ভাৰতৰ চলচিত্ৰ জগতলৈ একাধিক চুপাৰ দুপাৰ হিট ছবি উপহাৰ দিয়া বলীউড জগতৰ অন্যতম তাৰকা অভিনেতা জেকী শ্ৰফ। চলচ্চিত্ৰ জগতৰ এগৰাকী শক্তিশালী অভিনেতা হিচাপে গণ্য কৰা জেকী শ্ৰফে নিজৰ কেৰিয়াৰত এতিয়ালৈকে ১৩টা ভাষাত ২২০খনতকৈও অধিক ছবিত অভিনয় কৰিছে আৰু এই প্ৰক্ৰিয়া এতিয়াও চলি আছে।
শেহতীয়াকৈ বলীউডৰ সৈতে হোৱা এক বাৰ্তালাপত অভিনেতা গৰাকীয়ে তেওঁ চলচিত্ৰৰ নায়ক হোৱাৰ আগৰ সময়ছোৱাৰ লগতে বিভিন্ন ক্ষেত্ৰত তেওঁ কাম কৰাৰ কথা আৰু কেনেকৈ তেওঁৰ ছবিত নায়কৰ চৰিত্ৰ ৰূপায়ণ কৰাৰ সৌভাগ্য ঘটিছিল সেই বিষয়ে মুকলিকৈ প্ৰকাশ কৰে ।
তেওঁ কয় যে ছবিত অভিনয় কৰাৰ আগতে বিভিন্ন ধৰণৰ কাম কৰিছিল তেওঁ । এটা সাক্ষাৎকাৰৰ সময়ত যেতিয়া অভিনেতা গৰাকীক সোধা হৈছিল যে ছবিলৈ অহাৰ আগতে তেওঁ শ্বেফ, ফ্লাইট এটেণ্ডেণ্ট আদিৰ দৰে বহুতো কাম কৰিছিল যদিও এনে কি কথা আছিল যি জেকী শ্ৰফক চিনেমালৈ আহিবলৈ প্ৰেৰণা দিছিল? এই কথাৰ উত্তৰত তেওঁ কয় যে তেওঁ কেতিয়াও অভিনেতা হ’বলৈ বিচৰা নাছিল কিন্তু ভগৱানে তেওঁক এই সুযোগ দিছিল আৰু তেওঁ এই সুযোগ গ্ৰহণ কৰিছিল।
নায়ক হোৱাৰ পূৰ্বৰ সময়ছোৱাত তেওঁ কাপোৰৰ দোকান এখনত ৰপ্তানিকৃত কাপোৰৰ মানদণ্ডৰ তদাৰক কৰিছিল আৰু তাৰ পিছত তেওঁ এটা ট্ৰেভেল এজেন্সী আৰম্ভ কৰিছিল। তেওঁৰ পিতৃয়ে কৈছিল যে গণমাধ্যমত জেকীৰ ভৱিষ্যত উজ্জ্বল ৷অভিনেতা গৰাকীয়ে পুনৰ কয় যে মাত্ৰ দুবছৰ ধৰি তেওঁ সেই কাম কৰে আৰু তাৰ পিছত কোনোবাই তেওঁক বাটৰ পৰা তুলি আনে আৰু তেওঁ এজন নায়ক হৈ পৰে ।
শেষত জেকিয়ে কয় যে তেওঁ কাৰো পৰা কাম বিচৰা নাছিল।তেওঁৰ ওচৰলৈ যি সুযোগ আহিছিল তাকহে তেওঁ গ্ৰহণ কৰিছিল ৷ সন্মান কৰিছিল। তেওঁৰ যি যি নাছিল সেইটোৰ কথা তেওঁ কেতিয়াও ভবা নাছিল।
শেহতীয়াকৈ জনপ্ৰিয় অভিনেতা জেকী শ্ৰফৰ ছবি ‘লাইফ ইজ গুড’ মুক্তি পাইছে য’ত অভিনেতাগৰাকীয়ে এক গুৰুত্বপূৰ্ণ চৰিত্ৰ ৰূপায়ণ কৰিছে।
