মঙলদৈ নগৰ বালিকাত নৱম শ্ৰেণীত পঢ়াৰ পৰাই জিণ্টিমণিয়ে ক্ৰিকেটৰ প্ৰতি আকৰ্ষিত হৈ মঙলদৈ ষ্টেডিয়ামত অভ্যাস আৰম্ভ কৰিছিল । ক্ৰমান্বয়ে ভাল খেল প্ৰদর্শন কৰিবলৈ সক্ষম হৈছিল জিণ্টিমণিয়ে , যাৰ কাৰণে পৰৱৰ্তী সময়ত অসম দলত স্থান লাভ কৰিবলৈ সক্ষম হৈছিল আৰু পৰৱৰ্তী সময়ত মহিলা ভাৰতীয় B টীমত স্থান লাভ কৰিবলৈ সক্ষম হৈছিল জিণ্টিমণি কলিতা । যি আছিল অসম মহিলা ক্ৰিকেটৰ বাবে গৌৰৱৰ কথা আৰু আগন্তুক মহিলা আই পি এল খেলৰ নিলামৰ তালিকাত অন্তৰ্ভুক্ত হৈছে মঙলদৈ মহাবিদ্যালয়ৰ ছাত্ৰী জিণ্টিমণি কলিতাৰ নাম ।
মঙলদৈ জলসিঞ্চন বিভাগৰ চতুৰ্থ শ্ৰেণীৰ কৰ্মচাৰী পিতৃ মুকুল কলিতা আৰু মাতৃ শেৱালি কলিতাৰ জীয়ৰী জিণ্টিমণি কলিতাই নৱম শ্ৰেণীত পঢ়ি থকাৰ সময়তেই মঙলদৈ ষ্টেডিয়ামত নিজ ভাতৃক থ’বলৈ অহা-যোৱা কৰা জিণ্টিমণিয়ে নিজেও আকৰ্ষিত হৈ পৰিছিল ক্ৰিকেটৰ প্ৰতি । তেওঁৰ আকৰ্ষণ দেখি ষ্টেডিয়ামত ক্ৰিকেটৰ অভ্যাস কৰিবলৈ দিছিল প্ৰশিক্ষকসকলে । ক্ৰমাৎ ভাল খেল প্ৰদৰ্শন কৰিবলৈ আৰম্ভ কৰে । কিন্তু সমস্যা তাতে হ’ল, কিয়নো মঙলদৈত কোনো ছোৱালীয়ে ক্ৰিকেট নেখেলে, পিছে কিশোৰীগৰাকীৰ জেদ ক্ৰিকেট খেলুৱৈ হ’বলৈ ।
মঙলদৈ ষ্টেডিয়ামত পুৰুষ খেলুৱৈৰ লগতে অভ্যাসত নামিল জিণ্টি । গুৱাহাটীত পূৰ্ব পৰীক্ষাত খেলাৰ বাবে আমন্ত্ৰণ জনালে জিণ্টিমণি কলিতাক । নিৰ্বাচিত হ’ল প্ৰথমে অসম মহিলা দলৰ আণ্ডাৰ ১৯ত খেলিবলৈ আৰু এটা বছৰ পূৰ্বে ক্রিকেটৰ অনুশীলন আৰম্ভ কৰা কিশোৰীগৰাকী নিৰ্বাচিত হ’ল অসম দলত আণ্ডাৰ ১৯ত । অসম মহিলা ক্ৰিকেট ছিনিয়ৰ দলতো বিভিন্ন ৰাজ্যৰ লগত ক্ৰিকেট খেলি অভিজ্ঞতা অৰ্জন কৰিলে কিশোৰীগৰাকীয়ে ।
কঠোৰ অনুশীলন অব্যাহত ৰাখিলে কিশোৰীগৰাকীয়ে, এগৰাকী ভাল বলাৰ হোৱাৰ মন ৰখা জিণ্টিমণিৰ সপোন ভাৰতীয় ক্ৰিকেট দলত স্থান লাভ কৰা । কিন্তু পিতৃ মঙলদৈ জলসিঞ্চন বিভাগৰ চতুৰ্থ শ্ৰেণীৰ কৰ্মচাৰী মুকুল কলিতাই ক্ৰিকেটৰ নিচিনা খৰচী খেল খেলা জিণ্টিমণিক লৈ বিভিন্ন সমস্যাৰ সন্মুখীন হৈছিল ।
তাৰ মাজতে মঙলদৈ ষ্টেডিয়াম কৰ্তৃপক্ষই বিভিন্ন সময়ত খেল খেলিবলৈ সহায় আগবঢ়ালে । শেহতীয়াভাৱে মঙ্গলদৈ মহাবিদ্যালয়ৰ দ্বিতীয় ষাণ্মাসিকৰ ছাত্ৰী জিণ্টিমণিয়ে ভাল খেল প্ৰদর্শন কৰাৰ বাবে আগন্তুক হ’ব লগা মহিলা আই পি এলৰ নিলামৰ তালিকাত অন্তৰ্ভুক্ত হ’বলৈ সক্ষম
হৈছে ।
২০২৩ বৰ্ষৰ ১৩ ফেব্ৰুৱাৰীত মুম্বাইত অনুষ্ঠিত হ’ব লগা নিলামক লৈও এতিয়া অপেক্ষা কৰিছে প্ৰতিগৰাকী ক্ৰিকেটপ্ৰেমীয়ে ।
