চলচ্চিত্ৰ প্ৰেমী সকলৰ বহু অপেক্ষাৰ অন্ত পেলাই অৱশেষত গুৱাহাটীৰ জ্যোতি চিত্ৰবনত ২০২৩বৰ্ষৰ ৫ আৰু ৬ জানুৱাৰীত অনুষ্ঠিত হ’ব চলচ্চিত্ৰম্ নেচনেল ফিল্ম ফেষ্টিভেল ।
ৰবীন্দ্ৰ ভৱনত এই চলচ্চিত্ৰ মহোৎসৱ অনুষ্ঠিত হোৱাৰ কথা আছিল যদিও ৰবীন্দ্ৰ ভৱন সাজু হৈ নুঠাৰ পৰিপ্ৰেক্ষিতত চলচ্চিত্ৰম্ নেচনেল ফিল্ম ফেষ্টিভেল ৫ আৰু ৬ জানুৱাৰিত জ্যোতি চিত্ৰবনত অনুষ্ঠিত হ’ব বুলি জানিবলৈ দিছে চলচ্চিত্ৰম্ নেচনেল ফিল্ম ফেষ্টিভেলৰ আয়োজক সকলে ৷
৫ আৰু ৬তাৰিখে প্ৰতিদিনে ৰাতিপুৱা ১০ বজাৰ পৰা ৫ বজালৈ অনুষ্ঠিত হ’ব এই চলচ্চিত্ৰ মহোৎসৱ ৷
আয়োজক সকলে জনোৱা মতে জ্যোতি চিত্ৰবনত নতুনকৈ আৰম্ভ কৰা কেন্টিনৰ বাবে খাদ্য সংক্ৰান্তত কোনো অসুবিধাৰ সন্মুখীন নহ’ব চলচ্চিত্ৰ প্ৰেমী সকল ৷
উল্লেখযোগ্য যে উক্ত চলচ্চিত্ৰ মহোৎসৱত ‘মহিষাসুৰমৰ্দিনী’ ছবিৰ উত্তৰ-পূব ভাৰত প্ৰিমিয়াৰ আৰু ‘এ নোমাদ ৰিভাৰ’ (হিন্দী) ছবিৰ ভাৰত প্ৰিমিয়াৰ প্ৰদৰ্শিত হ’ব ৷
সেয়েহে ৫ আৰু ৬ জানুৱাৰি তাৰিখে জ্যোতি চিত্ৰবনত উপস্থিত থাকি উক্ত চলচ্চিত্ৰ মহোৎসৱখনি সুকলমে অনুষ্ঠিত হোৱাত সকলোৰে সহায় সহযোগিতা কামনা কৰিছে চলচ্চিত্ৰম্ নেচনেল ফিল্ম ফেষ্টিভেলৰ আয়োজক সকলে।
