আজি লোকপ্ৰিয় গোপীনাথ বৰদলৈৰ স্মৃতি দিৱস । তেওঁ আছিল দেশৰ স্বাধীনতাৰ পিছত অসমৰ প্ৰথমগৰাকী মুখ্যমন্ত্ৰী আৰু ভাৰতৰ স্বাধীনতা আন্দোলনৰ এগৰাকী আগশাৰীৰ নেতা । ১৯৪৬ চনত ব্ৰিটিছ চৰকাৰে ভাৰতৰ স্বাধীনতাৰ দাবী সন্দৰ্ভত গঠন কৰি দিয়া কেবিনেট মিছনে মুছলিম লীগৰ সৈতে আলোচনা মৰ্মে অসমক পূৰ্ব বংগৰ (বৰ্তমানৰ বাংলাদেশ) সৈতে চামিল কৰিবলৈ লোৱা গ্ৰুপিং আঁচনিৰ তীব্ৰ বিৰোধিতা কৰি তেওঁ অসমক ভাৰতৰ সৈতে ৰখাত বিশেষ ভূমিকা পালন কৰিছিল । তেওঁ ১৯৪৬ চনৰ ১১ ফেব্ৰুৱাৰীৰ পৰা ১৯৫০ চনৰ ৬ আগষ্টলৈ অসমৰ মুখ্যমন্ত্ৰী হিচাপে কাৰ্যনিৰ্বাহ কৰে । ইয়াৰ পূৰ্বে তেওঁ ১৯৩৮ চনৰ ২১ ছেপ্তেম্বৰতো অসমৰ মুখ্যমন্ত্ৰীৰ (তেতিয়াৰ প্ৰধানমন্ত্ৰী) দায়িত্বভাৰ গ্ৰহণ কৰে । তেওঁৰ মুখ্যমন্ত্ৰিত্বৰ কালতে মাটিৰ খাজনা হ্ৰাস কৰা, কানি নিবাৰণ কৰা, শিক্ষাৰ বিস্তাৰৰ বাবে বৃহৎ পুঁজি ধাৰ্য কৰা, প্ৰাথমিক শিক্ষাক বাধ্যতামূলক কৰা আদি কাৰ্য সম্পন্ন হোৱাৰ উপৰি তেওঁৰ প্ৰচেষ্টাতে গুৱাহাটী বিশ্ববিদ্যালয়, গুৱাহাটী উচ্চ ন্যায়ালয়, অসম চিকিৎসা মহাবিদ্যালয়, অসম অভিযান্ত্ৰিক মহাবিদ্যালয়, অসম কৃষি বিশ্ববিদ্যালয়, অসম ৰাজ্যিক সংগ্ৰহালয় আদি স্থাপন হৈছিল । মহাত্মা গান্ধীৰ অহিংসা নীতি আৰু নিজা বিচক্ষণতা তথা সততাৰে ৰাইজৰ সেৱা কৰা বাবে তেতিয়াৰ অসমৰ ৰাজ্যপাল জয়ৰাম দাস দৌলতৰামে তেওঁক ‘লোকপ্ৰিয়’ অভিধাৰে বিভূষিত কৰিছিল । ১৯৫০ চনৰ আজিৰ দিনটোতে গুৱাহাটীত তেওঁৰ দেহাৱসান ঘটে । এইগৰাকী জননেতালৈ আমাৰ প্ৰণাম ।
আজি বিশিষ্ট গল্পকাৰ, কবি তথা শিক্ষাবিদ মহিম বৰাৰ স্মৃতি দিৱস । শিক্ষকতাৰে কৰ্মজীৱনৰ পাতনি মেলি নগাঁও কলেজৰ পৰা অসমীয়া বিভাগৰ অধ্যাপক হিচাপে তেওঁ অৱসৰ গ্ৰহণ কৰে । আকাশবাণী গুৱাহাটীৰ গঞাৰ মেল অনুষ্ঠানটি তেওঁ ধনবৰ কাই নামেৰে পৰিচালনা কৰিছিল ।তেওঁৰ প্ৰথমটো প্ৰকাশিত গল্প আছিল ‘জইন মৰা’, বৰদৈচিলা আলোচনীত প্ৰকাশ পাইছিল । তেওঁ কিছুদিন নতুন অসমীয়া কাকতৰো সহকাৰী সম্পাদকৰ দায়িত্ব লয় । কাঠনিবাৰী ঘাট তেওঁৰ প্ৰথম গল্প সংকলন । তদুপৰি বহুভুজী ত্ৰিভুজ, ৰাতি ফুলা ফুল, এখন নদীৰ মৃত্যু আদি তেওঁৰ গল্প সংকলন । হেৰোৱা দিগন্তৰ মায়া, পুতলা ঘৰ আদি উপন্যাস । বত্ৰিশ পুতলাৰ সাধু শিশু সাহিত্য ।মোমাইৰ পদূলিত ৰাখিলোঁ ঘোঁৰা তেওঁৰ ৰম্য ৰচনা ।পদুম কুঁৱৰী, তিনিৰ তিনি গ’ল আদি নাটক । ৰঙা জিঞা তেওঁৰ কাব্য গ্ৰন্থ । ২০০১ চনত এধানি মাহীৰ হাঁহি উপন্যাসৰ বাবে তেওঁ সাহিত্য অকাডেমি বঁটা লাভ কৰে । তেওঁ অসম উপত্যকা সাহিত্য বঁটাও লাভ কৰে । তেওঁক ভাৰত চৰকাৰে পদ্মশ্ৰী সন্মানো প্ৰদান কৰে । ১৯৮৯ চনত ডুমডুমাত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । ২০১৬ চনৰ আজিৰ দিনটোতে তেওঁৰ দেহাৱসান ঘটে । সাহিত্যিকগৰাকীলৈ আমাৰ প্ৰণাম ।
