৫ অক্টোবৰৰ পৰা আৰম্ভ হ’ব এদিনীয়া বিশ্বকাপ। বিচিচিআইয়েও আইপিএলৰ মাজভাগত সেই প্ৰতিযোগিতাক লৈ প্ৰস্তুতি আৰম্ভ কৰিছে। শুকুৰবাৰে প্ৰতিযোগিতাখনৰ আয়োজনৰ বাবে এখন কমিটী গঠনৰ সিদ্ধান্ত গ্ৰহণ কৰা হয় ৷
ব’ৰ্ডৰ মতে, সভাপতি, সম্পাদক, কোষাধ্যক্ষ, ভাৰপ্ৰাপ্ত মুখ্য কাৰ্যবাহী বিষয়া আৰু কেইবাজনো জ্যেষ্ঠ বিষয়া কমিটীত থাকিব। এই সমিতিখন অহা ২৭ মে’ত আহমেদাবাদত ব’ৰ্ডৰ বিশেষ সাধাৰণ সভাত আনুষ্ঠানিকভাৱে গঠন কৰা হ’ব ৷ বিচিচিআই ইতিমধ্যে বিশ্বকাপৰ কথা মনত ৰাখি বিভিন্ন ৰাজ্যিক সংগঠনলৈ ধন প্ৰেৰণ কৰিছে। সেই ধন আন্তঃগাঁথনি উন্নয়নৰ বাবে ব্যৱহাৰ কৰা হ’ব। বেছিভাগ ক্ষেত্ৰতে জৰুৰী আন্তঃগাঁথনিৰ কামৰ প্ৰয়োজন। ইয়াৰ উপৰিও দৰ্শনাৰ্থীৰ সুবিধাৰ ওপৰত গুৰুত্ব আৰোপ কৰা হৈছে ৷
মহিলা প্ৰিমিয়াৰ লীগক লৈ এখন কমিটী গঠন কৰাৰ কথা আছিল। কিন্তু পৰৱৰ্তী প্ৰতিযোগিতাৰ তাৰিখ এতিয়াও নিৰ্ণয় হোৱা নাই। সেই সন্দর্ভতো বৈঠকত আলোচনা কৰা হ’ব ৷ ব’ৰ্ডৰ এক সূত্ৰই কয়, ‘অহা বছৰ অষ্ট্ৰেলিয়াৰ মহিলা দল এই দেশলৈ আহিব। ফেব্ৰুৱাৰী মাহৰ তৃতীয় সপ্তাহলৈকে ভাৰতৰ বিৰুদ্ধে খেলিব। ইয়াৰ পিছত মহিলা প্ৰিমিয়াৰ লীগ আৰম্ভ হ’ব । দীপাৱলীৰ সময়ত পুৰুষৰ বিশ্বকাপ অনুষ্ঠিত হ’ব৷”
শেহতীয়া সময়ত ভাৰতীয় দলটোৱে আঘাতৰ সন্মুখীন হৈছে। সেয়েহে প্ৰতিটো ৰাজ্যিক দলত ব’ৰ্ডৰ ফিজিঅ’ আৰু প্ৰশিক্ষক নিযুক্তি দিয়া হ’ব। বিচিচিআইয়ে বিচাৰে যে যিকোনো এনচিএ প্ৰমাণিত সহায়ক কৰ্মচাৰী ৰাজ্যিক দলসমূহৰ সৈতে সংযুক্ত হওক। লগতে প্ৰতিটো দলৰ বাবে এটা নিৰ্দিষ্ট ফিটনেছ মডিউল প্ৰস্তুত কৰা হ’ব, যাতে কোনো ক্ৰিকেটাৰে বেছিকৈ আঘাত নাপায়।
