ৰকষ্টক এণ্টাৰটেইনমেণ্টছ শীৰ্ষক ইউটিউব চেনেলত বৰ্তমান সম্প্ৰচাৰিত হৈ থকা বিদুৰ ভাই শীৰ্ষক অসমীয়া ৱেব চিৰিজখনে সামাজিক মাধ্যমত খলকনি তুলিবলৈ সক্ষম হৈছে। সকলোৰে মুখে মুখে এতিয়া বিদুৰভাই।
চুমকী কছাৰী, পংকজ মহন্ত, ঊজ্জল ৰাজখোৱা, নীতু খনিকৰ আদি নবাগত অভিনেতা অভিনেত্ৰীৰ দ্বাৰা অভিনীত ৱেব ছিৰিজখনৰ কাহিনী, সংলাপ, কথোপকথন, কথনভংগী সকলোখিনি বৰ সৰল আৰু সাৱলীল। গাঁৱৰ সঁচা জীৱন প্ৰতিফলিত কৰিবলৈ সক্ষম হৈছে।
নিবনুৱাৰ চিন্তা, কভিদে জুৰুলা কৰা গ্ৰাম্য অৰ্থনীতি তথা বিধস্ত জনজীৱনৰ এখন বাস্তৱ ছবি অংকন কৰিছে। ইয়াৰ উপৰিও মাইক্ৰ’ফাইনেঞ্চৰ ঋণ গ্ৰহণৰ ফলত সলনি হোৱা গাঁৱৰ মহিলাসকলৰ ছবিখন বৰ সুন্দৰকৈ ফুটাই তুলিবলৈ সক্ষম হৈছে।
মিৰ্জাপুৰ, পঞ্চায়ত, ক্ৰিমিনেল জাষ্টিচ, আৰ্য্যা আদি হিন্দী ৱেব ছিৰিজৰ ব্যাপক চৰ্চাৰ পিছত প্ৰথমবাৰৰ বাবে বিদুৰ ভাই শীৰ্ষক অসমীয়া ৱেব ছিৰিজ এখনে ইমান আদৰ পাবলৈ সক্ষম হৈছে। মাত্ৰ তিনিটা খণ্ড সম্প্ৰচাৰ হওতেই ইমান আদৰ লাভ কৰিবলৈ সক্ষম হোৱা কথাটো অসমীয়া ধাৰাবাহিক আৰু ছবি উদ্যোগৰ বাবে অতি ভাল খবৰ।
সততে এটা অভিযোগ উত্থাপন হয় যে অসমীয়া মানুহে অসমীয়া ছবি বা কাহিনী নাচায়। এই কথাষাৰ বিদুৰ ভায়ে মিছা প্ৰমাণিত কৰিলে। আচলতে বাস্তৱ পটভূমিত আধাৰিত অকনো খোকোজা নলগাকৈ প্ৰাকৃতিক অভিনয়ে সকলোৰে মন আকৰ্ষণ কৰে, যিসমূহ কথা সাধাৰণতে অসমীয়া ধাৰাবাহিক বা ছবিসমূহত দেখিবলৈ পোৱা নাযায়।
বলিউড বা একতা কাপুৰক অনুকৰণ কৰি উত্তৰ ভাৰতীয় সমাজ ব্যৱস্থাৰ ছবি প্ৰতিফলিত কৰা অসমীয়া ধাৰাবাহিকসমূহক আদৰ নল’লেও কোনেও আপত্তি কৰিব নোৱাৰে। নিভাঁজ অসমীয়া ভাষা, সংস্কৃতি, সমাজ দেখুৱাবলৈ অক্ষম হোৱা ছবি বা ধাৰাবাহিকসমূহৰ আদৰ নাই।
কিন্তু বিদুৰ ভাইৰ দৰে নিভাঁজ ছবি এখন দাঙি ধৰিব পৰা ছবি বা ধাৰাবাহিকে এই আদৰ নিশ্চয় লাভ কৰিবলৈ সক্ষম হ’ব। বিদুৰ ভাই শীৰ্ষক ধাৰাবাহিকখন অসমীয়া ধাৰাবাহিক উদ্যোগৰ নতুন দিশ উন্মোচন কৰাৰ ক্ষেত্ৰত বাটকটীয়া হোৱাৰ থল আছে। বিদুৰ ভাইৰ জনপ্ৰিয়তাই ভৱিষ্যতৰ ধাৰাবাহিক আৰু ছবি নিৰ্মাতাসকলক সচেতন হ’বলৈ উদগণি যোগাব বুলি আমি আশাবাদী।
