১৯৫৯ চনত আৰম্ভ হোৱা ভাৰতীয় দূৰদৰ্শনত হিন্দী আৰু ইংৰাজী দুয়োটা ভাষাতে পঢ়া বাতৰি শুনিবলৈ সমগ্ৰ দেশবাসীয়ে দিনটো অপেক্ষা কৰিছিল। গধূলিৰ বাতৰিত দিনটোত ঘটি যোৱা দেশ আৰু বিদেশৰ সামগ্ৰিক পৰিস্থিতিৰ বিষয়ে জনোৱা হৈছিল।
বাতৰি শুনাৰ লগতে সেই সময় খিনিৰ মূখ্য আৰ্কষণ আছিল মহিলা নিউজ এংকৰ কেইগৰাকী। অত্যন্ত অমায়িক, সাৱলীল ভাষা আৰু শুদ্ধ উচ্চাৰণেৰে পঢ়া বাতৰি সমূহ শুনি শুনি এংকৰ কেইগৰাকীক ঘৰৰে কোনোবা আপোন যেন লগা হৈছিল।
ৰিণি চাইমন খান্না, কৌমল সিং, সাধনা শ্ৰীৱাস্তৱ, গীতাঞ্জলী আয়াৰ আদি আটাইকেইগৰাকী মহিলা এংকৰৰ বাতৰি পঢ়াৰ নিজস্ব শৈলীৰ লগতে আছিল শক্তিশালী ব্যক্তিত্ব। তেওঁলোকে পিন্ধা শাৰী,ডিঙিলৈকে ঢাক খোৱা ডাঠ কাপোৰৰ ব্লাউজ, ধুনীয়াকৈ কটা চুলিৰ ষ্টাইল আদি সকলো মিলি জনমানসত তেওঁলোকৰ প্ৰত্যেকগৰাকীয়েই এক সুকীয়া স্থান দখল কৰিছিল।
বাতৰি পঢ়াৰ বাহিৰেও অন্যান্য অনুষ্ঠানবিলাক পৰিৱেশন কৰা সেই সময়ৰ মহিলা টিভি এংকৰ সকলে কোনো কথাতে উচ্চবাচ্য নকৰি বৰ অমায়িক ভাৱে কথোপকথন আগবঢ়াই নিছিল। সাক্ষাৎকাৰ গ্ৰহণ কঁৰোতেও আমন্ত্ৰিত অতিথি সকলৰ সতে বাৰ্তালাপ আছিল ভদ্ৰ, নম্ৰ। অতি বিনম্ৰতাৰে প্ৰশ্নবোৰ সুধিছিল। ৮০-৯০ দশকৰ এইসকল নিউজ এংকৰে ফিল্মফেয়াৰ এৱাৰ্ড আদি অনুষ্ঠান সমূহত ঘোষিকাৰ দায়িত্ব পালন কৰি তেওঁলোকৰ একক পৰিচয় বহন কৰিছিল।
গুৱাহাটী দূৰদৰ্শনত অসমীয়া বাতৰি পৰিবেশন কৰা বিজু ভঁৰালী, আৰতি কলিতা, কাশ্মীৰি শইকীয়া আদি ৰো আছিল সুকীয়া পঠন শৈলী আৰু ব্যক্তিত্ব।
বাতৰি একোটাৰ প্ৰতি দৰ্শকৰ আগ্ৰহ বঢ়াবলৈ পঢ়োতা জনৰ ব্যক্তিত্বই গুৰুত্ব বহন কৰে। শুদ্ধ উচ্চাৰণৰ লগতে সাজপাৰ আৰু শাৰিৰীক ভাষা হ’ব লাগে মাৰ্জিত। কেৱল কোট টাই পিন্ধিলেই বাতৰি পৰিৱেশনৰ যোগ্যতা অৰ্জন নকৰে। বিশেষকৈ উচ্চস্বৰত কথা কোৱা, আমন্ত্ৰিত অতিথিক ষ্টুডিঅ’ত যি টি প্ৰশ্নবানেৰে অভদ্ৰামি কৰাৰ দৰে ব্যৱহাৰে নিউজ এংকৰৰ প্ৰতি দৰ্শকৰ থাকিবলগা আস্থা হেৰুৱায়।
পৃথিবী বিখ্যাত বাতৰি উদ্যোগ সমূহৰ পৰা বিশেষকৈ অসমীয়া বাতৰি পৰিৱেশক সকলে শিকিব লগা বহু কথা আছে। পৃথিবীৰ আন প্ৰান্তলৈ নগৈ ভাৰতীয় দূৰদৰ্শনত শাৰী পিন্ধি বাতৰি পঢ়া মহিলা কেইগৰাকীক আমি নিশ্চয়কৈ অনুকৰণ কৰিব পাঁৰো।বাতৰি পঢ়োতে শাৰী নিপিন্ধিলেও অন্তত তেওঁলোকৰ ব্যক্তিত্বক আমি নিৰীক্ষণ কৰা উচিত। আমি চাব পাৰো তেওঁলোকৰ এনেকুৱা কি প্ৰকাশভংগী আছিল যে আধাঘণ্টা সময় একেৰাহে বহি মানুহে তেওঁলোকে পঢ়া বাতৰি শুনিছিল। কেৱল সেইয়াই নহয়, দ্বিতীয় দিনাও দূৰদৰ্শনৰ সন্মুখত দৰ্শক বহি থাকিছিল তেওঁলোকক শুনিবলৈ। কেৱল বাতৰিৰ বতৰাৰে নহয়, তেওঁলোকৰ ব্যক্তিত্বইও ধৰি ৰাখিছিল দেশৰ সমগ্ৰ দৰ্শকক।
সেয়ে দূৰদৰ্শনৰ নাম লোৱাৰ লগে লগে ভাঁহি আহে মেলি লোৱা আচঁলেৰে শাৰী পৰিহিতা কেইগৰাকী মান বিশেষ মহিলা, যি কেইবা দশকজুৰি ভাৰতীয় নিউজ ওৱৰ্লডৰ হিৰ’ইন হৈ আছিল। আজিও একে আছে তেওঁলোকৰ একক ইমেজ।
