এইকেইদিন বাতৰিবোৰত কেৱল ইউক্ৰেইনৰ চৰ্চা আৰম্ভ হৈছে। চৰ্চা হোৱা কথাটোৰ উৎস হৈছে ৰাছিয়া। ৰাছিয়াৰ ৰাষ্ট্ৰপতি ভ্লাডিমিৰ পুটিনে দীৰ্ঘসময় ধৰি মানে প্ৰায় দুটা দশক শাসনত থকাৰ লগতে আৰু এটা দশক শাসনত থকাৰ নিশ্চিতি প্ৰদান কৰাৰ ফলত তেওঁৰ শাসনত স্বৈৰাচাৰী চৰিত্ৰ লাহে লাহে পৰিস্ফুট হৈ পৰিছে। ইয়াৰে অংশস্বৰূপে এতিয়া ভ্লাডিমিৰ পুটিনে (ৰাছিয়া নহয়) নিজা উদ্যোগত আগ্ৰাসনৰ পৰিচয় দি ইউক্ৰেইন আক্ৰমণ কৰিছে। এই আক্ৰমণত স্বয়ং পুটিনৰ সমালোচক (যি জেলত আছে) আৰু সাধাৰণ নাগৰিকে ৰাজপথলৈ আহি প্ৰতিবাদ জনাইছে আৰু জেললৈ যাবলগীয়া হৈছে। ৰাছিয়াৰ অভ্যন্তৰত অসন্তুষ্টিৰ মাত্ৰা বৃদ্ধি পাইছে। কিন্তু প্ৰশাসনযন্ত্ৰক নিজৰ দখলত ৰাখি পুটিন জনপ্ৰিয়তাৰ শীৰ্ষত আছে।
পূৰ্বৰ ছোভিয়েট সংঘৰ পৰা ফালৰি কাটি ১৯৯১ চনত স্থাপন হোৱা ইউক্ৰেইনৰ চৰিত্ৰ ৰুছ। এই দেশখনৰ মূল ভাষা ইউক্ৰেনিয়ান যদিও এই দেশৰ অধিকাংশ নাগৰিকে ৰুছ ভাষা জানে। অৱশ্যে ভাষা এটা মূল উপাদান নহয়, কিন্তু ইউক্ৰেইন দেশখনে ইউৰোপৰ সৈতে সংযুক্ত হৈ পৰা তথা নাটো বাহিনীৰ সৈতে জড়িত হৈ ইউক্ৰেইনত নাটো ঘাটি স্থাপন কৰা কথাটোক পুটিনে গ্ৰহণ কৰিব পৰা নাছিল। সেয়েহে প্ৰথমে দেশখনত থকা বিচ্ছিন্নতাবাদী উগ্ৰপন্থী সংগঠনবোৰক সহায় কৰি পুটিনে অচলাৱস্থাৰ সৃষ্টি কৰাৰ পাছত এতিয়া ক্ৰমাণ্বয়ে দেশখনত এপিনৰ পৰা আনপিনলৈ অঞ্চলসমূহ অধিকাৰ কৰি গৈছে। এই যুদ্ধৰ বাবে তিনিগৰাকী ব্যক্তিক জগৰীয়া কৰিব পাৰি। তেওঁলোক হৈছে ৰাছিয়াৰ ৰাষ্ট্ৰপতি ভ্লাডিমিৰ পুটিন, আমেৰিকা যুক্তৰাষ্ট্ৰৰ ৰাষ্ট্ৰপতি জ’ বাইডেন আৰু ইউক্ৰেইনৰ ৰাষ্ট্ৰপতি জেলেনেস্কি।
