একেৰাহে দ্বিতীয় বাৰৰ বাবে উত্তৰ প্ৰদেশৰ মুখ্যমন্ত্ৰী হিচাপে অহা ২৫ মার্চত শপত গ্ৰহণ কৰিব যোগী আদিত্যনাথে ৷ সেইদিনা বিয়লি ৪ বজাত লক্ষ্ণৌৰ ভাৰত ৰত্ন অটল বিহাৰী বাজপেয়ী একানা ক্ৰিকেট ষ্টেডিয়ামত অনুষ্ঠিত হ’বলগীয়া শপত গ্ৰহণৰ বাবে আৰম্ভ হৈছে ব্যাপক প্ৰস্তুতি ৷ শপত গ্ৰহণ অনুষ্ঠানত মুখ্য অতিথি হিচাপে উপস্থিত থাকিব প্ৰধানমন্ত্ৰী নৰেন্দ্ৰ মোদী ৷ তদুপৰি এই অনুষ্ঠানত উপস্থিত থাকিব হাই প্ৰফাইল নেতা আৰু আগশাৰীৰ ব্যৱসায়ী ৷ গৃহমন্ত্ৰী অমিত শ্বাহ, বিজেপিৰ ৰাষ্ট্ৰীয় সভাপতি জে পি নাড্ডাৰ লগতে বিজেপি শাসিত ৰাজ্যসমূহৰ মুখ্যমন্ত্ৰীকো আমন্ত্ৰণ জনোৱা হৈছে অনুষ্ঠানলৈ । অক্ষয় কুমাৰ, কংগনা ৰাণাৱট, বনি কাপুৰকে ধৰি বলীউডৰ কেইবাজনো তাৰকাইও নিমন্ত্ৰণ লাভ কৰিছে শপত গ্ৰহণ অনুষ্ঠানলৈ ।
শেহতীয়াকৈ মুক্তি প্ৰাপ্ত হিন্দী ছবি “দ্য কাশ্মীৰ ফাইলছ”ৰ অভিনেতা-অভিনেত্ৰী আৰু কলা-কুশলীসকলকো শপত গ্ৰহণ অনুষ্ঠানলৈ আমন্ত্ৰণ জনোৱা হৈছে। বিশেষকৈ অভিনেতা অনুপম খেৰ আৰু পৰিচালক বিবেক অগ্নিহোত্ৰী উপস্থিত থাকিব বুলি আশা কৰা হৈছে।
উল্লেখ্য যে ষ্টেডিয়ামৰ চকীসমূহৰ উপৰি অতিৰিক্তভাৱে ২০,০০০ চকীৰ ব্য়ৱস্থা কৰা হ’ব ৷ কিয়নো সমগ্ৰ উত্তৰ প্ৰদেশৰ পৰা বিজেপি কৰ্মীসকলে অনুষ্ঠানটোত অংশগ্ৰহণ কৰিব। ৰাজ্যখনত সম্পূৰ্ণ কাৰ্যকাল সম্পূৰ্ণ কৰাৰ পিছত পুনৰ ক্ষমতালৈ উভতি অহা যোগী আদিত্যনাথ হৈছে যোৱা ৩৭ বছৰৰ ভিতৰত প্ৰথমগৰাকী মুখ্যমন্ত্ৰী ৷ বিজেপিয়ে উত্তৰ প্ৰদেশত ৪০৩ টা সমষ্টিৰ ভিতৰত ২৫৫ টাত জয়লাভ কৰিছে ৷
