নেপালত ব্লেকলিষ্ট কৰা হৈছে ১৬টা ভাৰতীয় ঔষধ কোম্পানীয়ে নিৰ্মাণ কৰা সামগ্ৰী। সেই তালিকাত আছে ৰামদেৱৰ দিব্য ফাৰ্মাচী। দিব্য ফার্মাচীয়ে পতঞ্জলিৰ নামত ঔষধ বিক্ৰী কৰি আহিছে । নেপালৰ ঔষধ নিয়ন্ত্ৰণ কৰ্তৃপক্ষই জনোৱা মতে, সেই কোম্পানীসমূহে বিশ্ব স্বাস্থ্য সংস্থাৰ মানদণ্ড পূৰণ কৰাত ব্যৰ্থ হয়। গতিকে তেওঁলোকক ব্লেকলিষ্ট কৰা হ’ল।
যোৱা ১৮ ডিচেম্বৰত নেপালৰ ‘ড্ৰাগছ প্ৰশাসন’ বিভাগে এই সন্দৰ্ভত এক অধিসূচনা জাৰি কৰিছিল। ইয়াৰ জৰিয়তে স্থানীয় ব্যৱসায়ীসকলক অতি সোনকালে ঔষধসমূহ ওভতাই দিবলৈ নিৰ্দেশ দিয়া হৈছে। অধিসূচনা অনুসৰি ব্লেকলিষ্ট কৰা ভাৰতীয় কোম্পানীয়ে প্ৰস্তুত কৰা ঔষধ আমদানি বা বিতৰণ কৰিব নোৱাৰিব।
নেপালী প্ৰশাসনৰ সূত্ৰ অনুসৰি যোৱা এপ্ৰিল আৰু জুলাইত নেপালৰ পৰা বিশেষজ্ঞৰ এটা দলে ভাৰত ভ্ৰমণ কৰিছিল। ভাৰতৰ কেইবাটাও ঔষধ কোম্পানীয়ে নেপাললৈ ঔষধ ৰপ্তানি কৰিব বিচাৰিছিল। দলটোৱে ঔষধ নিৰ্মাণ কোম্পানীসমূহৰ ভিতৰত সোমাই সমগ্ৰ বিষয়টোৰ তদন্ত কৰে। তেওঁ প্ৰত্যক্ষভাৱে জানিব বিছাৰিছিল যে বিশ্ব স্বাস্থ্য সংস্থাই নিৰ্ধাৰণ কৰা মানদণ্ডসমূহ সঠিকভাৱে ৰক্ষা কৰা হৈছে নে নাই। ইয়াৰ পিছত ডিচেম্বৰৰ মাজভাগত নেপালে ব্লেকলিষ্ট প্ৰকাশ কৰে।
ৰামদেৱৰ কোম্পানীটোৰ উপৰিও ব্লেকলিষ্টত ভাৰতৰ ৰেডিয়েণ্ট পেৰেণ্টেৰেলছ লিমিটেড, মাৰ্কিউৰি লেবৰেটৰীজ লিমিটেড, এলায়েন্স বায়’টেক, জি লেবৰেটৰীজ, কেডিলা হেল্থকেয়াৰ লিমিটেড, জিএলএছ ফাৰ্মা, আইপিচিএ লেবছকে ধৰি আন কেইবাটাও ভাৰতীয় ঔষধ কোম্পানী অন্তৰ্ভুক্ত কৰা হৈছে।
একেদৰে নেপালৰ ঔষধ নিয়ন্ত্ৰণ কৰ্তৃপক্ষই ১৯ ডিচেম্বৰত জাৰি কৰা আন এক অধিসূচনাত গ্ল’বেল হেল্থকেয়াৰ অৱ ইণ্ডিয়াৰ ৫০০ মিলিলিটাৰ আৰু ৫ লিটাৰৰ হেণ্ড চেনিটাইজাৰ পুনৰ আহ্বান কৰাৰ নিৰ্দেশ দিয়া হৈছে। বিভাগে স্পষ্ট কৰি দিছে যে এই ব্ৰেণ্ডৰ হেণ্ড ছেনিটাইজাৰ ব্যৱহাৰ, বিক্ৰী বা যোগান ধৰিব নোৱাৰিব।
