নীতা চক্ৰৱৰ্তী
প্ৰেম কি? প্ৰেম কিয় হয়? ইয়াৰ সঠিক সংজ্ঞা দিয়াটো কঠিন। প্ৰেমৰ বিষয়ে বিভিন্নজনে বিভিন্ন মত আগবঢ়াইছে যদিও সহজ ভাষাৰে প্ৰেম এক স্বৰ্গীয় অনুভূতি। প্ৰেম মানসিক অনুভৱ।
মহাভাৰতত নাৰী প্ৰেম বুলিলে আমি বহুকেইটা চৰিত্ৰৰ বিষয়ে জানো যদিও মূল চৰিত্ৰৰ উপৰিও কিছুমান সাধাৰণ চৰিত্ৰতো সুন্দৰ প্ৰেমৰ নিদৰ্শন দেখিবলৈ পাওঁ।
জতুগৃহৰ পৰা পলায়ন কৰাৰ পাছত, অৰণ্যৰ মাজত যেতিয়া কুন্তীদেৱী আৰু চাৰিজন পাণ্ডৱ নিদ্ৰিত অৱস্থাত আছিল তেতিয়া ভীম আছিল জাগ্ৰত অৱস্থাত। কাষৰ শাল গছৰ ডালত বহি আছিল হিড়িম্ব নামৰ এক ৰাক্ষস। ভীষণ আকৃতিৰ হিড়িম্বই পাণ্ডৱসকলক দেখা পালে। মানুহৰ গোন্ধ পাই হিড়িম্বই ভনীয়েক হিড়িম্বাক ক’লে, “বহুদিনৰ পিছত আজি আমি মানুহৰ গোন্ধ পাইছোঁ। মানুহৰ মাংসৰ লোভত মোৰ জিভাৰ পানী ওলাইছে”। হিড়িম্বই ভনীয়েকক নিৰ্দেশ দিলে, ” সিহঁতক বধ কৰি মোৰ ওচৰলৈ লৈ আহ”।
“প্ৰথম দৃষ্টিত প্ৰেম” বুলি এক চিৰকলীয়া কথা আছে। ভীমক দেখা মাত্ৰকে হিড়িম্বাৰ মনত প্ৰেম অনুভৱ হ’ল। হিড়িম্বাৰ দৃষ্টিত ভীমৰ ৰূপ হ’ল, “প্ৰয়াগৰ বটবৃক্ষৰ দৰে দীৰ্ঘ আৰু স্থূল, সিংহৰ দৰে কান্ধ, উজ্বল কান্তি, শঙ্খৰ দৰে গ্ৰীৱা আৰু পদ্মৰ দৰে চকু। এই বলিষ্ঠ পুৰুষেই মোৰ উপযুক্ত স্বামী হ’ব। এই কথা ভাবি হিড়িম্বাই এক মোহিনী ৰূপ ধৰি ভীমৰ সন্মুখত উপস্থিত হ’ল।”
হিড়িম্বাই ভীমক প্ৰতিশ্ৰুতি দিলে যে তেওঁ ৰাক্ষসৰ হাতৰ পৰা কুন্তী আৰু পাণ্ডৱক ৰক্ষা কৰিব। ভীম আৰু ৰাক্ষসৰ মাজত ভয়ানক যুদ্ধত হিড়িম্বৰ মৃত্যু হ’ল। হিড়িম্বাই তেওঁলোকক আন এখন মহানগৰীলৈ লৈ গ’ল। কুন্তী আৰু যুধিষ্ঠিৰৰ আজ্ঞা মতেই ভীম আৰু হিড়িম্বাৰ বিবাহ সম্পন্ন হ’ল।
কুৰুক্ষেত্ৰৰ ধৰ্ম যুদ্ধত ভীমক সহায় কৰিবলৈ হিড়িম্বাই তেওঁলোকৰ পুত্ৰ ঘটোৎকচক হস্তিনাপুৰলৈ পঠিয়াই দিলে। যুদ্ধত ঘটোৎকচৰ মৃত্যু হয়। ৰাজপ্ৰসাদৰ ঐশ্বৰ্যময় জীৱন উপভোগ নকৰি বনতে থাকি ভীমৰ প্ৰতি প্ৰেমৰ যি ত্যাগ সেই মহানতাক আমি সন্মান কৰিবই লাগিব।
