অবৈধ নিৰ্মাণৰ অপৰাধত দ্বিতীয়বাৰৰ বাবে জৰিমনা বিহা হৈছে তাৰকা ফুটবলাৰ নেইমাৰক। ইয়াৰ পূৰ্বেও ব্ৰাজিলৰ ফুটবল তাৰকাগৰাকীয়ে ৮ কোটি টকা জৰিমনা ভৰিবলগীয়া হৈছিল। কিন্তু ব্ৰাজিলৰ পৰিৱেশ মন্ত্ৰালয় ইয়াতেই ক্ষান্ত নাথাকিল। নেইমাৰক পুনৰবাৰ জৰিমনা বিহিছে তেওঁলোকে। অৱশ্যে এইবাৰ কিমান টকা দিব লাগিব সেয়া এতিয়াও ঘোষণা কৰা হোৱা নাই। ঘৰ নিৰ্মাণৰ সময়ত তেওঁ পৰিৱেশৰ কিমান ক্ষতি কৰিছে তদন্ত কৰি জৰিমনাৰ পৰিমাণৰ বিষয়ে অৱগত কৰা হ’ব।
ব্ৰাজিলৰ ৰিঅ’ ডি জেনেইৰ’ৰ বাহিৰৰ মাংগাৰাটিবা নামৰ ঠাইত নেইমাৰৰ ঘৰৰ আকাৰ ১০ হাজাৰ বৰ্গমিটাৰতকৈও অধিক। ২০১৬ চনত তেওঁ ঘৰটো কিনিছিল। কিন্তু সেই ঘৰটোত তেতিয়াৰ পৰাই বহু নিৰ্মাণৰ কাম চলি আছে। নির্মাণৰ কামৰ সময়ত নেইমাৰে পৰিৱেশৰ ক্ষতিসাধন কৰাৰ অভিযোগ উত্থাপন হৈছে।
ব্ৰাজিলৰ পৰিৱেশ মন্ত্ৰালয়ে এটা তদন্তকাৰী দল গঠন কৰে। সমগ্ৰ ঘটনাৰ ওপৰত তেওঁলোকে তদন্ত কৰি আছে ৷ তদন্তত প্ৰকাশ পোৱা অনুসৰি নেইমাৰে এখন নদী কাটি এটা কৃত্ৰিম হ্ৰদ নিৰ্মাণ কৰা বুলি জানিব পৰা গৈছে। তাৰ বাবে তেওঁ অবৈধভাৱে খনন চলাব লগীয়া হৈছিল। ইয়াৰ বাহিৰেও তেওঁ বালি পেলাই এটা কৃত্ৰিম বিল নিৰ্মাণ কৰিছিল। এই কামৰ ফলত তাত থকা পৰিৱেশ তন্ত্ৰত প্ৰভাৱ পৰিছে বুলি তদন্তকাৰীসকলে কয়। সম্পূৰ্ণ তদন্তৰ অন্তত নেইমাৰক এই জৰিমনা সন্দৰ্ভত অৱগত কৰা হ’ব।
নেইমাৰক পৰিবেশ মন্ত্ৰালয়ে অবৈধ নিৰ্মাণ বন্ধ কৰিবলৈ নিৰ্দেশ দিছে। কিন্তু সেই নির্দেশ তেওঁ অৱজ্ঞা কৰাৰ অভিযোগ উঠিছে। তাৰ পৰিৱৰ্তে সেই ঘৰতে পাৰ্টিৰ আয়োজন কৰিলে। ফলত ব্ৰাজিল প্ৰশাসনে অধিক কঠোৰ ব্যৱস্থা গ্ৰহণ কৰিছে। জনা যায় যে তেওঁ জৰিমনা আদায় দিবলৈ সন্মত হৈছে ৷
কাটাৰত অনুষ্ঠিত বিশ্বকাপৰ সময়ত নেইমাৰে ভৰিৰ গোৰোহাত আঘাত পাইছিল। চলিত বৰ্ষৰ ফেব্ৰুৱাৰী মাহৰ পৰা তেওঁ খেলপথাৰত প্ৰৱেশ কৰা নাই। নেইমাৰৰ সোঁ ভৰিৰ গোৰোহাত অস্ত্ৰোপচাৰ কৰা হয়। বৰ্তমান তেওঁ আঘাতৰ পৰা সুস্থ হৈছে ৷ ইফালে তেওঁ পেৰিছ এৰি যোৱাৰ বিষয়ে জল্পনা-কল্পনাৰ সৃষ্টি হৈছে।
