অহা ২৮ জুলাইৰ পৰা ইংলেণ্ডত অনুষ্ঠিত হ’বলগীয়া কমনৱেল্থ গেমছত ভাৰোত্তোলণ প্ৰতিযোগিতাত ভাৰতৰ হৈ প্ৰতিদ্বন্দ্বিতা কৰিব অসম কন্যা পপী হাজৰিকাই ৷ সেয়েহে সুদূৰ ইংলেণ্ডৰ পৰা সমূহ অসমবাসী ৰাইজৰ আশীৰ্বাদ বিচাৰিছে খেলুৱৈগৰাকীয়ে ৷ ৫৯কেজি শাখাৰ ভাৰত্তোলণত প্ৰতিদ্বন্দ্বিতা কৰিবলৈ সাজু হোৱা অসমকন্যা পপীয়ে বাৰ্মিংহামত কঠোৰ অনুশীলন কৰিছে ৷
অসমৰ শিৱসাগৰৰ নামতিৰ জীয়ৰী পপী হাজৰিকা ৷ নাগপুৰত অৱস্থিত ৰাষ্ট্ৰীয় প্ৰতিযোগিতাত শেহতীয়াকৈ সাফল্য লাভ কৰিবলৈ সক্ষম হৈছিল খেলুৱৈগৰাকীয়ে ৷ এইবাৰ কমনৱেল্থ গেমছত ভাৰতৰ হৈ প্ৰতিদ্বন্দ্বিতা কৰিবলৈ যোগ্যতা অৰ্জন কৰা ১৫জনীয়া ভৰোত্তোলকৰ দলটোৰ আঠজন পুৰুষ আৰু সাত গৰাকী মহিলা খেলুৱৈৰ ভিতৰত অসম কন্যা পপী হাজৰিকাও এগৰাকী খেলুৱৈ যি ইতিমধ্যে বহু কেইখন ৰাষ্ট্ৰীয় প্ৰতিযোগিতাত সফলতা অৰ্জন কৰি এইবাৰ কমনৱেল্থ গেমছত ভাৰতৰ হৈ ভাৰোত্তোলণ প্ৰতিযোগিতাত প্ৰতিদ্বন্দ্বিতা কৰাৰ বাবে নিৰ্বাচিত হৈছে আৰু সমগ্ৰ অসম বাসীকে গৌৱৰান্বিত কৰিছে ৷
