শিৰোনাম দেখি নাহাঁহিব। অৱশ্যে হাঁহি উঠাতো স্বাভাৱিক, যি সময়ত দেশৰ ৰাজনৈতিক প্ৰেক্ষাপটত নৰেন্দ্ৰ মোদীৰ জনপ্ৰিয়তা অপ্ৰতিদ্বন্দী হৈ আছে তেনে সময়ত কেজৰিৱালক লৈ এনে এটা শিৰোনাম দিয়াটো কিমান সমিচীন! কিন্তু ৰাজনীতিত কোনো কথাই স্থায়ী নহয়। সকলো কথা চলমান। কালি কংগ্ৰেছ, আজি বিজেপি হোৱাৰ দৰে এতিয়া মোদী চলিছে কালিলৈ অন্য কোনো, কিন্তু ৰাজনীতি আৰু গণতন্ত্ৰ চলি থাকিব।
দিল্লীৰ জনপ্ৰিয় মুখ্যমন্ত্ৰী অৰৱিন্দ কেজৰিৱালৰ কথা নতুনকৈ কোৱা বা তেওঁৰ পৰিচয় দিয়াৰ দৰকাৰ নাই। এইজন ৰাজনীতিকক আমি দেশত হোৱা আন্না আন্দোলনৰ জৰিয়তে লাভ কৰিছোঁ। কংগ্ৰেছৰ অপশাসনৰ বিৰুদ্ধে গঢ় লোৱা জনমতে দেশত (দিল্লীত) আন্না হাজাৰেৰ নেতৃত্বত সত্যাগ্ৰহ আন্দোলনৰ আৰম্ভণি কৰিছিল। এই আন্দোলনৰ প্ৰতি সকলোৰে সমৰ্থন আছিল। এই আন্দোলনৰ শেষত মূলত আমি দুগৰাকী নেতা ৰাষ্ট্ৰীয় পৰ্যায়ত উজলি উঠা দেখিছিলোঁ। সেই দুগৰাকীৰ প্ৰথমগৰাকী হৈছে দেশৰ প্ৰধানমন্ত্ৰী নৰেন্দ্ৰ মোদী আৰু দ্বিতীয়গৰাকী হৈছে অৰৱিন্দ কেজৰিৱাল। ২০১৪ চনৰ লোকসভা নিৰ্বাচনৰ পূৰ্বে দিল্লীত দপদপাই থকা তথা নিজৰ খেয়ালী স্বভাৱৰে ৰাজনীতি কৰা অৰৱিন্দ কেজৰিৱালে ক্ষমতালৈ আহিও ক্ষমতাক প্ৰত্যাখ্যান কৰিছিল। ২০১৩ চনৰ ডিচেম্বৰত দিল্লীৰ মুখ্যমন্ত্ৰীৰ দায়িত্ব লৈ ওলোমা সদনত লোকপাল বিধেয়ক গৃহীত কৰিব নোৱাৰি তেওঁ ২০১৪ চনৰ ফেব্ৰুৱাৰীত পদত্যাগ কৰিছিল। আৰু তাৰ পাছত দেশত অনুষ্ঠিত হোৱা সাধাৰণ নিৰ্বাচনত পোনে পোনে জনপ্ৰিয়তাৰ শীৰ্ষত থকা নৰেন্দ্ৰ মোদীৰ বিপক্ষে বাৰাণসী লোকসভা সমষ্টিত প্ৰতিদ্বন্দিতা আগবঢ়াইছিল। সেই নিৰ্বাচনত মোদীৰ হাতত ধৰাশায়ী হোৱা এই কেজৰিৱালে আকৌ ২০১৫ত যাদু কৰিছিল। সমগ্ৰ দেশত তথা ৰাজনীতিৰ ক্ষেত্ৰখনত প্ৰভুত্ব অৰ্জন কৰিবলৈ সক্ষম হোৱা নৰেন্দ্ৰ মোদী তথা বিজেপি দলটো ২০১৫ৰ দিল্লীৰ বিধানসভাৰ নিৰ্বাচনত কেজৰিৱালৰ হাতত ধৰাশায়ী হৈছিল। সেয়া ২০২০ চনত পুনৰবাৰ প্ৰতিষ্ঠা কৰি কেজৰিৱালে বৰ্তমান তৃতীয় কাৰ্যকালৰ বাবে দিল্লীৰ মছনদ দখল কৰি আছে।
তেওঁ গঠন কৰা আম আদমী পাৰ্টী চমুকৈ আপ সদায় চৰ্চাত থকাৰ দৰে এতিয়া পুনৰবাৰ আলোচনাৰ মাজলৈ আহিছে। কিয়নো শেহতীয়া দেশৰ পাঁচখন ৰাজ্যৰ বিধানসভাৰ নিৰ্বাচনী ফলাফল ঘোষিত হৈছে। চাৰিখনকৈ ৰাজ্যত বিজেপি শাসনলৈ অহাৰ সমান্তৰালকৈ দেশৰ অন্যতম উন্নত ৰাজ্য পঞ্জাৱৰ বিধানসভাত আপে সংখ্যাগৰিষ্ঠতা পোৱাৰ পাছত কেজৰিৱালৰ নাম সঘনাই সংবাদ মাধ্যমত উচ্চাৰিত হৈছে। লগতে সফল দিল্লীৰ মডেল এতিয়া দিল্লীৰ বাহিৰত প্ৰথম ৰাজ্য হিচাপে পঞ্জাৱত সফল হৈ পৰিব বুলি ৰাজনৈতিক বিশ্লেষকে আলোচনা কৰিছে। ইমান দিনে পৌৰ নিগম-পৌৰ সভাবোৰৰ (গুজৰাটত আপ সফল) নিৰ্বাচনত আপে সফলতা লাভ কৰি থকাৰ পাছত প্ৰথমবাৰৰ বাবে বিধানসভাৰ নিৰ্বাচনত সফলতা পাবলৈ সক্ষম হৈছে। এয়া দলটোৰ বাবে ইতিবাচক দিশ। দলটোৰ সম্প্ৰসাৰণ পঞ্জাৱৰ দৰে ৰাজ্যত বিস্তাৰ লাভ কৰাৰ পাছত এয়া যে অন্য ৰাজ্যবোৰলৈ যাব পাৰিব, সেয়া খাটাং। কিয়নো তুলনামূলকভাৱে নতুনকৈ গঠিত হোৱা আম আদমী পাৰ্টীয়ে এতিয়া অন্য ৰাজ্যৰ বিধানসভাৰ নিৰ্বাচন তথা ২০২৪ৰ সাধাৰণ নিৰ্বাচনত বিশেষ প্ৰভাৱ বিস্তাৰ কৰিব।
জনপ্ৰিয় প্ৰধানমন্ত্ৰী নৰেন্দ্ৰ মোদীৰ বিপক্ষে কোনজন ৰাজনৈতিক নেতা উপযুক্ত, এই কথাটোক লৈ সৰৱ চৰ্চা হৈ থকাৰ সময়ত সৰ্বভাৰতীয় প্ৰেক্ষাপটত কেতিয়াবা বংগৰ মমতা বেনাৰ্জী, তেলেংগানাৰ কেচি ৰাওৰ কথা আহিলেও আগন্তুক দহ বছৰত অৰৱিন্দ কেজৰিৱাল সৰ্বভাৰতীয় প্ৰেক্ষাপটত গুৰুত্বপূৰ্ণ হৈ পৰিব সেয়া অবিশ্বাস্য যেন লাগিলেও সত্য।
