কেন্দ্ৰীয় ক্ৰীড়া মন্ত্ৰী অনুৰাগ ঠাকুৰৰ অনুৰোধত আন্দোলনকাৰী মল্লযুঁজাৰুসকল তেওঁৰ ঘৰত সাক্ষাৎ কৰে ৷ সভাত সাক্ষীৰ মালিক, বজৰং পুনিয়াই মুঠ ৫টা দাবী উত্থাপন কৰে। ইয়াৰ ভিতৰত ৰাষ্ট্ৰীয় মল্লযুঁজ সংগঠনত এগৰাকী মহিলা মুৰব্বী নিযুক্তিৰ দাবী উত্থাপন হৈছে।
তদুপৰি মল্লযুঁজাৰুসকলৰ পাঁচ দাবী হৈছে -ৰাষ্ট্ৰীয় মল্লযুঁজ ফেডাৰেচনে মুক্ত আৰু নিকা নিৰ্বাচন অনুষ্ঠিত কৰিব লাগিব, সংগঠনৰ মুৰব্বী হিচাপে এগৰাকী মহিলা মুৰব্বী নিযুক্তি দিব লাগে, ব্ৰীজভূষণ আৰু তেওঁৰ পৰিয়াল ৰাষ্ট্ৰীয় মল্লযুঁজ সংগঠনৰ লগত জড়িত হ’ব নোৱাৰিব,নতুন সংসদ ভৱনৰ সন্মুখত প্ৰতিবাদ কৰাৰ বাবে মল্লযুঁজাৰুৰ বিৰুদ্ধে দাখিল কৰা এজাহাৰ খাৰিজ কৰিব লাগে আৰু ব্ৰীজভূষণক গ্ৰেপ্তাৰ কৰিব লাগে।
বুধবাৰে পুৱাৰে পৰা এজন এজনকৈ অনুৰাগৰ ঘৰত উপস্থিত হয় প্ৰতিবাদকাৰী মল্লযুঁজাৰু ৷ কৃষক নেতা ৰাকেশ টিকেইট তাত উপস্থিত আছিল।
ইফালে গৃহমন্ত্ৰী অমিত শ্বাহে নিজেই ফোন কৰি দ্বিতীয়বাৰৰ বাবে মল্লযুঁজাৰুসকলক আলোচনা কৰিবলৈ অনুৰোধ জনোৱাৰ কথা জনা গৈছে। মঙলবাৰে বজৰঙে এটা টিভি চেনেলত সাক্ষাৎকাৰ দিয়ে। ইয়াৰ পিছত তেওঁলৈ শ্বাহৰ পৰা ফোন আহে ৷তেওঁ আৰু এটা পর্যায়ৰ বৈঠকৰ বাবে অনুৰোধ জনায়। কিন্তু তেওঁ নিজে সভা অনুষ্ঠিত কৰিব নে নকৰে সেয়া এতিয়াও স্পষ্ট হোৱা নাই। অমিত শ্বাহৰ অনুৰোধৰ পিছতে বজৰঙে কয় যে তেওঁলোকে কোনো ধৰণৰ সভা গোপনে পাতিবলৈ ইচ্ছুক নহয়। ইয়াৰ পিছত অনুৰাগ ঠাকুৰে টুইট কৰে।
ইফালে মঙলবাৰে দিল্লী আৰক্ষীয়ে ব্ৰীজভূষণৰ ঘৰত অভিযান চলায়। উত্তৰ প্ৰদেশৰ অভিযুক্ত মল্লযুঁজাৰুজনৰ ঘৰত ১২জন লোকক জেৰা কৰে। দীৰ্ঘদিন ধৰি মল্লযুঁজাৰুসকলে ব্ৰীজভূষণৰ বিৰুদ্ধে অভিযোগ উত্থাপন কৰি আহিছে।
আৰক্ষীয়ে সোধা-পোছা কৰা ১২জন লোকৰ ভিতৰত ব্ৰীজভূষন আছে নে নাই সেয়া জানিব পৰা হোৱা নাই৷ ব্ৰীজভূষণ নিজে ঘৰত আছিল নে নাই সেয়াও জানিব পৰা হোৱা নাই৷ যিসকলৰ বক্তব্য লিপিবদ্ধ কৰা হৈছে তেওঁলোকৰ নাম, ঠিকনা আৰু পৰিচয় পত্ৰ দিল্লী আৰক্ষীয়ে লৈছে। এই তথ্য তেওঁলোকে প্ৰমাণ হিচাপে লৈছিল। ব্ৰীজভূষণৰ কাষত থিয় হৈ থকা বিভিন্নজনক জেৰা অব্যাহত ৰাখিছে আৰক্ষীয়ে। এই পৰ্যন্ত মুঠ ১৩৭ জনৰ ভাষ্য লিপিবদ্ধ কৰা হৈছে।
