আমেৰিকাৰ গৱেষণা সংস্থা হিণ্ডেনবাৰ্গৰ এক প্ৰতিবেদনৰ পিছতে আদানী গ্ৰুপৰ শ্বেয়াৰ হ্ৰাস পায়। হিণ্ডেনবাৰ্গে গৌতম আদানীৰ মালিকানাধীন কোম্পানীসমূহে শ্বেয়াৰৰ অনিয়ম কৰা বুলি অভিযোগ উত্থাপন কৰে। বহু বিনিয়োগকাৰীয়ে আদানী শ্বেয়াৰৰ পৰা ধন উলিয়াবলৈ আৰম্ভ কৰিলে। এই সন্দর্ভত উচ্চতম ন্যায়ালয়ত দুটা গোচৰ ৰুজু হৈছিল। বৃহস্পতিবাৰে উচ্চতম ন্যায়ালয়ে বিনিয়োগকাৰীৰ আস্থাৰ বিষয়টো চোৱাচিতা কৰিবলৈ এখন কমিটী গঠন কৰে। শ্বেয়াৰ বজাৰত উত্থাপিত ‘অনিয়ম’ৰ অভিযোগ চোৱাচিতা কৰিবলৈ নিৰ্দেশ দিয়া হয় ছেবিক।
উচ্চতম ন্যায়ালয়ে শ্বেয়াৰ বজাৰত নিয়ন্ত্ৰণ ব্যৱস্থাৰ ওপৰত চকু ৰাখি প্ৰয়োজনীয় সংস্কাৰ আনিবলৈ বিশেষজ্ঞ সমিতি গঠন কৰিছে। অৱসৰপ্ৰাপ্ত ন্যায়াধীশ এ এম ছাপ্ৰা, ন্যায়াধীশ জে পি দেৱদত্ত, কে ভি কামাথ, নন্দন নিলেকানী আৰু সোমাশেখৰ সুন্দৰেছনৰ নেতৃত্বত গঠিত কমিটীয়ে শ্বেয়াৰ বজাৰৰ নিয়ন্ত্ৰণ ব্যৱস্থাৰ ওপৰত পৰীক্ষা কৰিব । আদালতে অনুভৱ কৰিছে যে বজাৰত সৃষ্টি হোৱা অনিশ্চয়তাৰ পৰা ভাৰতীয় বিনিয়োগকাৰীৰ স্বাৰ্থ সুৰক্ষিত কৰা উচিত। আদালতে পৰ্যবেক্ষণ কৰা মতে, বিপজ্জনক পৰিস্থিতিৰ পৰা হাত সাৰিবলৈ বিনিয়োগকাৰীৰ স্বাৰ্থত নিয়ন্ত্ৰণ কাঠামোৰ সঠিক মূল্যায়ন আৰু নিয়ন্ত্ৰণ প্ৰক্ৰিয়া শক্তিশালী কৰাটো প্ৰয়োজনীয়। সেয়েহে উচ্চতম ন্যায়ালয়ে কমিটীৰ সদস্য হিচাপে বিশেষজ্ঞক নিযুক্তি দি দেশৰ বিনিয়োগকাৰীক আস্থা প্ৰদান কৰিব বিচাৰিছে।
তদন্ত সমিতিৰ অন্যতম সদস্য ওমপ্ৰসাদ ২০০৬ চনৰ পৰা ২০১১ চনলৈকে ষ্টেট বেংকৰ অধ্যক্ষ আছিল। বেংকিং ব্যৱস্থাৰ সৈতে জড়িত বহু লোকে কয় যে এই চৰকাৰী বেংকটোৱে সেই সময়ত একাধিক প্ৰতিকূলতাৰ সন্মুখীন হৈছিল। তেওঁলোকে ওমপ্ৰসাদক দৃঢ় হাতেৰে মোকাবিলা কৰাৰ কৃতিত্ব দিয়ে। অল