যদিহে কূটনৈতকতাৰ দিশত এই তিনিওগৰাকী ৰাষ্ট্ৰনেতাই সফল হ’লহেঁতেন তেতিয়াহ’লে আজি শতাধিক নিৰীহ লোকৰ প্ৰাণ নগ’লহেঁতেন। বিশ্বত এতিয়া অনেক বিবাহ কূটনৈতিকভাৱে সমাধা হৈ আহিছে। কিন্তু ইউক্ৰেইনৰ ক্ষেত্ৰত ইতিহাস এই কথাটোক লৈ সাক্ষী হৈ থাকিব যে এই দেশখন বিপদত পৰাৰ সময়ত তেওঁলোকক সহায় কৰিবলৈ বা ৰাছিয়াপ বিপক্ষে থিয় দিবলৈ কোনো অন্য দেশ সাজু হোৱা নাই। এফালে মানৱতাৰ বৈধ্যভূমিক পৰিণত হোৱা ইউক্ৰেইনক লৈ এতিয়া ৰাষ্ট্ৰসংঘৰ মজিয়া, ইউৰোপ ইউনিউন আদিবোৰ আন্তঃৰাষ্ট্ৰীয় সংঘ কেৱল কথা-বতৰাতহে ব্যস্ত হৈ থকা দেখা গৈছে। আনহাতে অভিনয় জগতৰ (কৌতুক অভিনেতা) পৰা ৰাজনীতিলৈ অহা ইউক্ৰেইনৰ ৰাষ্ট্ৰপতি জেলেনেস্কিয়ে কূটনৈতিকভাৱে বিবাদ সমাধানত বিফল হোৱাৰ পাছত এতিয়া যুদ্ধবিৰতিৰ ঘোষণা কৰাৰ সলনি নায়কোচিত ব্যৱহাৰ কৰি সেনাৰ সৈতে বা নাগৰিকৰ সৈতে থিয় হৈ দেশ ৰক্ষাৰ বাবে মিডিয়াত বক্তব্য ৰাখিছে (ফটো উঠিছে)। কিন্তু যুদ্ধত নাগৰিকৰ মৃত্যুৰ হিচাপ ল’বলৈ কাৰো আহৰি নাই।
এই যুদ্ধৰ সমান্তৰালকৈ ভাৰত তথা অসমৰ কথাও প্ৰসংগলৈ আহিছে। বিশেষত মেডিকেল শিক্ষাৰ বাবে পঢ়িবলৈ যোৱা প্ৰায় ১৯ হাজাৰ ভাৰতীয় শিক্ষাৰ্থীৰ বিষয়টো এই যুদ্ধৰ আৰম্ভণিৰ পৰা সংবাদ শিৰোনাম দখল কৰি আহিছে। ভাৰতত পৰ্যান্ত আসন নথকাৰ বাবে বা ইয়াত আসন সংৰক্ষণ কৰিব নোৱাৰি আৰু লগতে তুলনামূলকভাৱে অন্য দেশতকৈ সস্তীয়া মেডিকেল শিক্ষা উপলব্দ ইউক্ৰেইনত পূৰ্বৰে পৰা ভাৰতীয় শিক্ষাৰ্থী পঢ়িবলৈ গৈ আছিল। ভাৰতীয় বৈদেশিক মন্ত্ৰণালয়ে ইতিমধ্যে এই শিক্ষাৰ্থীসকলক সহায় কৰাৰ বাবে ‘অপাৰেশ্বন গংগা’ আৰম্ভ কৰিছে। ইউক্ৰেইনৰ পৰা ইতিমধ্যে একাধিক শিক্ষাৰ্থীক উদ্ধাৰ কৰি অনা হৈছে। ইয়াৰ ভিতৰত অসমীয়া শিক্ষাৰ্থীও আছে।
শেহতীয়াকৈ ইউক্ৰেইনত যুদ্ধৰ দাবানলৰ মাজত এগৰাকী ভাৰতীয় শিক্ষাৰ্থীৰ মৃত্যু হোৱাৰ পাছত যুদ্ধৰ শৰণাৰ্থীৰ বিষয়টোৱে দেশত গুৰুত্ব লাভ কৰিছে।
