আজি কোকিলকণ্ঠী গায়িকা দিপালী বৰঠাকুৰৰ স্মৃতি দিৱস । তেওঁক অসমৰ নাইটিংগেল বুলি কোৱা হয় । ১৯৪৭ চনত তেওঁ মইনা মেলৰ যোগেদি গায়িকা হিচাপে আত্মপ্ৰকাশ কৰে । ১৯৫৭ চনত আকাশবাণী গুৱাহাটীত তেওঁৰ কণ্ঠত বাণীবদ্ধ কৰা হয় লীলা গগৈৰ ‘মোৰ বোপাই লাহৰী/নাপাইছোঁ আহৰি/বৰা জুৰিবলৈ আহে হে’ শীৰ্ষক গীতটি । আকাশবাণীৰ নিয়মীয়া শিল্পী হিচাপে পৰিৱেশন কৰা তেওঁৰ প্ৰথম গীতটি আছিল ‘বন্ধু, সময় পালে আমাৰ ফালে এবাৰ আহি যাবা’ । ১৯৫৯ চনত তেওঁ লাচিত বৰফুকন চলচ্চিত্ৰত নেপথ্য গায়িকা হিচাপে পৰিৱেশন কৰে ‘আৱেগৰ বোকোচা ব’ব মই নোৱাৰোঁ, যৌৱনে আমনি কৰে’ গীতটি । ১৯৬৯ চনত তেওঁ শেষবাৰৰ বাবে পৰিৱেশন কৰিছিল ‘লুইতে নেযাবি ঐ’ গীতটি । তাৰ পিছতে তেওঁ দুৰাৰোগ্য মটৰ নিউৰণ ৰোগত আক্ৰান্ত হৈ গীত গাব নোৱৰা আনকি লাহে লাহে চলা-ফুৰাও কৰিব নোৱৰা হৈ পৰে । ১৯৭৬ চনত তেওঁ প্ৰখ্যাত চিত্ৰশিল্পী নীলপৱন বৰুৱাৰ সৈতে বিবাহপাশত আৱদ্ধ হয় । তেওঁৰ কেইটামান জনপ্ৰিয় গীত হ’ল — সোণৰ খাৰু নালাগে মোক বিয়াৰ বাবে আই, জোনধনে জোনালীতে, কণমান বৰশীৰে চিপ, চেনাই মই যাওঁ দেই আদি । ১৯৯৮ চনত তেওঁ পদ্মশ্ৰী সন্মান লাভ কৰে । ২০১০ চনত অসম চৰকাৰৰ শিল্পী বঁটা, ২০১২ চনত আইদেউ সন্দিকৈ বঁটা লাভ কৰে । তেওঁ শিল্পী পেঞ্চনো লাভ কৰিছিল । ২০১৮ চনৰ আজিৰ দিনটোতে তেওঁৰ দেহাৱসান ঘটে । শিল্পীগৰাকীলৈ আমাৰ প্ৰণাম ।
আজি অসমৰ প্ৰথমগৰাকী মহিলা অনাতাঁৰ শিল্পী তুলতুল বৰুৱাৰ স্মৃতি দিৱস । তেওঁ এগৰাকী সাহিত্যিক আৰু সাংবাদিকো আছিল । তেওঁ কলিকতাৰ প্ৰেচিডেন্সি কলেজৰ পৰা নিউক্লিয়াৰ ফিজিক্সত প্ৰথম শ্ৰেণীৰ স্নাতকোত্তৰ ডিগ্ৰী লাভ কৰিছিল । তেওঁ সাপ্তাহিক নীলাচল কাকতৰ সহকাৰী সম্পাদক আছিল । কিশোৰ আৰু সাদিনীয়া নাগৰিকতো তেওঁ কাৰ্যনিৰ্বাহ কৰিছিল । ১৯৪৮ চনত তেওঁ প্ৰথমগৰাকী মহিলা কণ্ঠশিল্পী হিচাপে গুৱাহাটী অনাতাঁৰ কেন্দ্রৰ পৰা গীত পৰিৱেশন কৰিছিল । তেওঁ ভাৰতীয় ফিল্ম ডিভিজনৰ সৈতেও জড়িত আছিল । তেওঁ সাহিত্যিক পেঞ্চনো লাভ কৰিছিল । ২০২০ চনৰ আজিৰ দিনটোতে তেওঁ তেওঁৰ দেহাৱসান ঘটে । তেওঁ ইলোৰা বিজ্ঞান মঞ্চত তেওঁৰ মৰণোত্তৰ দেহদান কৰি থৈ গৈছে । শিল্পী, সাংবাদিকগৰাকীলৈ আমাৰ প্ৰণাম ।
