ এলেকাত ৫ শতাধিক মহাপ্ৰভু জগন্নাথ কমিউনিটি হল আৰু দক্ষতা বিকাশ কেন্দ্ৰ নিৰ্মাণ কৰিবলৈ লোৱা, মুখ্যমন্ত্ৰী আৱাস যোজনাৰ অধীনত চাহ বাগিচাসমূহত দহ সহস্ৰাধিক চাহ শ্ৰমিকৰ গৃহ নিৰ্মাণ আঁচনি ইত্যাদি ৰাজ্যৰ চাহ উদ্যোগটোক অধিক গতিশীলতা প্ৰদান কৰিব পৰা কেইটামান উল্লেখনীয় দিশ বুলি বিবৃতিটোত উল্লেখ কৰিছে নৰ্থ ইষ্টাৰ্ণ টি এচ’চিয়েছন চমুকৈ নেটাৰ উপদেষ্টা গৰাকীয়ে।
