এজন শাক-পাচলি বিক্ৰেতা,৩০বছৰ বয়সতে যি ডাষ্টবিনৰ পৰা কোলাত তুলি লৈছিল এজনী কণমানিক

শেহতীয়াকৈ সামাজিক মাধ্যমত বহুল ভাৱে সমাদ্ৰিত হোৱা এটি সঁচা কাহিনী ৷ এটি আচৰিত কাহিনী ৷ যি কাহিনীয়ে ইতিমধ্যে বহু লোকৰে হৃদয় স্পৰ্শ কৰিছে ৷ বহুজনেই নিজৰ ফেচবুক প্ৰফাইলত শ্বেয়াৰ কৰিছে এই কাহিনী ৷
এই কাহিনী অসমৰ তিনিচুকীয়া জিলাৰ এজন শাক-পাচলি বিক্ৰেতাৰ ৷ তেওঁৰ নাম ‘সুব্ৰণ’ ৷ যি নিজৰ ৩০বছৰ বয়সতে ডাষ্টবিনৰ পৰা কোলাত তুলি লৈছিল এজনী কণমানি ছোৱালীক ৷
সামাজিক মাধ্যমত ‘কমল বস্ত্রালয়’ নামৰ এটি একাউণ্টৰ পৰা শ্বেয়াৰ কৰা এই প’ষ্টটি আন বহুকেইগৰাকীয়েও ইতিমধ্যে শ্বেয়াৰ কৰা দেখা পোৱা গৈছে ৷
প’ষ্টটোত লিখা হৈছে যে এই ফটোখনত দেখা পোৱা প্ৰথম ফটোখনত থকা এই মানুহজনৰ নাম ‘সোব্ৰণ! তেওঁ শাক-পাচলি বিক্ৰী কৰি অসমৰ তিনিচুকীয়া জিলাত থাকে। ৩০ বছৰ বয়সত ডাষ্টবিনত এজনী ছোৱালী কান্দি থকা দেখিলে। দ্বিতীয় ফটোখনত দেখা মৰমলগা কণমানিজনী একেজনী ছোৱালী।
জাবৰত পৰি থকা সেই নিৰীহ ছোৱালীজনীক যেতিয়া সোব্ৰনে ঘৰলৈ আনিছিল, তেতিয়া তেওঁৰ বিয়া হোৱা নাছিল। সেয়ে সোব্ৰনে সিদ্ধান্ত ল’লে যে তেওঁ সেই নিৰীহ ছোৱালীজনীক ডাঙৰ-দীঘল কৰিব, শিক্ষিত কৰিব, বিয়া নহয় আৰু এইদৰেই তেওঁ সেই ছোৱালীজনীৰ নাম ৰাখিলে “জ্যোতি”৷
৩০বছৰ বয়সতে এজন চফল ডেকাই নিজে বিয়া পতাৰ পৰিৱৰ্তে শাক-পাচলিৰ ব্যৱসায় কৰি কণমানি জনীৰ পিতৃ হৈ তাইক শিক্ষিত কৰাৰ দিশে অগ্ৰসৰ হ’ল ৷
শাক-পাচলি বিক্ৰী কৰা সেই যুৱকজনে কণমানি জনীক ডাঙৰ-দীঘল কৰিবৰ বাবেই দিনে নিশাই কঠোৰ পৰিশ্ৰম কৰিছিল আৰু জীয়েক জ্যোতিয়েও অতি মনোযোগেৰে পঢ়া-শুনা কৰিছিল।এতিয়া সেই জ্যোতিৰ বয়স ২৫ বছৰ।২০১৩ চনত কম্পিউটাৰ বিজ্ঞানত স্নাতক ডিগ্ৰী লাভ কৰা জ্যোতিয়ে ২০১৪ চনত অসম লোকসেৱা আয়োগৰ বাবে নিৰ্বাচিত হয় আৰু আজি জ্যোতি অসমৰ আয়কৰ সহকাৰী আয়ুক্ত হিচাপে কৰ্মৰত!!
জ্যোতি নামৰ এইগৰাকী বিষয়াৰ সফলতাৰ আঁৰত অৱশ্যেই লুকাই আছে সুব্ৰণ নামৰ এই লোকজনৰ অপৰিসীম ত্যাগ আৰু সেই কণমাণিজনীৰ প্ৰতি থকা নিস্বাৰ্থ মৰম ৷
প’ষ্টটোত উল্লেখ কৰা অনুসৰি আজি যেতিয়া সোবেৰনক সোধা হয় যে তেওঁ ভাবিছিলনে যে তেওঁ ডাঙৰ-দীঘল কৰা, পঢ়োৱা সন্তানটো এদিন ইমান সফল হ’ব! তেতিয়া তাৰ উত্তৰত তেওঁ কয় যে তেওঁ মাত্ৰ এটা কথা জানে যে তেওঁ কয়লাৰ খনিত এটুকুৰা হীৰা বিচাৰি পাইছিল।
সঁচাকৈয়ে জাতি, ধৰ্ম, কু-অভিপ্ৰায়, হিংসা, নিষ্ঠুৰতা, অহংকাৰ আদিৰ পৰা আঁতৰি সততাৰে জীৱন নিৰ্বাহ কৰা সোব্ৰন নামৰ এইজন লোকে যেন সকলোকে দেখুৱাইছে জীয়াই থকাৰ পথ৷
সঁচা অৰ্থত সুব্ৰনৰ দৰে এই মানুহবোৰেই একো একোখন সমাজৰ প্ৰকৃত নায়ক!যি নিজৰ জীৱনৰ কথা চিন্তা নকৰাকৈয়ে ভাবিব পাৰে আন এটি জীৱনৰ কথা ৷ এটি অবোধ শিশুৰ কান্দোন শুনি যি পাহৰিব পাৰে নিজৰ সকলো দুখ-কষ্ট, ত্যগ কৰিব পাৰে নিজৰ সকলো সুখ ৷