অলপতে গম পালো ডিব্ৰুগড়ৰ কানৈ মহাবিদ্যালয়ত ডে’ কেয়াৰ চেণ্টাৰ এটা মুকলি কৰা হৈছে। ডিব্ৰুগড় বিশ্ববিদ্যালয়ত অৱশ্যে প্ৰায় ২০০৮ চনৰ পৰাই ডে’ কেয়াৰ চেণ্টাৰ আছে বুলি শুনিছো। যিহেতু ইউনিৰ্ভাচিটি গ্ৰাণ্ট কমিছনৰ নিয়ম অনুসৰি মহাবিদ্যালয় বা বিশ্ববিদ্যালয়ত ডে’ কেয়াৰ চেণ্টাৰ থকাতো বাধ্যতামূলক যাতে কৰ্মৰত অভিভাৱকসকলে নিজৰ সন্তানক ডে’ কেয়াৰ চেণ্টাৰত ৰাখিব পাৰে।
বৰ্তমান অসমৰ সাংস্কৃতিক মন্ত্ৰী বিমল বৰাদেৱৰ লগত এবাৰ কথা পাতোতে জানিব পাৰিছিলো যে তেওঁ তেখেতৰ সমষ্টিৰ বাগান বিলাকত ডে’ কেয়াৰ চেণ্টাৰৰ ব্যৱস্থা কৰি দিছিল। যাৰ ফলত বাগানৰ পাত তোলা মহিলাসকলে সন্তানক লগত লৈ কামলৈ আহিব পাৰে আৰু নিশ্চিন্তমনে কাম কৰিব পাৰে।
ডে’ কেয়াৰ চেণ্টাৰৰ প্ৰয়োজনীয়তা কিমান!
সাধাৰণতে চাকৰিয়াল মহিলাসকলে সন্তান জন্মৰ পাছত ছমাহলৈ মেটাৰনিটি লিভ্ ল’ব পাৰে। কিছুমানে সন্তান জন্মৰ অলপদিনৰ আগৰ পৰাই ছুটি ল’ব লগা হয়। তেতিয়া সন্তান জন্মৰ পাছত ছমাহতকৈ আগতে চাকৰিত যোগদান কৰে। চৰকাৰী বা বেচৰকাৰী সকলো প্ৰতিষ্ঠানে মেটাৰনিটি লিভ্ দিয়াতো বাধ্যতামূলক।কিন্তু মেটাৰনিটি লিভ্ শেষ হোৱাৰ পাছত প্ৰতিগৰাকী মহিলাই এক সাংঘাটিক সমস্যাৰ সন্মুখীন হ’ব লগাত পৰে। ছমহীয়া সন্তানটিক ক’ত থৈ যাব ? কাৰ লগত থৈ যাব? মাকৰ গাখীৰ খাই থকা কেঁচুৱাটিক আকৌ বটল গাখীৰ খুওৱাৰ প্ৰেক্টিছ্ কৰিব লগা হয়। পতি-পত্নীৰ দুজনীয়া সংসাৰত দুইজনৰ পানীত হাঁহ নচৰা অৱস্থা হয়। মাক বা শাহুৱেকক ঘৰলৈ আনি তেওঁলোকৰ লগতে বহু অভিভাৱকে কেঁচুৱাটোক থৈ যায় যদিও সকলোৰে এই সুবিধা নাথাকে অথবা সকলোৰে পক্ষে এইয়া সম্ভৱ নহয়।
যৌথ পৰিয়ালত কিছুমান সুবিধা থাকে যদিও সন্তানৰ গা বেয়া বা আন কিছুমান সময়ত সন্তানৰ কাষত মাকৰ বা দেউতাকৰ উপস্থিতি একান্তই প্ৰয়োজন। আনহাতে কৰ্মক্ষেত্ৰৰ এৰাব নোৱাৰা কামৰ তাগিদাই সন্তানক ঘৰত তেনেকৈয়ে এৰি থৈ যাবলৈ বাধ্য হয় বহু অভিভাৱক। তেনেকুৱা সময়বোৰত ডে’ কেয়াৰ চেণ্টাৰৰ প্ৰয়োজনীয়তা বহুত বেছি।
বহুলোকে ক্ৰেছৰ সুবিধা লয় যদিও সকলো ঠাইতে বিশেষকৈ মফছলীয়া অঞ্চলবোৰত ক্ৰেছৰ সুবিধা নাথাকিবও পাৰে।
বহু এন. জি. অ’ ই ঘৰত কেচুৱা ৰাখিবলৈ মহিলাক কিছুমানক নিয়োগ কৰে। তেওঁলোকক ট্ৰেইনিং দিয়া হয় যদিও বহুসময়ত তেওঁলোকৰ হাতত সন্তানক গতাই থৈ কৰ্মক্ষেত্ৰলৈ ওলাই যোৱাতো এটা সাংঘাটিক সাহসী পদক্ষেপ হৈ পৰে। তেওঁলোকৰ বিশ্বাসযোগ্যতাত সন্দেহ থকাতোও স্বাভাৱিক। আনহাতে তেওঁলোকৰ দৰমহা প্ৰায় ৯০০০/- টকাৰ পৰা ১৫০০০/- টকালৈকে হোৱা বাবে সকলোৰে পক্ষে তেনে মহিলাক কেঁচুৱা ৰাখিবৰ বাবে নিয়োগ কৰা অসম্ভৱ হৈ পৰে।
বহু চাকৰিয়াল দম্পত্তিয়ে দুখীয়া ঘৰৰ সৰু সৰু ল’ৰা-ছোৱালীক কেঁচুৱা ৰখিবলৈ বিচাৰি ফুৰে। বিশেষকৈ কম দৰমহাত ১৫/১৬ বছৰ বয়সৰ কামকৰা ছোৱালীক নিজ সন্তানক ৰখিবলৈ নিয়োগ কৰে যিটো অতি দুৰ্ভগ্যজনক আৰু আইনমতে দণ্ডণীয়।
চৰকাৰী হওক বা বেচৰকাৰী হওক সকলো কৰ্ম প্ৰতিষ্ঠানত ডে’ কেয়াৰ চেণ্টাৰ থকাতো নিশ্চিত হ’ব লাগে। কেৱল মাক চাকৰিয়াল বুলিয়েই নহয় বহু দেউতাকেও মাকৰ দৰেই সন্তানক সুন্দৰকৈ লালন পালন কৰে। ডে’ কেয়াৰ চেণ্টাৰে পৰিস্থিতি সাপেক্ষে দেউতাক সকলকো সহায় কৰিব পাৰে।
ডে’ কেয়াৰ চেণ্টাৰৰ ব্যৱস্থাই সন্তানক এক সুস্থ পৰিৱেশ দিয়াৰ লগতে অভিভাৱক কৰ্মচাৰীৰ পৰাও কৰ্ম প্ৰতিষ্ঠান একোটাই “ভালকাম” বা “কোৱালিটি ৱৰ্ক” আশা কৰিব পাৰে। অন্যথা সন্তানক ঘৰত থৈ অহাৰ চিন্তাই বহুসময়ত অভিভাৱক কৰ্মচাৰীৰ কামৰ প্ৰতি মনোযোগ বিচ্ছিন্ন কৰাৰ সম্ভাৱনা থাকে।
