আজি অতিন্দ্ৰিয়বাদী বা ৰহস্যবাদী কবি নলিনীবালা দেৱীৰ স্মৃতি দিৱস । সেইসময়ত ছোৱালীয়ে স্কুলীয়া শিক্ষা লোৱাৰ দস্তুৰ নাছিল বাবে তেওঁ ঘৰুৱা শিক্ষকৰ ওচৰত শিক্ষা গ্ৰহণ কৰিছিল । ১৯০৯ চনত ১২ বছৰ বয়সতে বিয়াত বহাৰ পিছত মাথোঁ ১৯ বছৰ বয়সতে বৈধৱ্যক আকোৱালি ল’বলগীয়া হৈছিল । দহ বছৰ বয়সতে তেওঁ পিতা নামৰ এটি কবিতাৰে নিজৰ কাব্য প্ৰতিভাৰ পৰিচয় দিছিল । তেওঁ পিতৃ নবীন চন্দ্ৰ বৰদলৈৰ সৈতে স্বাধীনতা আন্দোলনতো অংশগ্ৰহণ কৰিছিল । সন্ধিয়াৰ সুৰ, সপোনৰ সুৰ, পৰশমণি আদি তেওঁৰ কবিতা পুথি । এৰি অহা দিনবোৰ তেওঁৰ আত্মজীৱনী । শান্তিপথ একমাত্ৰ প্ৰবন্ধ পুথি । ১৯৫৪ চনত যোৰহাটত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল ।এই পদ লাভ কৰা তেওঁ প্ৰথমগৰাকী মহিলা । ১৯৬৭ চনত তেওঁৰ অলকানন্দা কাব্যগ্ৰন্থৰ বাবে তেওঁ সাহিত্য অকাডেমি বঁটা লাভ কৰে । তেওঁ অসম সংঘ আৰু প্ৰাদেশিক মহিলা সমিতিৰ নগাঁও অধিৱেশনৰো সভাপতি আছিল তেওঁ । সদৌ অসম মইনা পাৰিজাতৰ তেওঁ অন্যতম প্ৰতিষ্ঠাপক আছিল । ১৯৭৭ চনৰ আজিৰ দিনটোতে তেওঁৰ দেহাৱসান ঘটে । কবিগৰাকীলৈ আমাৰ প্ৰণাম ।
আজি অসমৰ প্ৰথমগৰাকী মহিলা চলচ্চিত্ৰ পৰিচালক সুপ্ৰভা দেৱীৰ ওপজা দিন । ১৯৩৮ চনৰ আজিৰ দিনটোতে ডিগবৈত তেওঁৰ জন্ম হৈছিল । তেওঁ নিজৰ স্বামী দ্বিজেন্দ্ৰ নাৰায়ণ দেৱৰ সৈতে যোগ-বিয়োগ, তৰামাই, মৰমী, ৰাংঢালী আদি পৰিচালনা কৰাৰ উপৰি ১৯৮৪ চনত স্বামীৰ মৃত্যুৰ পিছত তেওঁ নয়নমণি চলচ্চিত্ৰখন পৰিচালনা কৰে । তাৰপিছত ১৯৮৬ চনত সৰবজান নামৰ আন এখন চলচ্চিত্ৰও পৰিচালনা কৰে । ২০০৩ চনত তেওঁ গুৱাহাটী দূৰদৰ্শনৰ বাবে জিলিকাব লুইতৰে পাৰ নামৰ ধাৰাবাহিক এখনো নিৰ্মাণ কৰে । ১৯৮৫ চনত তেওঁ অসম চৰকাৰৰ শিল্পী দিৱস বঁটা লাভ কৰে । এইগৰাকী পৰিচালকলৈ আমাৰ প্ৰণাম ।
আজি আন্তঃৰাষ্ট্ৰীয় খ্যাতিসম্পন্ন অভিনেতা ইন্দ্ৰ বণিয়াৰ ওপজা দিন ।১৯৪২ চনৰ আজিৰ দিনটোতে লখিমপুৰ জিলাৰ ধলপুৰত তেওঁৰ জন্ম হৈছিল । ১৯৬৪ চনত তেওঁ অসম ৰাজ্যিক বিদ্যুৎ পৰিষদৰ চাকৰিত সোমায় । সৰুৰে পৰাই তেওঁৰ অভিনয়ত ৰাপ আছিল । তেওঁ অভিনয় কৰা প্ৰথমখন চলচ্চিত্ৰ আছিল খোজ (১৯৭৫) । ১৯৬৪ চনত তেওঁ আকাশবাণী গুৱাহাটীৰ নিয়মীয়া নাট্যশিল্পীৰ স্বীকৃতি লাভ কৰে । অনাতাঁৰ নাট গোৱৰ্ধন চৰিত আৰু মইনা সংবাদৰ যোগেদি তেওঁ বিশেষ জনপ্ৰিয়তা অৰ্জন কৰে । জাহ্নু বৰুৱাৰ হালধীয়া চৰায়ে বাওধান খায় চলচ্চিত্ৰত কৰা অভিনয়ৰ বাবে তেওঁ লোকাৰ্ণো চলচ্চিত্ৰ মহোৎসৱত শ্ৰেষ্ঠ অভিনেতাৰ বঁটা লাভ কৰে । এই বঁটা লাভ কৰা তেৱেঁই প্ৰথমগৰাকী অসমীয়া অভিনেতা । শ্ৰীমতী মহিমাময়ী, অপৰূপা, অগ্নিস্নান, হলধৰ, যৌৱনে আমনি কৰে আদি তেওঁ অভিনয় কৰা কেইখনমান জনপ্ৰিয় চলচ্চিত্ৰ । আশীৰ দশকত তেওঁ পূবেৰুণ থিয়েটাৰৰ যোগেদি ভ্ৰাম্যমাণ থিয়েটাৰ জগততো প্ৰৱেশ কৰে । অভিনেতাগৰাকীলৈ আমাৰ প্ৰণাম ।
