এইবাৰ অনন্য ৰূপত দেখা গৈছে দেওল পৰিয়ালক। কিছু মাহ পূৰ্বে ছানী দেওলৰ ডাঙৰ পুত্ৰ কৰণ দেউলে বিবাহপাশত আবদ্ধ হৈছিল। বলীউডৰ এসময়ৰ বিখ্যাত চিনেমাট’গ্ৰাফাৰ বিমল ৰায়ৰ পৰিয়ালৰ সদস্য দৃষ্টি আচাৰ্যৰ সৈতে কৰণৰ বিবাহ সম্পন্ন হৈছে । কৰণৰ বিয়াৰ এমাহৰ পাছত কৰণ জোহৰৰ ছবি ‘ৰকি ঔৰ ৰাণী কি প্ৰেম কাহানি’ মুক্তি পালে। ছবিখনত ধৰ্মেন্দ্ৰৰ অভিনয়ৰ বাবে প্ৰশংসা লাভ কৰে। কেইবামাহো ধৰি ছবিগৃহত চলি আছে ছানী দেওলৰ ‘গদৰ ২’। ‘গদৰ ২’ ছবিখনৰ সফলতাই ধৰ্মেন্দ্ৰৰ প্ৰথম আৰু দ্বিতীয় পৰিয়ালৰ মাজত এক দূৰত্বৰ সৃষ্টি কৰিছে। এইবাৰ দেওল পৰিয়ালৰ বাবে আন এক সুখৰ খবৰ। কৰণৰ পিছত এইবাৰ বলীউডত প্ৰৱেশ কৰিবলৈ ওলাইছে ছানী দেউলৰ সৰু পুত্ৰও। পুনম ধিলনৰ কন্যা পালোমা ধিলনৰ সৈতে ‘ডোনো’ ছবিৰ জৰিয়তে বলীউডত অভিনেতা হিচাপে আত্মপ্ৰকাশ কৰিবলৈ ওলাইছে ৰাজবীৰ দেউলে।
ইতিমধ্যে খবৰ ওলাইছিল যে ৰাজবীৰে ককাক, পিতৃ আৰু জ্যেষ্ঠ ভাতৃৰ পদাংক অনুসৰণ কৰি বলীউডত প্ৰৱেশ কৰিবলৈ ওলাইছে। অভিনেত্ৰী পুনম ধিলনৰ কন্যা পালোমাও ‘ডোনো’ ছবিৰ জৰিয়তে বলীউডত অভিষেক ঘটাবলৈ গৈ আছে। এইবাৰ ছবিখনৰ মুক্তিৰ তাৰিখ প্ৰকাশ পাইছে। অবনীশ বৰজাত্য পৰিচালিত এই ছবিখন চলিত বৰ্ষৰ ৫ অক্টোবৰত মুক্তি পাব ৷শেহতীয়াকৈ ছবিখনৰ নিৰ্মাতাসকলেও ছ’চিয়েল মিডিয়াত এই খবৰ প্ৰকাশ কৰিছে।
দ্বিতীয় সপ্তাহতো ছবিগৃহত দ্ৰুত ব্যৱসায় অব্যাহত ৰাখিছে ‘গদৰ ২’ ছবিখনে । ইতিমধ্যে ছানী দেওলৰ ছবিখনে ‘পাঠান’, ‘দংগল’, ‘বজৰংগী ভাইজান’ৰ অভিলেখ ভংগ কৰিছে । দ্বিতীয় সপ্তাহলৈ ‘গদৰ ২’ৰ ব্যৱসায় প্ৰায় ৩৩৬ কোটি টকা।
