সমগ্ৰ অসমৰ লগতে আজিৰে পৰা কামৰূপ জিলাতো আৰম্ভ হৈছে স্বাস্থ্য সেৱা উৎসৱ। আজি ৰাজ্য চৰকাৰৰ কেইবাগৰাকীও উচ্চ পদস্থ বিষয়াই এই কাৰ্যসূচীৰ অংশ হিচাপে জিলাখনৰ সৰ্বমুঠ ২৭খন চৰকাৰী চিকিৎসা প্ৰতিষ্ঠান পৰিদৰ্শন কৰি চিকিৎসা প্ৰতিষ্ঠান সমূহে প্ৰদান কৰি থকা সেৱাৰ বুজ লয়।
উল্লেখ্য যে আজিৰে পৰা ৮ এপ্ৰিললৈ সমগ্ৰ ৰাজ্যখনতে চলি থকা স্বাস্থ্য সেৱা উৎসৱৰ জৰিয়তে কামৰূপ জিলাৰো সৰ্বমুঠ ৮০ খন স্বাস্থ্য সেৱা প্ৰতিষ্ঠানৰ মূল্যায়ন কৰা হ’ব।
উল্লেখ্য যে সমগ্ৰ দেশৰ ভিতৰতে প্ৰথম হিচাপে আৰম্ভ হোৱা “স্বাস্থ্য সেৱা উৎসৱ”ৰ জৰিয়তে সামগ্ৰিকভাৱে ৰাজ্যৰ স্বাস্থ্য খণ্ডৰ আন্তঃগাঁথনি উন্নীতকৰণ আৰু জনসাধাৰণক গুণগত মানসম্পন্ন স্বাস্থ্য সেৱা প্ৰদান সুনিশ্চিতকৰণৰ পদক্ষেপ লোৱা হৈছে। এই পদক্ষেপৰ জৰিয়তে ৰাজ্য চৰকাৰৰ স্বাস্থ্য আৰু পৰিয়াল কল্যাণ বিভাগে ৰাজ্যখনৰ বিভিন্ন স্তৰৰ চৰকাৰী স্বাস্থ্য প্ৰতিষ্ঠানৰ মূল্যায়ন কৰিব। এই মূল্যায়ন কাৰ্যসূচীৰ জৰিয়তে ৰাজ্যখনৰ ২১ খন জিলা চিকিৎসালয়, ১৬খন মহকুমা চিকৎসালয়, ২০৫ খন সামূহিক স্বাস্থ্যকেন্দ্ৰ আৰু ১,০১০ খন প্ৰাথমিক স্বাস্থ্যকেন্দ্ৰকে ধৰি সৰ্বমুঠ ১,২৫২ খন চৰকাৰী স্বাস্থ্য কেন্দ্ৰক সামৰি লোৱাৰ পদক্ষেপ লৈছে।
এই কাৰ্যসূচীৰ অধীনত আজি ৰাজ্য চৰকাৰৰ স্বাস্থ্য আৰু পৰিয়াল কল্যাণ বিভাগৰ প্ৰধান সচিব অবিনাশ যোশীয়ে ৰাণী সামূহিক স্বাস্থ্য কেন্দ্ৰ, ৰাষ্ট্ৰীয়া স্বাস্থ্য অভিযান মিচন, অসমৰ অভিযান সঞ্চালক ড০ এম.এচ. লক্ষ্মীপ্ৰিয়াই তোলাৰাম বাফনা জিলা অসামৰিক চিকিৎসালয়, বেজেৰা সামূহিক স্বাস্থ্য কেন্দ্ৰ-এফ.আৰ.ইউ আৰু শুৱালকুছি এফ.আৰ.ইউ পৰিদৰ্শন কৰি চিকিৎসা সেৱাৰ বুজ লয়। তদুপৰি কামৰূপ জিলাৰ উপায়ুক্ত কীৰ্তি জল্লীয়েও আজৰা প্ৰাথমিক স্বাস্থ্য কেন্দ্ৰ পৰিদৰ্শন কৰি স্বাস্থ্য কেন্দ্ৰটোৱে প্ৰদান কৰি থকা সেৱা তথা আন্তঃগাথনিৰ বুজ লয়। ইয়াৰ উপৰি উচ্চ শিক্ষা বিভাগৰ অতিৰিক্ত সচিব মধুসুদন নাথ, জনজাতি কল্যাণ (ভৈয়াম) বিভাগৰ যুটীয়া সচিব ৰমেন চন্দ্ৰ মালাকাৰ, পেঞ্চন আৰু ৰাজহুৱা ওজৰ-আপত্তি বিভাগৰ যুটীয়া সচিব অতনু শৰ্মা, কৃষি বিভাগৰ যুটীয়া সচিব গুণজিৎ কাশ্যপ, কামৰূপৰ অতিৰিক্ত আৰক্ষী আধীক্ষক (অপৰাধ) এচ. চাংচনকে ধৰি অন্যান্য উচ্চ পদস্থ বিষয়া সকলে আজি বিভিন্ন চৰকাৰী চিকিৎসা প্ৰতিষ্ঠান পৰিদৰ্শন কৰি স্বাস্থ্য সেৱা তথা অন্যান্য আন্তঃগাথনিৰ বুজ লয়।
