চিনেমা হৈছে গণমাধ্যমৰ সহজ মাধ্যম। হাজাৰ হাজাৰ শব্দ মানুহক পঢ়োৱাৰ বাবে যিধৰণৰ কৌশলৰ প্ৰয়োজন হয় সেয়া সহজ কথা নহয়; কিন্তু ছবি, কথা আৰু সংগীতৰ উন্নত মিশ্ৰণৰে যিধৰণে এখন চিনেমা নিৰ্মাণ কৰা হয় সেই গণমাধ্যমে সকলোকে মোহিত তথা অনুপ্ৰেৰণা দিবলৈ সফল হয়। সেয়েহে বিশ্বত কিতাপৰ লগতে চিনেমাৰ জনপ্ৰিয়তা আছে। ৰামাৰণ আৰু মহাভাৰত যিমান মানুহে পঢ়া নাই তাতোকৈ অধিক মানুহে ৰামায়ণ আৰু মহাভাৰত টিভিত চাইছে। গতিকে চিনেমা এক শক্তিশালী দৃশ্য-শ্ৰাব্য গণমাধ্যম। শেহতীয়াকৈ মুক্ত পোৱা এখন ছবিয়ে খলকনি তুলিছে। এই ছবিখনে কাশ্মীৰ উপত্যাকাৰ পৰা বিতাড়িত হিন্দু পণ্ডিত সম্প্ৰদায়ৰ কথা বৰ্ণনা কৰিছে। ছবিৰ কথাখিনি/কাহিনীত ৰাজনীতিকে ৰাজনীতি কৰাৰ উপাদান পাইছে বাবেই ছবিখনে এতিয়া সমগ্ৰ দেশতে চৰ্চা লাভ কৰাৰ লগতে বিশ্বৰো দৃষ্টি আকৰ্ষণ কৰিবলৈ সক্ষম হৈছে। বিবেক অগ্নিহোত্ৰীৰ দ্বাৰা পৰিচালিত আৰু জি ষ্টুডিঅ’ৰ দ্বাৰা প্ৰযোজিত এই ছবিখনৰ নাম দ্যা কাশ্মীৰ ফাইলছ।
নব্বৈৰ দশকত অসমত আলফা সমস্যা তুংগত থকাৰ দৰে কাশ্মীৰ উপত্যাকতো সন্ত্ৰাসবাদৰ সমস্যা তুংগত আছিল। সেই সময়ৰ কেন্দ্ৰ চৰকাৰৰ অমনোযোগিতা বুলিয়েই কওক বা ৰাজনীতিৰ কুটিল পাকচক্ৰ বুলিয়েই কওক, কাশ্মীৰৰ লগতে দেশৰ একাধিক প্ৰান্তত সন্ত্ৰাসবাদীৰ সমস্যা বৃদ্ধি পাবলৈ ধৰিছিল। ভাৰতীয় অখণ্ডতাক অস্বীকাৰ কৰি বিচ্ছিন্নতাবাদী মনোভাৱ গঢ় লৈ উঠিছিল। সেই সময়ত মানে ৮০ৰ শেষৰ ফালৰ পৰা নব্বৈৰ দশকটোৰ শেষলৈ কাশ্মীৰত ৰাষ্ট্ৰ বিৰোধী কাৰ্যকলাপ বৃদ্ধি পাইছিল। কাশ্মীৰ উপত্যকাত বৃদ্ধি পোৱা কাশ্মীৰ মুক্তি আন্দোলন তথা সীমান্তৰ সীপাৰৰ পৰা পাকিস্তানৰ পৃষ্ঠপোষকতাত চলা সন্ত্ৰাসবাদী কাৰ্যকলাপে ধৰ্মীয় আগ্ৰাসনৰ সৃষ্টি কৰিছিল। বিশেষত ইছলাম ধৰ্মালম্বীলোকৰ সংখ্যাগৰিষ্ঠতা থকা কাশ্মীৰ উপত্যকাত সন্ত্ৰাসবাদীৰ কাৰ্যকলাপ বা জনতাৰ সমৰ্থনে হিন্দু সংখ্যালঘিষ্ঠক ভয়াৰ্ত কৰি তুলিছিল (ৰাখিছে)। কাশ্মীৰত বসবাস কৰি থকা