নৰেন্দ্ৰ মোডী-অমিত শ্বাহ ৰাজ্যত দ্বিতীয়বাৰৰ বাবে বিধানসভা নিৰ্বাচনত প্ৰতিদ্বন্দ্বিতা কৰি যথেষ্ট সফলতা লাভ কৰিলে অৰবিন্দ কেজৰিৱালে। ভোট গণনা অনুসৰি আম আদমি পাৰ্টিয়ে ৫ খনতকৈ অধিক আসন লাভ কৰি প্ৰথমবাৰৰ বাবে গুজৰাট বিধানসভাত একাউণ্ট খুলিবলৈ সক্ষম হৈছে।ৰাজ্য খনত ১২ শতাংশতকৈ অধিক ভোট পাইছে আমি আদমী পাৰ্টিযে।
২০১৭ চনত গুজৰাট বিধানসভা নিৰ্বাচনত আপে ২৯খন আসনত প্ৰতিদ্বন্দ্বিতা কৰিছিল। সকলো সমষ্টিতে তেওঁলোকৰ আমানত ধান জব্দ কৰা হৈছিল। ভোট গণনা অনুসৰি এইবাৰ কেজৰিৱালৰ দলৰ ভোট ১২ শতাংশতকৈ অধিক বৃদ্ধি পাইছে। দিল্লী আৰু পঞ্জাৱ বিধানসভাত জয়লাভ কৰাৰ পাছত গুজৰাটৰ এই সমীক্ষাই আপক ৰাষ্ট্ৰীয় দলৰ মৰ্যাদা লাভ কৰাত সহায় কৰিব বুলি আশা কৰা হৈছে। আপ নেতা তথা দিল্লীৰ উপ-মুখ্যমন্ত্ৰী মনীষ চিছ’দিয়াই বৃহস্পতিবাৰে কয় যে এইবাৰ তেওঁলোকে ৰাষ্ট্ৰীয় দলৰ মৰ্যাদা লাভ কৰিছে।
সৌৰাষ্ট্ৰ আৰু দক্ষিণ গুজৰাটৰ বাহিৰেও আহমেদাবাদ-গান্ধীনগৰৰ কেইবাখনো আসনত কংগ্ৰেছৰ পিছতে দ্বিতীয় স্থান লাভ কৰে আপৰ প্ৰাৰ্থীয়ে। নৰ্মদা, গিৰ-সোমনাথ, সুৰেন্দ্ৰনগৰ, টাপি, আমৰেলি, আৰাৱল্লী, পৰবন্দৰ, দহোদ, দ্বাৰকা আদি জিলাত আপ প্ৰাৰ্থীয়ে উল্লেখযোগ্য ভোট লাভ কৰে। সমীক্ষা সংস্থাসমূহৰ অংশই কয় যে আপৰ এই আচৰিত উত্থানৰ বাবেই বিজেপিয়ে গুজৰাট বিধানসভাত সৰ্বকালৰ অভিলেখ আসন লাভ কৰি ইতিহাস ৰচনা কৰিছে। কংগ্ৰেছ পুনৰ গুজৰাটত ভাল ফলাফল দেখুৱাবলৈ ব্যৰ্থ হল। লোকসভাৰ দৰেই মল্লিকাৰ্জুন খৰ্গে-ৰাহুল গান্ধী দলে গুজৰাট বিধানসভাত ‘বিৰোধী মৰ্যাদা’ হেৰুৱাৰ উপক্ৰম হৈছে।
২০২১ চনৰ উপ-নিৰ্বাচনত আপে অত্যন্ত ভাল প্রদশৰ্ন কৰিবলৈ সক্ষম হৈছিল। দক্ষিণ গুজৰাটৰ চুৰাটত বিৰোধী দল আম আদমি পাৰ্টিয়ে ২৭টা ৱাৰ্ডত জয়লাভ কৰি কংগ্ৰেছক ‘শূন্য’লৈ ঠেলি দিয়ে। প্ৰায় ২৯ শতাংশ ভোট লাভ কৰে। ইয়াৰ কিছু সময়ৰ পাছতে প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহৰ ৰাজ্যত বিজেপিৰ ‘সম্ভাৱ্য প্ৰত্যাহ্বানকাৰী’ হিচাপে অৰবিন্দ কেজৰিৱালৰ নামক লৈ আলোচনা আৰম্ভ হয়।
