মন্দিৰা বৰুৱা একক নাৰী , অন্তৰ ভৰি আছে বৰ্ণাধ্য অভিজ্ঞতাৰে নিটোল সংস্কাৰ। জীৱনক নতুন ভাৱে গঢ় দিয়াৰ দক্ষতা দেখি আচৰিত হোৱাই নহয় , জীৱনক নতুন ভাৱে চাবলৈ , জানিবলৈ যেন এটা জলন্ত উদাহৰণ। জীৱন আৰু প্ৰকৃতিক গভীৰ ভাৱে জানিবলৈ , বুজিবলৈ আৰু ভাল পাবলৈ বিনম্ৰ প্ৰয়াস কৰা ব্যক্তি গৰাকী সঁচাকৈ ব্যতিক্ৰমী। সাহস , ধৰ্য্য ,মনোবল আৰু যি কোনো কাম বা চিন্তাক কঠোৰ শ্ৰমৰ দ্বাৰা গতিশীল কৰি তোলা মন্দিৰা বৰুৱা আমাৰ সকলোৰে আদৰণীয়। সৃষ্টিশীল চিন্তাধাৰা আৰু বিশাল মানবীয়তাৰে সৃষ্টি কৰিলে ‘ সাতসৰী ‘ ৰ দৰে এটি অনুষ্ঠানৰ। যি গৰাকী মহীয়সী নাৰীৰ চিন্তাধাৰা আৰু প্ৰচেষ্টাত ‘সাতসৰী ‘ পত্ৰে-পুষ্পে বিকশিত হৈ এডাল বৃহৎ বৃক্ষত পৰিণত হৈছে। যাৰ ছত্ৰ-ছায়াত বহুতো জীৱনে গতি লাভ কৰাত সহায় হ’ব। কোনে কয় – মানৱতা নাই , কোনে কয় , উদাৰতা নাই। মন্দিৰা বৰুৱা যেন উদাৰতাৰ প্ৰতীক। অভিভূত হওঁ তেওঁৰ হৃদয়ৰ বিশালতা আৰু মনৰ উদাৰতাত। লগতে আত্মাৰ অদম্য সাহস আৰু শক্তিয়ে যেন হয় সকলোৰে আদৰ্শ।
গুৱাহাটীৰ নিচিনা ঠাইত য’ত মানুহে এটা অংশত থাকি আন এটা অংশ ভাড়া দিয়ে কেইটামান টকাৰ বিনিময়ত সেইখন গুৱাহাটীতে মন্দিৰা বৰুৱাই নিজৰ বাসগৃহৰ এটা অংশ সাতসৰীৰ কাৰ্যালয় হিচাপে দান কৰাৰ লগতে ৰাইজলৈ আগবঢ়ায় তেওঁৰ পুথি ভঁৰালটো।
কোন বাৰু মন্দিৰা বৰুৱা ?
