এছিয়া কাপক অনুষ্ঠিত কৰাক লৈ অব্যাহত আছে দোমোজা ৷ যদিও আনুষ্ঠানিকভাৱে ঘোষণা কৰা হোৱা নাই, তথাপিও পাকিস্তানৰ সলনি আন এখন দেশত প্ৰতিযোগিতাখন আয়োজন কৰাৰ সিদ্ধান্ত প্ৰায় চূড়ান্ত। এনে পৰিস্থিতিত পাকিস্তান ক্ৰিকেট ব’ৰ্ডে এছিয়া কাপ বৰ্জন কৰিব বুলি সকীয়াই দিছে।
ভাৰতৰ লগত বাংলাদেশ আৰু শ্ৰীলংকাইও এছিয়া কাপ খেলিবলৈ পাকিস্তানলৈ যাব নিবিচাৰে বুলি প্ৰকাশ কৰিছে । ইয়াৰ পিছত এছিয়া কাপ আয়োজনৰ দায়িত্ব পাকিস্তানৰ হাতৰ পৰা ওলাই যোৱাৰ পূর্ণ সম্ভাৱনীয়তাই দেখা দিছে ৷ইয়াৰ পৰিপ্ৰেক্ষিতত শ্ৰীলংকাত অনুষ্ঠিত হ’ব পাৰে এছিয়া কাপ। এছিয়ান ক্ৰিকেট কাউন্সিলৰ এই স্থিতিৰ বাবে ক্ষুব্ধ হৈ পৰিছে পাকিস্তান।
পাকিস্তান ক্ৰিকেট ব’ৰ্ডৰ অধ্যক্ষই এচিচিৰ বৈঠকত এছিয়া কাপ আন এখন দেশলৈ লৈ যোৱাক তীব্ৰ সমালোচনা কৰে। পিচিবিৰ অধ্যক্ষ নাজাম শ্বেট্টীয়ে মঙলবাৰে ডুবাইত এচিচিৰ বিষয়াসকলৰ সৈতে এক বৈঠকত মিলিত হয়। অৱশেষত তেওঁ এই প্ৰতিযোগিতা সংযুক্ত আৰব আমিৰশ্বাহীত অনুষ্ঠিত কৰাৰ প্ৰস্তাৱ আগবঢ়ায়। এচিচিৰ বিষয়াসকলেও তেওঁৰ এই প্ৰস্তাৱ মানি লোৱা নাছিল। যেতিয়া তেওঁলোকে প্ৰতিযোগিতাখন শ্ৰীলংকালৈ স্থানান্তৰিত কৰাৰ কথা কৈছিল, তেতিয়া শ্বেট্টীয়ে তীব্ৰ প্ৰতিবাদ কৰিছিল। তেওঁ পাকিস্তানৰ যিকোনো বিকল্প প্ৰস্তাৱ এচিচিক গ্ৰহণ কৰিবলৈ দাবী জনায়। যদি নহয় তেন্তে ২০১৮ আৰু ২০২২ চনৰ দৰে ইউ এ ইত সমগ্ৰ প্ৰতিযোগিতাখন অনুষ্ঠিত হ’ব লাগে।
ছেপ্টেম্বৰ মাহৰ গ্ৰীষ্মকালত সংযুক্ত আৰব আমিৰশ্বাহীত অনুষ্ঠিত হোৱা এই প্ৰতিযোগিতাক লৈ আপত্তি প্ৰকাশ কৰিছে ভাৰতীয় ক্ৰিকেট ব’ৰ্ডে। বিচিচিআইৰ আপত্তিক সমালোচনা কৰে পিচিবিৰ অধ্যক্ষগৰাকীয়ে। এজন পাকিস্তানী বিষয়াৰ মতে, শ্বেট্টীয়ে এচিচিৰ বিষয়াসকলক কয় যে ভাৰতৰ আপত্তি ভিত্তিহীন। ২০২০ চনত বি চি চি আইয়ে ইউ এ ইত ছেপ্টেম্বৰৰ পৰা নৱেম্বৰলৈ আই পি এলৰ আয়োজন কৰিছিল। তেন্তে এতিয়া কিয় গ্ৰীষ্মকালৰ কথা কোৱা হৈছে!” পাকিস্তানী বিষয়াগৰাকীয়ে কয়, “এচিচিৰ বিষয়াসকলে এতিয়াও পাকিস্তানৰ বিকল্প প্ৰস্তাৱ নাকচ কৰা নাই।যদিও শ্ৰীলংকাৰ ক্ৰিকেট ব’ৰ্ডে প্ৰতিযোগিতাখন আয়োজন কৰিবলৈ ভাৰতক সমৰ্থন আগবঢ়াইছে, পাকিস্তানী বিষয়াসকল আচৰিত হৈছে। পাকিস্তান, বাংলাদেশ আৰু আফগানিস্তানে যোৱা ফেব্ৰুৱাৰী মাহত এচিচিৰ বৈঠকত শ্ৰীলংকাৰ এই প্ৰস্তাৱৰ বিৰোধিতা কৰিছিল। পাকিস্তানৰ কাষত থিয় দিছিল বাংলাদেশ আৰু আফগানিস্তান।“
সূত্ৰ অনুসৰি ডুবাইলৈ যোৱাৰ পূৰ্বে শ্বেট্টীয়ে পিচিবিৰ ঘনিষ্ঠ বিষয়াসকলক কয় যে যদিহে এচিচিয়ে পাকিস্তানৰ বিকল্প প্ৰস্তাৱ গ্ৰহণ নকৰে তেন্তে তেওঁলোকেও আন ধৰণে চিন্তা কৰিব। প্ৰয়োজন হ’লে পাকিস্তানে এছিয়া কাপ বৰ্জন কৰিব। সেই সময়ত তেওঁলোকে তিনিৰ পৰা চাৰিখন দেশৰ সৈতে পাকিস্তানত এদিনীয়া প্ৰতিযোগিতা আয়োজন কৰিব। মন কৰিবলগীয়া যে এছিয়া কাপ বাতিল হ’লে বিচিচিআইয়েও চাৰি-পাঁচখন দেশৰ সৈতে এই প্ৰতিযোগিতা আয়োজন কৰাৰ পৰিকল্পনা কৰিছে।
