আজি বিশ্ব গ্ৰহাণু দিৱস ৷ মহাকাশৰ অসীম ৰহস্যৰ উপাদানসমূহৰ অন্যতম হৈছে এই গ্ৰহাণুসমূহ ৷ প্ৰকৃতার্থত গ্ৰহাণুসমূহ হৈছে কিছুআন আকাশী শিলাখণ্ড ৷ যিসমূহ আকৃতিত এটা গ্ৰহতকৈ সৰু, কিন্তু গ্ৰহৰ দৰেই সূৰ্য্যৰ চাৰিওফালে প্ৰদক্ষিণ কৰি থাকে। গ্ৰহাণুসমূহৰ আকাৰ ১০ মিটাৰ ৰ পৰা ৫৩০ কিলোমিটাৰ ব্যাসার্ধৰ হ’ব পাৰে।
যদিও বেছিভাগ গ্ৰহাণুৱে পৃথিৱী আৰু ইয়াৰ সমৃদ্ধিশালী জীৱনৰ প্ৰতি ভাবুকি কঢ়িয়াই আনিব নোৱাৰে, আন কিছুমান গ্ৰহাণু নিৰাপদ নহয় ৷ এই গ্ৰহানুসমূহৰ পৃথিৱীৰ সৈতে সংঘৰ্ষ হ’লে বিপৰ্যয়ৰ সৃষ্টি কৰিব পাৰে। সেয়েহে গ্ৰহাণুৰ প্ৰভাৱৰ বিপদৰ বিষয়ে সজাগতা সৃষ্টিৰ বাবে প্ৰতি বছৰে ৩০ জুন দিনটো আন্তঃৰাষ্ট্ৰীয় গ্ৰহাণু দিৱস হিচাপে পালন কৰা হয়।
২০১৬ চনৰ ডিচেম্বৰ মাহত ৰাষ্ট্ৰসংঘৰ সাধাৰণ পৰিষদে প্ৰস্তাৱ গ্ৰহণ কৰি ৩০ জুনক আন্তঃৰাষ্ট্ৰীয় গ্ৰহাণু দিৱস হিচাপে নিৰ্ধাৰণ কৰে। ১৯০৮ চনৰ ৩০ জুনত চাইবেৰিয়াৰ ওপৰত টুংগুস্কা গ্ৰহাণুৰ প্ৰভাৱৰ বৰ্ষপূৰ্তি উদযাপনৰ বাবে এই দিনটো বাছনি কৰা হৈছিল।
আন্তৰ্জাতিক গ্ৰহাণু দিৱসৰ উদ্দেশ্য হৈছে গ্ৰহাণুৰ আঘাত হ’লে কি ধৰণৰ ধ্বংসলীলা হ’ব পাৰে সেই বিষয়ে সজাগতা সৃষ্টি কৰা। যিহেতু বহুতে গ্ৰহাণু আৰু ইয়াৰ ফলত পৃথিৱীৰ বাবে সৃষ্টি হ’ব পৰা বিপদৰ বিষয়ে অৱগত নহয় , সেয়েহে তেওঁলোকক পৰিঘটনা, অভিযান আদিৰ জৰিয়তে এই ভাবুকিৰ সৈতে পৰিচিত কৰাটো অতি গুৰুত্বপূৰ্ণ ৷
কেইবাটাও সংস্থাই গ্ৰহাণুৱে সৃষ্টি কৰা বিপদৰ বিষয়ে সজাগতা বিয়পোৱাৰ বাবে কাম কৰি আছে আৰু ইয়াৰে ভিতৰত বি ৬১২ অন্যতম। অনুষ্ঠানৰ আয়োজন, শৈক্ষিক সামগ্ৰী বিতৰণ, আৰু অন্যান্য কার্যসূচীৰ লগতে অনলাইন অভিযান চলাই এই দিৱস উদযাপন কৰা হয়।