যোৰহাটৰ সোণাৰী গাৱঁৰ মন্দিৰা বৰুৱা । অভাৱৰ জোৰা মাৰিবলৈ হাঁহ -পাৰ পোহা , ড্ৰাইভাৰ হৈ জীৱন নিৰ্বাহ কৰা মন্দিৰা বৰুৱা । আমাৰ অসম কাকতত -” শিপা খামুচি থকা দেশ চীন “- শিৰোনামাৰে ধাৰাবাহিক ভ্ৰমণ কাহিনী লিখা মন্দিৰা বৰুৱা , অসমৰ কেঁচা চাহপাতৰ পৰা চীনে এক পানীয় প্ৰস্তুত কৰি গীণিজ বুক অৱ ৱৰ্ল্ড ৰেকৰ্ডছত নাম অন্তৰ্ভুক্ত কৰিবলৈ সক্ষম হোৱা কথা লিখা মন্দিৰা বৰুৱা।
মন্দিৰা বৰুৱাৰ দৃষ্টি সুদূৰ প্ৰসাৰিত। সাতসৰীৰ লগত জড়িত হৈ সৃষ্টিশীল কামবোৰ কৰি থকাৰ মাজতে দৈনিক কাকত আৰু আলোচনীত লিখা আৰম্ভ কৰি আঠ খনকৈ কিতাপ লিখি উলিওৱা মন্দিৰা বৰুৱা ।
মন্দিৰা বৰুৱাৰ প্ৰথম খন কিতাপ ‘কলমে পৰশা সিঁচৰিত ভাৱনা’ , প্ৰথম খণ্ড আখ্যান আৰু দৰ্শন দ্বিতীয় খণ্ড , বিবাহ পদ্ধতি আৰু বিয়ানাম , কাব্য সংকলন ‘হৃদয় ঢৌ তোলা শব্দৰ এটি হ্ৰদ’ , বিয়া নাম , অসমীয়া বিবাহ পদ্ধতি আৰু অসমীয়া পৰম্পৰাগত খাদ্যৰ আভাষ ( প্ৰকাশৰ পথত )।
মন্দিৰা বৰুৱাৰ জীৱনৰ অন্য এক কাহিনী -“ছমহীয়া কেচুৱা আয়ুষ্মান চলন্ত বাছৰ ভিতৰতে মৃত্যু হোৱাত , বাছৰ পৰা নামি অ’ট লৈ আহোতে অটোৱালাই জানিব পাৰি খং কৰি গালি পাৰি কৈছিল -‘কি আচৰিত মহিলা , মোৰ অ’টো খন চুৱা কৰিলে। “।
জন্মসূত্ৰে নাটকৰ পৰিৱেশ লাভ কৰা কটন কলেজ আৰু আভিযান্ত্ৰিক কলেজত পঢ়া শেষ কৰি চাকৰিৰ সমান্তৰাল ভাৱে শ্ৰী বিনোদ ভাগৱতীয়ে লিখিছে বিভিন্ন গ্ৰন্থ । অসম চৰকাৰৰ পৰা তেওঁ লাভ কৰিবলৈ সক্ষম হৈছে সাহিত্যিক পেন্সন। কোনো ধৰণৰ প্ৰচাৰত গুৰুত্ব নিদি নীৰৱে তেওঁ লিখি গৈছে এখনৰ পিছত এখন নাটক , কেইবাখনো উপন্যাস।
প্ৰত্যাহ্বানৰ ওচৰত হাৰ নমনা , অদমনীয় সংগ্ৰামী নাৰীশক্তি ড° মন্দিৰা বৰুৱা এগৰাকী অভিযন্তাৰ পত্নী হৈয়ো জীৱিকাৰ বাবে গাড়ীৰ ড্ৰাইভাৰ হ’বলৈ কুণ্ঠাবোধ নকৰা সেই অসীম শক্তিৰ অধিকাৰী নাৰীৰ জীৱনক লৈ নাট্যকাৰ শ্ৰী বিনোদ ভাগৱতীয়ে এখন পূৰ্ণাংগ নাটক “মই মন্দিৰাই কৈছো ” ৰচনা কৰিছে ।
অতি আনন্দৰ বিষয় অহা ২৮ আগষ্টত সাতসৰী সামাজিক -সাংস্কৃতিক উন্নয়ন সংস্থাৰ সৌজন্যত শ্ৰীমন্ত শঙ্কৰদেৱ কলাক্ষেত্ৰত ভালিমী দেৱীৰ পৰিকল্পনা আৰু সত্যজিৎ হাজৰিকাৰ পৰিচালনাত বিনোদ ভাগৱতীৰ ‘মই মন্দিৰাই কৈছো’ নাটক খন মঞ্চস্থ হ’ব। নাটক খনত মহিলা সৱলীকৰণৰ বিষয়ত গুৰুত্ব দিয়া হৈছে। ‘মই মন্দিৰাই কৈছো ‘ নাটক খন সৰ্বাংগ সুন্দৰ হ’ব বুলি আশা ৰাখিছো।
