ৰাজস্থান ৰয়েলছৰ প্ৰশিক্ষকৰ টীমত লাচিথ মালিঙ্গা-পেডি আপটন

আগন্তুক আই পি এল  ছিজনৰ পূর্বে ৰাজস্থান ৰয়েলছে লাচিথ মালিঙ্গা আৰু পেডি আপটনক  প্ৰশিক্ষক হিচাপে নিযুক্তি  দিছে। মালিঙ্গা দলটোৰ নতুন ফাষ্ট-বলিঙৰ প্ৰশিক্ষক হ’ব ৷ আনহাতে আপটনক দলৰ বিশ্লেষক হিচাপে  দায়িত্ব অর্পন কৰা হৈছে ৷ মুম্বাই ইণ্ডিয়ানছৰ হৈ কেইবাখনো খেল খেলা  মালিংগাই  যোৱা জানুৱাৰীত সকলো ফ্ৰেঞ্চাইজি ক্ৰিকেটৰ পৰা অৱসৰ গ্ৰহণ কৰিছিল ৷  মালিঙ্গা শেহতীয়াকৈ শ্ৰীলংকাৰ পুৰুষ দলৰ বলিং  প্ৰশিক্ষক হিচাপে অষ্ট্ৰেলিয়ালৈ গৈছিল। নিযুক্তিৰ পাছতে প্ৰতিক্ৰিয়া প্ৰকাশ কৰি মালিঙ্গাই কয়- “আই পি এললৈ উভতি অহাটো মোৰ বাবে এক আনন্দকৰ অনুভৱ আৰু ৰাজস্থান ৰয়েলছত যোগদান কৰাটো এক সন্মান ৷ সদায় যুৱ প্ৰতিভাৰ প্ৰচাৰ আৰু বিকাশ কৰাত এই  ফ্ৰেঞ্চাইজিটোৱে গুৰুত্ব আৰোপ কৰি আহিছে । “আপটন ২০১৩-১৫ বৰ্ষলৈ আৰু তাৰ পিছত ২০১৯ চনত ৰাজস্থান ৰয়েলচৰ মুখ্য প্ৰশিক্ষকৰ দায়িত্বত আছিল ৷  কুমাৰ চাংগাকাৰা এই ছিজনৰ বাবে  দলটোৰ  মুখ্য প্ৰশিক্ষক হিচাপে থাকিব  ৷  চাংগাকাৰাই  দুয়োজন নতুন সদস্যক  দললৈ আদৰণি জনাইছে। আনহাতে ৰাজস্থান ৰয়েলচে আশা প্ৰকাশ কৰে যে সৰ্বকালৰ সৰ্বশ্ৰেষ্ঠ টি-২০ দ্ৰুত বলাৰসকলৰ মাজৰ অন্যতম লাচিথ মালিংগাৰ দৰে বলাৰৰ নিযুক্তিয়ে  দলটোক লাভান্বিত কৰিব ৷