অসমত এই মুহূৰ্তত আটাইতকৈ চৰ্চিত নামটোৱেই হৈছে লাভলীনা বৰগোহাঁই। অলিম্পিকলৈ নিৰ্বাচিত হোৱা অসমৰ প্ৰথম মহিলা খেলুৱৈ লাভলীনাই ১৭ জুলাইত উৰা মাৰিব জাপানৰ টকিঅ’লৈ। ১৫ টা দিন ইটালীৰ আইছিছি ত প্ৰশিক্ষণৰত লাভলীনাই বিগত ডেৰটা বছৰে বাৰমূখীয়াৰ ঘৰখনৰ পৰা আতৰি থাকি আৰম্ভ কৰিছিল কঠোৰ অনুশীলন ।সম্প্ৰতি বাহিৰৰ জগতখনৰ পৰা সম্পূৰ্ণৰূপে আতৰাই শাৰীৰিক আৰু মানসিকভাৱেও প্ৰস্তুত কৰি তোলা হৈছে খেলুৱৈ গৰাকীক ।
খেল জগতখনত লাভলীনাৰ যাত্ৰা আছিল অনন্য। ২০১২ চনত প্ৰথমবাৰৰ বাবে বক্সিঙৰ ক্ষেত্ৰখনত ভৰি দিয়া লাভলীনাৰ সপোন আছিল অলিম্পিক খেলা। ইয়াৰপূৰ্বে কিকবক্সিং লাভলীনাই সেইসময়ত অসমৰ সোণাপুৰত অনুষ্ঠিত হোৱা ৰাষ্ট্ৰীয় পৰ্যায়ৰ প্ৰতিযোগিতাত সোণৰ পদক বুটলিবলৈ সক্ষম হৈছিল।২০১১ চনত ভাৰতীয় ক্ৰীড়া প্ৰাধিকৰণ প্ৰশিক্ষণ কেন্দ্ৰ লৈ (ছাই) নিৰ্বাচিত হোৱা লাভলীনাই ২০১২ চনতহে প্ৰথমবাৰৰ বাবে বক্সিঙৰ ৰিঙত খোজ দিয়ে।
বক্সিঙতো নিজৰ প্ৰতিভাৰ পৰিচয় দি ৰাষ্ট্ৰীয় পৰ্যায়ৰ লগতে আন্তঃৰাষ্ট্ৰীয় পৰ্যায়তো সুনাম অৰ্জন কৰিবলৈ সক্ষম হ’য়। অষ্ট্ৰেলিয়াৰ গল্ডকষ্টত অনুষ্ঠিত হোৱা কমনৱেলথ গেমছত ভাগ লোৱাৰ লগতে ২০১৮ চনত এআইবিএ মহিলা বিশ্ব বক্সিং প্ৰতিযোগিতাত ব্ৰঞ্জ, ২০১৯ ত এআইবিএ বিশ্ব মহিলা বক্সিঙত সোণৰ পদক লাভ কৰে । একেদৰে নতুন দিল্লীত অনুষ্ঠিত হোৱা প্ৰথম ভাৰতীয় মুকলি আন্তঃৰাষ্ট্ৰীয় বক্সিং প্ৰতিযোগিতাত ৰূপৰ পদক আৰু গুৱাহাটীত অনুষ্ঠিত হোৱা দ্বিতীয় ভাৰতীয় মুকলি বক্সিং প্ৰতিযোগিতাত তৃতীয় স্থান পাবলৈ সক্ষম হ’য়।
৬৯ কেজি শাখাত খেলা লাভলীনাই অতি কম সময়ৰ ভিতৰত ভাৰতীয় খেল জগতখনলৈ আগবঢ়োৱা অনবদ্য অৱদানৰ বাবে ভাৰত চৰকাৰে ২০২০ চনত অৰ্জুন বঁটাৰে বিভূষিত কৰিছিল। অলিম্পিকলৈ যোগ্যতা অৰ্জন কৰা অসমৰ প্ৰথম গৰাকী মহিলা খেলুৱৈ ৰূপে লাভলীনাই ইতিহাসৰ পাতত নিজৰ নাম খোদিত কৰিলে।
১৯৯৭ চনৰ ২ অক্টোবৰত গোলাঘাট জিলাৰ বৰপথাৰ বাৰমূখীয়া গাঁৱৰ এটা অতি সাধাৰণ পৰিয়ালত জন্ম গ্ৰহণ কৰা লাভলীনাৰ পিতৃ টিকেন বৰগোঁহাই আৰু মাতৃ মাননি বৰগোঁহাইৰ তিনিগৰাকী কন্যাৰ কনিষ্ঠ লাভলীনাৰ এই যাত্ৰা সহজ নাছিল। অতি পিছপৰা অঞ্চলৰ এই খেলুৱৈগৰাকীয়ে আনৰ পৰা ধাৰ লোৱা গ্ল’ভছ ,জোতা ,কাপোৰ পিন্ধি বক্সিঙৰ ৰিঙত ভৰি থৈ আজি অসমৰ লগতে ভাৰত তথা বিশ্বৰ বাবেই এটা চিনাকি নাম হৈ পৰিল। ।
সততে সম্বৰ্ধনা আদি গ্ৰহণ কৰি বেয়া পোৱা লাভলীনা অত্যন্ত প্ৰচাৰবিমুখ আছিল । অৱশ্যে এই মানসিকতাই খেলুৱৈ গৰাকীক একান্তমনে খেলত মনোনিবেশ কৰি লক্ষ্য প্ৰাপ্তিত যে সহায় কৰিলে সেই কথা আজি এশ শতাংশ সঁচা প্ৰমাণিত হ’ল।
