নিশাটো পাৰ হ’লেই সেই মাহেন্দ্ৰ ক্ষণ ৷ বুধবাৰে সন্ধিয়া চন্দ্ৰৰ দক্ষিণ মেৰুত অৱতৰণ কৰিব ভাৰতৰ চন্দ্ৰযান-৩। ইতিহাস ৰচনা কৰিবলগীয়া সেই স্বর্ণিল মুহুর্তলৈ দেশবাসীয়ে অপেক্ষা কৰি আছে। সমগ্ৰ বিশ্বৰে চকু এতিয়া ভাৰতীয় মহাকাশযানখনৰ ওপৰত । অৱতৰণৰ পূর্বে ভাৰতীয় চন্দ্ৰযানে চন্দ্ৰৰ আন এখন প্ৰতিচ্ছবি প্ৰেৰণ কৰিছে । ভাৰতীয় মহাকাশ গৱেষণা সংস্থাই (ISRO) সেই ছবিখন মঙলবাৰে এক্স হেণ্ডেল (টুইটাৰ)ত শ্বেয়াৰ কৰে।
চন্দ্ৰযানৰ ‘লেণ্ডাৰ পজিচন ডিটেকচন কেমেৰা’ই চন্দ্ৰপৃষ্ঠৰ পৰা প্ৰায় ৭০ কিলোমিটাৰ ওপৰৰ পৰা ফটো তুলিছিল। ছবিখনত ধূসৰ গোলকটোত উখহি উঠা চিন দেখা গৈছে। ছবিখন ১৯ আগষ্টত তুলিছিল চন্দ্ৰযান ৩ য়ে। ইয়াৰ পূৰ্বে চন্দ্ৰযান ৩ য়ে চন্দ্ৰৰ ছবি প্ৰেৰণ কৰিছিল। ইছৰোৱেও সেই ছবিখন দেশবাসীৰ সৈতে শ্বেয়াৰ কৰিছিল।
চন্দ্ৰযান ৩ৰ লেণ্ডাৰ ‘বিক্ৰম’ বুধবাৰে সন্ধিয়া ৬:০৪ বজাত চন্দ্ৰৰ দক্ষিণ মেৰুত অৱতৰণ কৰিব। মঙলবাৰে ইছৰ’ই জনোৱা মতে, অৱতৰণৰ সময়ত কোনো সালসলনি কৰা হোৱা নাই। অৰ্থাৎ নিৰ্দিষ্ট সময়ত বিক্ৰমক চন্দ্ৰৰ মাটিলৈ নমাই অনা হ’ব। ইয়াৰ পূৰ্বে কোনো দেশে চন্দ্ৰৰ দক্ষিণ মেৰুলৈ মহাকাশযান প্ৰেৰণ কৰা নাই। ফলত বুধবাৰৰ পৰীক্ষাত ইছৰো সফল হ’লে ভাৰতে ইতিহাসৰ সৃষ্টি কৰিব।
ভাৰতে ২০১৯ চনত চন্দ্ৰযান ২ পঠিয়াইছিল। কিন্তু সফল নহ’ল। মহাকাশযানখন চন্দ্ৰপৃষ্ঠত দুৰ্ঘটনাগ্ৰস্ত হয়। ইছৰো এইবাৰ অতীতৰ ভুলবোৰ শুধৰাবলৈ অতি সাৱধানতা অৱলম্বন কৰিছে । চন্দ্ৰৰ দক্ষিণ মেৰুত অৱতৰণ কৰাটো ইছৰ’ৰ বাবে এক ডাঙৰ পৰীক্ষা। চৰাইৰ পাখিৰ দৰে কোমলকৈ বিক্ৰমক চন্দ্ৰৰ মাটিলৈ নমাই আনিব লাগে। বিজ্ঞানৰ ভাষাত, যিটো ‘কোমল অৱতৰণ’ বুলি জনা যায়। যোৱা দেওবাৰে ৰাছিয়াই চন্দ্ৰৰ সেই অংশত এখন মহাকাশযান অৱতৰণ কৰাত ব্যৰ্থ হৈছিল। চন্দ্ৰৰ পৃষ্ঠত লুনা-২৫ দুৰ্ঘটনা। ফলত চন্দ্ৰ অভিযানত সফলতা এতিয়া ভাৰতৰ বাবে এক অধ্যায়।
ইছৰোৰ ৱেবছাইট, ফেচবুক পেজ, ইউটিউবত লাইভ টেলিকাষ্ট কৰা হ’ব চন্দ্ৰযান ৩ৰ লেণ্ডিং। বুধবাৰে সন্ধিয়া ৫.২০ বজাৰ পৰা আৰম্ভ হ’ব পোনপটীয়া সম্প্ৰচাৰ।
