ঋতু পৰ্ণ শৰ্মা,নগাঁও,১৪মে’:– নগাঁও আৰু মৰিগাঁও জিলাৰ সীমান্তৱৰ্তী ঐতিহ্যপূৰ্ণ বাৰপূজীয়াত আগন্তুক ২০২৪চনত অনুষ্ঠিত হ’ব অসম সাহিত্য সভাৰ মধ্যকালীন অধিবেশন ৷ মৰিগাঁও জিলা সাহিত্য সভাৰ অন্তৰ্ভূক্ত বাৰপূজীয়া শতদল শাখা সাহিত্য সভাৰ আহ্বানমৰ্মে আগন্তুক ২০২৪চনত বাৰপূজীয়াত অনুষ্ঠিত হ’ব অসম সাহিত্য সভাৰ বিশেষ মধ্যকালীন অধিৱেশনখনি ৷ এই উপলক্ষে ৰবিবাৰে বাৰপূজীয়াৰ দৌল মন্দিৰ প্ৰাঙ্গনত অধিৱেশন খনি সাফল্যমণ্ডিত কৰিবলৈ আদৰণি সমিতি গঠনৰ উদ্দেশ্যে এখনি ৰাজহুৱা সভা অনুষ্ঠিত হয় । বাৰপূজীয়া শতদল শাখা সাহিত্য সভাৰ সভাপতি ডাঃ প্ৰদীপ কুমাৰ ডেকাৰ সঞ্চালনাত অনু্ষ্ঠিত সভাখনিত পৰ্যবেক্ষক ৰূপে উপস্থিত থাকে অসম সাহিত্য সভাৰ কোষাধ্যক্ষ মিহিৰ বৰুৱা, গুৱাহাটী মহানগৰ কাৰ্যালয় প্ৰশাসনিক বিষয়া প্ৰফুল্ল বৰ্মন, অজিত প্ৰসাদ শৰ্মা আৰু দেবেন্দ্ৰ নাথ বসুমতাৰী ৷
আনহাতে সভাত অসম সাহিত্য সভাৰ প্ৰচাৰ উপ সমিতিৰ কাৰ্যকৰী সভাপতি অজিত শৰ্মা,অসম সাহিত্য সভাৰ নগাঁও আঞ্চলিক সমিতিৰ সম্পাদক প্ৰতাপ হাজৰিকা, মৰিগাঁও জিলা সাহিত্য সভাৰ সভাপতি মহেন্দ্ৰ শইকীয়া,অসম সাহিত্য সভাৰ বিশেষ আমন্ত্ৰিত সদস্য পিনাকী ভূষণ মহন্ত,অসম সাহিত্য সভাৰ প্ৰাক্তন কাৰ্যনিৰ্বাহক সদস্য ৰতিমোহন নাথ,বিনু লস্কৰ ঠাকুৰীয়া,হোজাই জিলা সাহিত্য সভাৰ সম্পাদক বিৰাজ কুমাৰ বৰাৰ লগতে কেইবাগৰাকী বিশিষ্ট ব্যক্তি উপস্থিত থাকে ৷ আনহাতে নগাঁও,মৰিগাঁও আৰু হোজাই জিলাৰ প্ৰায় তিনি শতাধিক সাহিত্য অনুৰাগী উপস্থিত থকা এই ৰাজহুৱা সভাতে অসম চৰকাৰৰ বিত্ত সচিব হেমন্ত কুমাৰ দেউৰীক সভাপতি,বিৰিঞ্চি কুমাৰ শৰ্মাক কাৰ্যকৰী সভাপতি,ডাঃ প্ৰদীপ কুমাৰ ডেকাক সাধাৰণ সম্পাদক তথা জয়কান্ত দাস আৰু কুশল বৰাক যুটীয়া সম্পাদক হিচাপে লৈ এখনি শক্তিশালী আদৰণি সমিতি গঠন কৰা হয় ।