হিন্দু পণ্ডিত সম্প্ৰদায়ৰ লোকসকলক স্বাভাৱিকভাৱেই কাশ্মীৰত টাৰ্গেট কৰি লোৱা হৈছিল। আৰু ইয়াৰ অংশ স্বৰূপে ইছলাম মৌলবী তথা সন্ত্ৰাসবাদীৰ সহায়ত নেতৃস্থানীয় লোকে হিন্দু পণ্ডিতক সোনকালেই কাশ্মীৰ উপত্যকা এৰি যাবলৈ নিৰ্দেশ জাৰি কৰিছিল। ১৯৮৯-১৯৯৫ৰ ভিতৰত এই কাশ্মীৰি পণ্ডিতসকলে বাধ্য হৈ(মৃত্যু ভয়ত) নিজৰ ঘৰ-বাৰী এৰি জম্মুলৈ তথা দিল্লী বা অন্য ঠাইলৈ পলায়ন কৰিছিল। এনে নহয় যে সেয়া শান্তিপূৰ্ণ পলায়ন আছিল। অভিযোগ অনুসৰি ১৯৯০ৰ পৰা ২০১১ চনটোলৈ সন্ত্ৰাসবাদীৰ দ্বাৰা কাশ্মীৰি পণ্ডিত সম্প্ৰদায়ৰ ৩০০ৰো অধিক লোকৰ মৃত্যু হৈছে। কাশ্মীৰি পণ্ডিতৰ দুৰ্ভাগ্যৰ কথাটো ভাৰতীয় গণতন্ত্ৰৰ এক অন্যতম ক’লা অধ্যায় হিচাপে চিহ্নিত হৈ ৰৈছে।
১১ মাৰ্চ তাৰিখে মুক্তি পোৱা দ্যা কাশ্মীৰ ফাইলছ ছবিখন ৰাজনৈতিক দৃষ্টিভংগীৰ পৰা গুৰুত্বপূৰ্ণ কিয়নো এই ছবিখনে এটা সম্প্ৰদায়ৰ বিড়ম্বনা আৰু অন্য এটা সম্প্ৰদায়ৰ আগ্ৰাসনৰ বৰ্ণনা কৰিছে। আৰু এই বিষয়টোক ৰাজনৈতিক দলবোৰে নিজৰ ধৰণে পৰ্যালোচনা কৰিছে। এটা ভুক্তভোগী পৰিয়ালৰ কাহিনীক চলচিত্ৰৰ ৰূপত অভিনয় শিল্পীৰ জৰিয়তে চিত্ৰায়ন কৰা দ্যা কাশ্মীৰ ফাইলছ ছবিখনক প্ৰধানমন্ত্ৰী নৰেন্দ্ৰ মোদীয়ে প্ৰশংসা কৰাৰ পাছত সমগ্ৰ দেশৰ বিজেপি শাসিত ৰাজ্যত স্বয়ং মুখ্যমন্ত্ৰীসকলে এই ছবি চাবলৈ সকলোকে আহ্বান জনাইছে। ৰাজ্যৰ মুখ্যমন্ত্ৰী ডঃ হিমন্ত বিশ্ব শৰ্মাইও ৰাজ্যৰ কৰ্মচাৰীসকলক এই চিনেমা চাবলৈ আহ্বান জনাইছে।
জনপ্ৰিয় গণমাধ্যম চিনেমাই সমাজক প্ৰভাৱিত কৰি আহিছে। দ্যা কাশ্মীৰ ফাইলছৰ জনপ্ৰিয়তাৰ বাবে পৰিচালক বিবেক অগ্নিহোত্ৰীয়ে দীৰ্ঘসময়ৰৰ পূৰ্বৰ পৰাই টুইটাৰ বা অন্য সামাজিক মাধ্যমবোৰত চিনেমাখনৰ বিষয় সন্দৰ্ভত আলোচনা চক্ৰ জাতীয় বৈঠক অনুষ্ঠিত কৰি এই সম্পৰ্কত চৰ্চা চলাই নিছিল। তাৰ ফলত এই ছবিয়ে সৰ্বাধিক গুৰুত্ব লাভ কৰিছে। অসমৰ প্ৰেক্ষাপটতো এনে একাধিক ফাইলছ আছে, যিবোৰ আমাৰ চলচিত্ৰ উদ্যোগৰ লোকে চিন্তা কৰি চাব পাৰে।