ইণ্ডিয়া বেংক এছ’চিয়েশ্যনৰ প্ৰাক্তন সভাপতি ওমপ্ৰকাশে বৰ্তমান কেইবাটায়ো বহুজাতিক কোম্পানীৰ পৰিচালক আৰু পৰামৰ্শদাতা হিচাপে কাম কৰি আছে। কমিটীৰ আন এজন সদস্য নিলেকানী দেশৰ উদ্যোগ মহলত পৰিচিত নাম। তথ্য প্ৰযুক্তি প্ৰতিষ্ঠান ইনফ’ছিছৰ সহ-প্ৰতিষ্ঠাপক নিলেকানীক বহুতে আধাৰ কাৰ্ডৰ অন্যতম পিতৃ বুলি গণ্য কৰে। তেওঁ ২০১৪ চনলৈকে ইউআইডিএআইৰ অধ্যক্ষ হিচাপেও কাৰ্যনিৰ্বাহ কৰিছিল, যিটো সংস্থাই দেশৰ নাগৰিকৰ সকলো তথ্য নথিভুক্ত কৰি আধাৰ কাৰ্ড তৈয়াৰ কৰাৰ দায়িত্ব দিয়া হৈছিল। কমিটীৰ অন্যতম সদস্য ন্যায়াধীশ দেৱদত্তই দীৰ্ঘদিন ধৰি শ্বেয়াৰ এণ্ড ইনভেষ্টমেণ্ট ট্ৰিবিউনেলৰ মুৰব্বী হিচাপে কাৰ্যনিৰ্বাহ কৰি আহিছে। অৱসৰপ্ৰাপ্ত ন্যায়াধীশ ছাপ্ৰা গুৱাহাটী উচ্চ ন্যায়ালয় আৰু মণিপুৰ উচ্চ ন্যায়ালয়ৰ মুখ্য ন্যায়াধীশ আছিল। ২০১৯ চনত তেওঁ উচ্চতম ন্যায়ালয়ৰ অন্যতম ন্যায়াধীশ হিচাপে অৱসৰ গ্ৰহণ কৰে। কাবেৰী পানী বিতৰণ গোচৰকে ধৰি কেইবাটাও গুৰুত্বপূৰ্ণ গোচৰৰ ৰায়দানৰ সৈতে তেওঁ জড়িত হৈ আছে।
উচ্চতম ন্যায়ালয়ে গঠন কৰা কমিটীৰ অন্যতম সদস্য কামাথেও কেৰিয়াৰৰ সময়ছোৱাত কেইবাটাও বেংক আৰু বিত্তীয় প্ৰতিষ্ঠানৰ শীৰ্ষ পদবীত কার্যনিবাহ কৰিছিল। ব্ৰিকছ দেশসমূহৰ বাবে সৃষ্টি কৰা নিউ ডেভেলপমেণ্ট বেংকৰ উপৰিও কামথে ইনফ’ছিছ আৰু ব্যক্তিগত বেংক আইচিআইচিআই বেংকৰ অধ্যক্ষ হিচাপেও কাৰ্যনিৰ্বাহ কৰিছিল। ৰাষ্ট্ৰীয় ষ্টক এক্সচেঞ্জ আৰু এছিয়ান ডেভেলপমেণ্ট বেংকৰ পৰিচালনা সমিতিৰ মূল সদস্য হিচাপে তেওঁৰ বিস্তৃত অভিজ্ঞতা আছে। কমিটীৰ আন এজন সদস্য হৈছে শ্বেয়াৰ মাৰ্কেটৰ বিশেষজ্ঞ সুন্দৰচন। তেওঁ সাংবাদিক হিচাপে নিজৰ কেৰিয়াৰ আৰম্ভ কৰিছিল যদিও পিছলৈ বিভিন্ন বহুজাতিক কোম্পানীত ইকুইটি কনচালটেণ্ট হিচাপে কাম কৰিছিল।
