২০২৪ চনৰ লোকসভা নিৰ্বাচনত বিজেপিক পৰাস্ত কৰিবলৈ পুনৰ বিৰোধী মিত্ৰজোঁট গঠনৰ বাৰ্তা দিছে মমতা বেনাৰ্জীয়ে। শুকুৰবাৰে মুৰ্ছিদাবাদৰ ছামছেৰগঞ্জ বৈঠকত বিজেপিক আক্ৰমণ কৰাৰ সময়তে মুখ্যমন্ত্ৰীয়ে বিৰোধী ঐক্য গঠনৰ বাৰ্তা প্ৰদান কৰে। তেওঁ কয় –“ সকলো বিৰোধী দল একত্ৰিত হ’ব লাগে। এজনৰ বিপৰীতে যুঁজ দিয়ক। মই একেলগে কাম কৰিবলৈ চেষ্টা কৰিম।“
মমতাই বিগত সময়ত বহুবাৰ বিৰোধী মিত্ৰতা গঢ়াত সক্ৰিয় ভূমিকা গ্ৰহণ কৰি মোদী বাহিনীক উৎখাত কৰা দেখা গৈছে। ২০২১ চনৰ বিধানসভা নিৰ্বাচনত বংগত তৃতীয়বাৰৰ বাবে ক্ষমতালৈ অহাৰ পিছত মুখ্যমন্ত্ৰীগৰাকীয়ে বিজেপি বিৰোধী ঐক্য গঠনৰ ক্ষেত্ৰত সক্ৰিয় হৈ পৰিছিল। লগতে দিল্লীলৈ গৈ বিজেপিৰ বিৰোধী নেতাসকলৰ সৈতে বৈঠকত মিলিত হয়। সেই সময়ত মমতাৰ কংগ্ৰেছ সভানেত্ৰী ছোনিয়া গান্ধীৰ সৈতে বৈঠক হৈছিল। কিন্তু সেই পদক্ষেপ সফল নহ’ল। সময়ৰ লগে লগে কংগ্ৰেছ আৰু তৃণমূলৰ মাজৰ দূৰত্ব বাঢ়ি আহিল। গোৱাত বিধানসভা নিৰ্বাচনৰ সময়তে দুয়োটা দলৰ মাজত এই দুৰত্ব পোহৰলৈ আহে। কিছুদিন পূৰ্বে ৰাহুল গান্ধীয়ে মেঘালয় নির্বাচনৰ সময়ত তৃণমূলক চোকা সমালোচনা কৰিছিল ৷ ফলত সংঘাত ক্ৰমাৎ বাঢ়ি গ’ল।
কিছুদিন পূৰ্বে জেডিএছ নেতা এইচ ডি কুমাৰস্বামী, সমাজবাদী পাৰ্টিৰ নেতা অখিলেশ যাদৱ, বিহাৰৰ মুখ্যমন্ত্ৰী নীতিশ কুমাৰ, উপ-মুখ্যমন্ত্ৰী তেজস্বী যাদৱে নবন্নাত মমতাক সাক্ষাৎ কৰিছিল। মমতাই ওড়িশালৈ গৈ সেই ৰাজ্যৰ মুখ্যমন্ত্ৰী নবীন পাটনাইকক সাক্ষাৎ কৰে ৷ অৱশ্যে ওড়িশাৰ মুখ্যমন্ত্ৰী গৰাকীয়ে কয় যে সেই বৈঠকত ৰাজনীতিৰ বিষয়ে আলোচনা হোৱা নাছিল।
বৃহস্পতিবাৰে মালদাৰ ইংৰাজী বজাৰত তৃণমূলৰ ‘নবজোৰ’ অনুষ্ঠানত অভিষেক বেনাৰ্জীৰ মঞ্চ পৰিদৰ্শন কৰে মমতাই। লগতে আগন্তুক লোকসভা নিৰ্বাচনত ‘পৰিৱৰ্তন’ৰ আহ্বান জনায়। তেওঁ কয়, ‘কৰ্ণাটকৰ পৰা পতন আৰম্ভ হ’লে আমি সুখী হ’ম। বিজেপিক ভোট নিদিব! য’ত আমি ভোটৰ বাবে আহ্বান জনাও তাত আন কাৰোবাক ভোট নিদিব । ভোট নষ্ট নকৰিবা।” ইয়াৰ পূৰ্বে মুখ্যমন্ত্ৰীয়ে ৰাজ্যত তৃতীয় কাৰ্যকালৰ দ্বিতীয় বৰ্ষপূৰ্তি উপলক্ষে বিজেপি বিৰোধী সকলো শক্তিক একত্ৰিত হ’বলৈ আহ্বান জনাইছিল। তৃণমূল নেতাই বাৰে বাৰে কৈ আহিছে যে সকলো বিৰোধীয়ে একত্ৰিত হৈ কেন্দ্ৰত পৰিৱৰ্তন আনিব লাগে।
