লোকসভা নিৰ্বাচনৰ ছমাহ পূৰ্বে পুনৰ ‘ভাৰত জোৰো যাত্ৰা’ আৰম্ভ কৰাৰ পৰিকল্পনা কৰিছে ৰাহুল গান্ধীয়ে। কংগ্ৰেছৰ সূত্ৰ অনুসৰি যোৱা বছৰৰ দৰে এইবাৰো ছেপ্টেম্বৰৰ পৰা ‘ভাৰত জোৰো’ আৰম্ভ কৰাৰ পৰিকল্পনা কৰা হৈছে। লোকসভা নিৰ্বাচনলৈ ছমাহ থকা সময়ত ৰাহুলে সমগ্ৰ দেশতে নৰেন্দ্ৰ মোডী চৰকাৰ আৰু বিজেপিৰ বিৰুদ্ধে দ্বিতীয় পৰ্যায়ৰ ‘ভাৰত জোৰো যাত্ৰা’ আৰম্ভ কৰিব বিচাৰিছে।
দক্ষিণ ভাৰতৰ কন্যাকুমাৰীৰ পৰা আৰম্ভ হৈছিল প্ৰথম ‘ভাৰত জোৰো যাত্ৰা’। উত্তৰ শ্ৰীনগৰত শেষ হৈছিল এই যাত্ৰা । প্ৰায় পাঁচ মাহ ধৰি চলিছিল এই ৪০০০ কিলোমিটাৰ যাত্ৰা। এইবাৰ পূবৰ পৰা পশ্চিম ভাৰতলৈ ভাৰত যাত্ৰা আৰম্ভ কৰিব । অৰুণাচল প্ৰদেশৰ লোহিত জিলাৰ পৰশুৰাম কুণ্ডৰ পৰা আৰম্ভ কৰি গুজৰাটৰ পোৰবন্দৰত মোহনদাস কৰ্মচন্দ গান্ধীৰ জন্মস্থানত যাত্ৰাৰ অন্ত পেলোৱাৰ পৰিকল্পনা চলি আছে। এইবাৰো পাঁচ মাহত তিনি হাজাৰ কিলোমিটাৰতকৈও অধিক যাত্ৰা কৰা হ’ব।
কংগ্ৰেছৰ সূত্ৰ অনুসৰি বিজেপি বিৰোধী দলসমূহক একত্ৰিত কৰি ‘ইণ্ডিয়া’ মিত্ৰজোঁট গঠন কৰা হৈছে। ইয়াৰ সমান্তৰালকৈ মোডী চৰকাৰ আৰু বিজেপিৰ বিৰুদ্ধে ঢৌ সৃষ্টি কৰাটোও গুৰুত্বপূৰ্ণ। ৰাহুল গান্ধীৰ প্ৰথম ‘ভাৰত জোৰো যাত্ৰা’ৰ মূল বাৰ্তা আছিল মোডী চৰকাৰ আৰু বিজেপিৰ বিভাজনকাৰী ৰাজনীতিৰ বিৰুদ্ধে দেশক একত্ৰিত কৰা। লগতে মূল্যবৃদ্ধি আৰু নিবনুৱা সমস্যাক লৈ মোডী চৰকাৰক প্ৰশ্ন কৰা। এইবাৰ তেওঁক ‘ভাৰত জিগা, ইণ্ডিয়া জিতেগা’ মন্ত্ৰেৰে বিজেপিক পৰাস্ত কৰি বিৰোধী মিত্ৰজোঁট জয় কৰিবলৈ আহ্বান জনোৱা হ’ব।
ৰাহুলৰ এই চিন্তাৰ প্ৰতিধ্বনি প্ৰিয়ংকা গান্ধী ভাদ্ৰাৰ কণ্ঠত শুনা গৈছে। মধ্যপ্ৰদেশৰ গোৱালিয়ৰত জনসাধাৰণৰ আন্দোলনত এফালৰ পৰা প্ৰিয়ংকাই বিৰোধী ‘ইণ্ডিয়া’ মিত্ৰজোঁটৰ হৈ প্ৰশ্ন উত্থাপন কৰে। আনহাতে, তেওঁ এইটোও স্পষ্ট কৰি দিলে যে আচল বিষয়টো হ’ল মুদ্ৰাস্ফীতি আৰু নিবনুৱা সমস্যা। প্ৰিয়ংকাই অভিযোগ কৰে যে প্ৰধানমন্ত্ৰীয়ে বিৰোধীৰ বৈঠকৰ পৰাই সকলো বিৰোধী নেতাক চোৰ বুলি মাতিছে। এনে মহান নেতা, বিভিন্ন ৰাজ্যৰ শীৰ্ষ নেতা, যিসকলে গোটেই জীৱন দেশৰ বাবে যুঁজিছে, যিসকলে জনসাধাৰণৰ সমস্যাক লৈ ৰাজনীতি কৰিছে, তেওঁলোকক প্ৰধানমন্ত্ৰীয়ে চোৰ বুলি অপমান কৰি আছে।
কংগ্ৰেছৰ সূত্ৰ অনুসৰি, ছেপ্টেম্বৰৰ পৰা যেতিয়া দ্বিতীয় পৰ্যায়ৰ ‘ভাৰত জোৰো যাত্ৰা’ আৰম্ভ হ’ব, তেতিয়া ৰাজস্থান, ছত্তীশগড়, মধ্যপ্ৰদেশৰ দৰে ৰাজ্যত বিধানসভা নিৰ্বাচন অনুষ্ঠিত হ’ব। সেই কথা মনত ৰাখি ভ্ৰমণৰ পৰিকল্পনা কৰা হৈছে। ভৌগোলিক কাৰণত গোটেই যাত্ৰাটো খোজকাঢ়ি যোৱাৰ পৰিৱৰ্তে কিছুমান ৰাস্তা ব্যৱহাৰ কৰা হ’ব পাৰে।
