আজি কলংপাৰৰ কবি দেৱকান্ত বৰুৱাৰ স্মৃতি দিৱস । তেওঁ কাশী বিশ্ববিদ্যালয়ৰ পৰা ১৯৩৫ চনত ইংৰাজী বিষয়ত স্নাতকোত্তৰ ডিগ্ৰী আৰু ১৯৩৭ চনত এল এল বি ডিগ্ৰী লাভ কৰে । তেওঁ নতুন অসমীয়া কাকতৰ সম্পাদনা কৰিছিল । দৈনিক অসমীয়া কাকতৰো সম্পাদক আছিল । ১৯৪৫ চনত তেওঁ অসম প্ৰদেশ কংগ্ৰেছ কমিটীৰ সাধাৰণ সম্পাদকৰ দায়িত্ব লয় । ১৯৫০ চনত তেওঁ সৰ্বভাৰতীয় কংগ্ৰেছ কমিটীৰ সদস্য মনোনীত হয় । ১৯৫২ চনৰ প্ৰথম সাধাৰণ নিৰ্বাচনত তেওঁ লোকসভালৈ নিৰ্বাচিত হয় । ১৯৫৭ চনত তেওঁ অসম বিধানসভালৈ নিৰ্বাচিত হৈ বিধানসভাৰ অধ্যক্ষ হয় । ১৯৭১ চনত তেওঁ বিহাৰৰ ৰাজ্যপাল নিযুক্ত হয় । ১৯৭৩ চনত কেন্দ্ৰীয় পেট্ৰোলিয়াম আৰু ৰসায়ন দপ্তৰৰ মন্ত্ৰী হয় । ১৯৭৪ চনত ভাৰতীয় জাতীয় কংগ্ৰেছৰ সভাপতি নিৰ্বাচিত হয় । অসমীয়া কাব্য জগততো তেওঁৰ এক বিশেষ স্থান আছে । তেওঁক সংক্ৰান্তিকালৰ কবি বুলিও কোৱা হয় । সাগৰ দেখিছা তেওঁৰ কবিতা পুথি । ১৯৯৬ চনৰ আজিৰ দিনটোতে তেওঁৰ দেহাৱসান ঘটে । কবিগৰাকীলৈ আমাৰ প্ৰণাম ।
আজি সাহিত্যিক, সমালোচক শশী শৰ্মাৰ স্মৃতি দিৱস । ১৯৫৭ চনত তেওঁ গুৱাহাটী বিশ্ববিদ্যালয়ৰ পৰা অসমীয়া বিষয়ত স্নাতকোত্তৰ ডিগ্ৰী লাভ কৰে । বিভিন্ন বিদ্যালয়, মহাবিদ্যালয়ত শিক্ষকতা কৰাৰ পিছত ১৯৬১ চনত তেওঁ নলবাৰী মহাবিদ্যালয়ত অধ্যাপক হিচাপে যোগদান কৰে আৰু ১৯৯৩ চনত মহাবিদ্যালয়খনৰ পৰা অৱসৰ গ্ৰহণ কৰে । ১৯৪২ চনত তেওঁ নলবাৰীৰ অময়াপুৰ মজলীয়া বিদ্যালয়ৰ পঞ্চম শ্ৰেণীৰ ছাত্ৰ তথা ছাত্ৰ সভাৰ সম্পাদক আছিল আৰু তেওঁৰ নেতৃত্বতে স্কুল বৰ্জন কাৰ্যসূচী পালন কৰা হৈছিল । ১৯৫২ চনত তেওঁ য়ং ছোচিয়েলিষ্ট লীগৰ সদস্য হয় । ১৯৫৩ চনত তেওঁ ছোচিয়েলিষ্ট দলত যোগদান কৰে । তেল শোধনাগাৰ আন্দোলনত যোগদান কৰি তেওঁ চাৰে ছমাহৰ সশ্ৰম কাৰাবাসো খাটিছিল । ১৯৭৮ চনত তেওঁ মাৰ্ক্সবাদী কমিউনিষ্ট পাৰ্টীৰ সদস্য হয় । এগৰাকী সাহিত্যিক আৰু সমালোচক হিচাপে তেওঁ যথেষ্ট খ্যাতি অৰ্জন কৰিছিল । আধুনিক অসমীয়া সমাজ বিৱৰ্তনত সাহিত্যিকৰ ভূমিকা, ধৰ্ম আৰু সমাজ, অসমৰ লোক-সাহিত্য আদি তেওঁৰ প্ৰকাশিত গ্ৰন্থ । মেক্সিম গৰ্কী গ্ৰন্থৰ বাবে তেওঁ ১৯৬৮ চনত ছোভিয়েট দেশ নেহৰু বঁটা লাভ কৰিছিল । অসমৰ লোক-সাহিত্য গ্ৰন্থৰ বাবে তেওঁ অসম সাহিত্য সভাৰ সীতানাথ ব্ৰহ্মচৌধুৰী বঁটাও লাভ কৰে । ২০২০ চনৰ আজিৰ দিনটোতে তেওঁৰ দেহাৱসান ঘটে । তেওঁৰ ইচ্ছানুসৰি গুৱাহাটী চিকিৎসা মহাবিদ্যালয় আৰু চিকিৎসালয়ত তেওঁৰ মৰণোত্তৰ দেহদান কৰা হয় । সাহিত্যিক, সমালোচকগৰাকীলৈ আমাৰ প্ৰণাম ।
আজি ‘মঞ্চসূৰ্য’ ধৰণী বৰ্মণৰ স্মৃতি দিৱস । ভ্ৰাম্যমাণ থিয়েটাৰৰ অভিনেতা, পৰিচালক আৰু প্ৰযোজক ধৰণী বৰ্মণ হ’ল সংগীত নাটক একাডেমী বঁটা (২০০৬) লাভ কৰা ভ্ৰাম্যমাণ থিয়েটাৰ জগতৰ প্ৰথমগৰাকী ব্যক্তি । তেওঁৰ প্ৰযোজনাত সুৰদেৱী থিয়েটাৰ আৰু তত্বাৱধানত ৰংঘৰ থিয়েটাৰ তথা অসমৰ প্ৰথম দুখন মহিলা থিয়েটাৰৰ (একেটা বৰ্ষতে জন্ম লাভ কৰা) এখন মুন থিয়েটাৰৰ জন্ম হয় । ১৯৯৬ চনত তেওঁ অসম নাট্য সন্মিলনৰ উপ-সভাপতি হয় । তেওঁ ছিৰাজ, চম্বলৰ অভিশাপ, ভোগজৰা, জেৰেঙাৰ সতী আদি নাটকৰ উপৰি নৰকাসুৰ চলচ্চিত্ৰতো অভিনয় কৰিছিল । স্বাধীনতা আন্দোলনৰ সময়ত তেওঁ বিষ্ণু ৰাভা, তৰুণসেন ডেকা আদি নেতাসকলৰ সৈতে একেলগে জনসজাগতা সৃষ্টিৰ কামত আত্মনিয়োগ কৰিছিল । অসম আন্দোলনৰ সময়তো তেওঁ সক্ৰিয় ভূমিকা পালন কৰিছিল । ১৯১৭ চনৰ আজিৰ দিনটোতে তেওঁৰ দেহাৱসান ঘটে । এইগৰাকী শিল্পীলৈ আমাৰ প্ৰণাম ।
