অলপতে চাৰ্ভেত সংঘটিত হোৱা বৃদ্ধ দম্পতিৰ লোমহৰ্ষক হত্যাকাণ্ডই ৰাজ্যজুৰি চাঞ্চল্যৰ সৃষ্টি কৰিছে। বিশ্বাসী কেয়াৰ টেকাৰৰ হাতত বৃদ্ধ দম্পতীহালৰ মৃত্যু হোৱাত বহুতো লোকে সন্তানক জগৰীয়া কৰিছে।
কিন্তু বৰ্তমান সময় সলনি হৈছে। কেৱল ঘৰতে আবদ্ধ হৈ থাকিলে আজিৰ যুগত এজন মানুহৰ বাবে ভাত মুঠি যোগাৰ কৰাই অসম্ভৱ হৈ পৰিব। তেনেস্থলত ঘৰৰ বাহিৰলৈ সংস্থাপন বিচাৰি যাবলৈ সন্তান বাধ্য। পিতৃ মাতৃৰ সময়ত চিকিৎসাৰ বাবে অৰ্থৰ যোগান ধৰিবলৈও এটা সংস্থাপন লাগে।
সন্তান ঘৰত নাথাকিলেও সন্তানৰ ওচৰত গৈ থকাও সকলো মাক দেউতাকৰ বাবে সম্ভৱ নহয়। কষ্টৰে সাজি উলিওৱা ঘৰ বাৰী এৰি সন্তানৰ সৈতে কংক্ৰিটৰ জীৱন এটা উদযাপন কৰাতকৈ অকলশৰে থাকিয়েই ভাল পায়। এই ক্ষেত্ৰত সন্তানো নিৰূপায়। তেনে ক্ষেত্ৰত বৃদ্ধাশ্ৰমৰ দৰে এক সুন্দৰ ব্যৱস্থাৰ প্ৰয়োজন।
বৃদ্ধসকল অতীজৰে পৰা উপেক্ষিত হৈ আহিছে। ভৰপূৰ পৰিয়াল এটাত থাকিও বহুতো বৃদ্ধ লোক যেন অসম্পূৰ্ণ! প্ৰতিযোগিতাৰ দৌৰত ব্যস্ত সন্তানৰ হাতত সময় কম থকা বৰ্তমান সময়ৰ এটা স্বাভাৱিক কথা। কেৱল পুষ্টিকৰ খাদ্য, ভাল কাপোৰ, সময়ে সময়ে স্বাস্থ্য পৰীক্ষাই বৃদ্ধসকলৰ বাবে যথেষ্ট নহয়। তেওঁলোককো মন খুলি কথা পাতিবলৈ, সময় অতিবাহিত কৰিবলৈ মনৰ পচন্দৰ এক পৰিৱেশৰ প্ৰয়োজন। বহুতো বৃদ্ধ লোক নাতি নাতিনীৰ দায়িত্ব পালন কৰি কোঙা হৈ পৰাও দেখা যায়।
বৃদ্ধাশ্ৰমে বৃদ্ধসকলৰ এক নতুন জীৱন দিয়াত সহায় কৰিব। কিন্তু বৃদ্ধাশ্ৰমৰ প্ৰতি মানুহৰ ধাৰণা আমাৰ সমাজত আজিও বৰ সংকীৰ্ণ। সন্তানে অত্যাচাৰ কৰি খেদি দিয়া মাক দেউতাকহে বৃদ্ধাশ্ৰমত থাকে বুলি ধাৰণা কৰে। এনে চিন্তাই বৃদ্ধাশ্ৰমৰ বিকাশত সহায় কৰাত ব্যৰ্থ হয়।
বৃদ্ধাশ্ৰম বৃদ্ধ সকলৰ বাবে এক কথাত আশীৰ্বাদ। কেৱল ভৰপূৰ পৰিয়াল এটাত বৃদ্ধ এজনক সুখ দিব পাৰিব বুলি কৰা ধাৰণা সদায় সঁচা প্ৰমাণিত নহ’বও পাৰে। এখন মুকলি আকাশ বৃদ্ধসকলকো লাগে। চৰকাৰে বৃদ্ধাশ্ৰম নিৰ্মাণত গুৰুত্ব আৰোপ কৰি বৃদ্ধসকলক এখন মুকলি আকাশ প্ৰদান কৰিলে তেওঁলোকৰ সুবিধা হ’ব।
