১৮ বছৰ বয়সত ‘মিছ এছিয়া পেচিফিক’ আৰু ‘ফেমিনা মিছ ইণ্ডিয়া পেচিফিক’ খিতাপ দখল কৰি বলীউড জগতত পদাৰ্পণ কৰা এইগৰাকী অভিনেত্ৰীয়ে ১৯ বছৰ বয়সত ‘ৰেহনা হেই তেৰে দিল মেই’ ছবিত মুখ্য চৰিত্ৰত অভিনয় কৰি বলীউডত জনপ্ৰিয়তা অৰ্জন কৰিছিল । প্ৰথমখন ছবিত অভিনয় কৰিয়েই বলীউড জগতৰ তাৰকা হৈ পৰা এই গৰাকী অভিনেত্ৰীৰ নাম হ’ল ডিয়া মিৰ্জা । মেডী ওৰফে আৰ মাধৱনৰ সৈতে সুন্দৰ অভিনয়েৰে দৰ্শকক উন্মাদ কৰি তুলিছিল তেওঁ। মডেলিং,অভিনয় আৰু চলচ্চিত্ৰ নিৰ্মাণৰ লগতে সমাজৰ উন্নতিৰ বাবে কাম কৰা জনপ্ৰিয় অভিনেত্ৰী দিয়া মিৰ্জাৰ শৈশৱৰ ফটো এইখন।
হায়দৰাবাদত জন্মগ্ৰহণ কৰা ডিয়া মিৰ্জাৰ পিতৃ জাৰ্মান আৰু মাতৃ হিন্দু বাঙালী পৰিয়ালৰ। কেইবছৰমান একেলগে থকাৰ পিছত ডিয়াৰ মাকৰ প্ৰথম স্বামী ফ্ৰেংক হেণ্ড্ৰিচৰ সৈতে বিবাহ বিচ্ছেদ ঘটে আৰু তাৰ পিছত তেওঁ আহমেদ মিৰ্জাৰ সৈতে বিবাহপাশত আবদ্ধ হয়। কিন্তু দ্বিতীয় পিতৃৰ পৰা কেৱল মৰমেই নহয় উপাধিও লাভ কৰিছিল ডিয়াই । ‘দছ’, ‘লাগে ৰাহো মুন্না ভাই, ‘সঞ্জু’, ‘পৰিণীতা, ‘ছালাম মুম্বাই’ আদি ছবিত কাম কৰি অভিনেত্ৰীগৰাকীয়ে দৰ্শকৰ বিপুল সমাদৰ লাভ কৰিবলৈ সক্ষম হৈছে । ২০১৯ চনত ‘কাফিৰ’ ৱেব ছিৰিজতো দেখা গৈছিল ডিয়াক।
ডিয়া মিৰ্জাই ২০২১ চনত ব্যৱসায়ী বৈভৱ ৰেখীৰ সৈতে বিবাহপাশত আবদ্ধ হয়, পুত্ৰ অব্যানৰ সৈতে তেওঁলোকৰ সুখৰ সংসাৰ। অভিনেত্ৰীগৰাকীয়ে প্ৰায়ে ইনষ্টাগ্ৰামত নিজৰ পৰিয়ালৰ আৰু শৈশৱৰ বহু ছবি শ্বেয়াৰ কৰে। কিছুদিনৰ আগতে তেওঁ নিজৰ শৈশৱৰ আৰু তেওঁৰ মাতৃৰ সৈতে পুত্ৰৰ এখন ছবি শ্বেয়াৰ কৰিছিল।
সংবাদ মাধ্যমৰ বাতৰি অনুসৰি, প্ৰথম স্বামী সাহিল সংঘৰ সৈতে বিবাহ বিচ্ছেদ হোৱাৰ পিছত ২০১৯ চনত দিয়াই ‘ৱান ইণ্ডিয়া ষ্ট’ৰী’ নামেৰে নিজাকৈ প্ৰডাকচন হাউচ আৰম্ভ কৰিছিল। দিয়াই এবাৰ কৈছিল যে তেওঁ আগতে বিশ্বাস কৰিছিল যে ৩৩ বা ৩৪ বছৰৰ পিছত সুযোগ পোৱা বন্ধ হৈ যাব কিন্তু তেওঁৰ বয়স এতিয়া ৪১ বছৰ যদিও তেওঁ বহু উৎকৃষ্ট কাম কৰি আছে।
