আজি বিশিষ্ট সাহিত্যিক জ্ঞানদাভিৰাম বৰুৱাৰ স্মৃতি দিৱস । লণ্ডনত আইনৰ শিক্ষা লৈ তেওঁ দেশলৈ উভতি আহি কলিকতা উচ্চ ন্যায়ালয়ত ওকালতি কৰিবলৈ লয় । পিছত অসমৰ প্ৰথমখন আইন শিক্ষাৰ অনুষ্ঠান আৰ্ল ল কলজৰ অধ্যক্ষ হয় । ১৯৩৭ চনত তেওঁ অৱসৰ গ্ৰহণ কৰে । বাঁহী, আৱাহন, ৰামধেনু আদি আলোচনীৰ যোগেদি সাহিত্য চৰ্চা কৰা জ্ঞানদাভিৰাম বৰুৱাই অসমীয়া সাহিত্য জগতখনক চহকী কৰি থৈ যোৱা গ্ৰন্থসমূহৰ ভিতৰত দদাইৰ পঁজা (Uncle Tom’s Cabin), ভেনিচৰ সাউদ (Merchant of Venice), পঞ্চৰত্ন, বিলাতৰ চিঠি, মোৰ কথা, সাহিত্য কথা, Folk Tales of Assam আদি উল্লেখযোগ্য । তেওঁ ১৯৩৩ চনত উত্তৰ লখিমপুৰত অনুষ্ঠিত অসম সাহিত্য সভাৰ চতুৰ্দশ অধিৱেশনৰ সভাপতিও আছিল । ১৯৫৫ চনৰ আজিৰ দিনটোতে তেওঁৰ দেহাৱসান ঘটে । এইগৰাকী বিশিষ্ট সাহিত্যিকলৈ আমাৰ প্ৰণাম ।
আজি সাহিত্যিক তথা বুৰঞ্জীৰ গৱেষক ডঃ সূৰ্য কুমাৰ ভূঞাৰ ওপজা দিন ।১৮৯২ চনৰ আজিৰ দিনটোতে নগাঁৱৰ ফৌজদাৰীপট্টীত তেওঁৰ জন্ম হৈছিল । শিক্ষকতাৰে তেওঁৰ কৰ্মজীৱনৰ পাতনি মেলিছিল । কিছুদিন কটন কলেজৰ অধ্যাপকো আছিল । ১৯২৮ চনত অসম চৰকাৰৰ বুৰঞ্জী আৰু পুৰাতত্ত্ব বিভাগত যোগদান কৰে । ১৯৪৮ চনত অসমৰ শিক্ষাধিকাৰ হয় । গল্প সংকলন ‘পঞ্চমী, কবিতা পুথি ‘নিৰ্মালি’ৰ উপৰি আহোমৰ বুৰঞ্জী, অসম বুৰঞ্জী, কামৰূপৰ বুৰঞ্জী, দেওধাই অসম বুৰঞ্জী আদি তেওঁৰ অমৰ কৃতি । তেওঁ গুৱাহাটী বিশ্ববিদ্যালয়ৰ উপাচাৰ্যও আছিল । কামৰূপ অনুসন্ধান সমিতিৰ সম্পাদক আছিল । তেওঁ ব্ৰিটিছ চৰকাৰৰ ৰায়বাহাদুৰ আৰু ভাৰত চৰকাৰৰ পদ্মশ্ৰী খিতাপো লাভ কৰিছিল । ১৯৫৩ চনত শ্বিলঙত অনুষ্ঠিত অসম সাহিত্য সভাৰ দ্বাবিংশ অধিৱেশনৰ তেওঁ সভাপতি আছিল । গোৱালিয়ৰত অনুষ্ঠিত ভাৰতীয় বুৰঞ্জী কংগ্ৰেছৰ আধুনিক বুৰঞ্জী শাখাৰ সভাপতি আছিল । এইগৰাকী মহান ব্যক্তিলৈ আমাৰ সশ্ৰদ্ধ প্ৰণাম ।
আজি বকুলবনৰ কবি আনন্দচন্দ্ৰ আগৰৱালাৰ স্মৃতি দিৱস । তেওঁ এগৰাকী কবি, নাট্যকাৰ তথা সাংবাদিক আছিল । সাংবাদিক হিচাপে তেওঁ কৰ্মজীৱনৰ পাতনি মেলিছিল । প্ৰথমতে ‘সাদিনীয়া অসমীয়া’ আৰু তাৰ পিছত ‘বাতৰি’ৰ সহকাৰী সম্পাদক হৈছিল । তেওঁ ভাৰতীয় বিমান বাহিনীতো সেৱা আগবঢ়াইছিল । ১৯৪৭ চনত যোৰহাটৰ আইটিআইত যোগদান কৰি ১৯৬৮ চনত অৱসৰ গ্ৰহণ কৰে । তেওঁ কলেজীয়া দিনৰে পৰাই কবিতা লিখিবলৈ লয় । ১৯৭৭ চনত ‘বকুলবনৰ কবিতা’ নামৰ কাব্য সংকলনৰ বাবে তেওঁ সাহিত্য অকাডেমি বঁটা লাভ কৰে । পৰাগ, হাফিজৰ সুৰ, পুষ্পক আদি তেওঁৰ প্ৰকাশিত গ্ৰন্থ । ১৯৬৯ চনত বৰপেটাত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । ১৯৭০ চনত ভাৰত চৰকাৰে তেওঁক পদ্মশ্ৰী সন্মান প্ৰদান কৰে । ১৯৮৩ চনৰ আজিৰ দিনটোতে তেওঁৰ দেহাৱসান ঘটে । সাহিত্যিকগৰাকীলৈ আমাৰ প্ৰণাম ।
