বিজ্ঞান প্ৰযুক্তিৰ সম্প্ৰতি সময়ছোৱাত ডিজিটেল ইণ্ডিয়াৰ শ্লোগানৰ মাজত অসমৰ কাৰিকৰী শিক্ষাৰ অৱস্থা একেবাৰে শোচনীয়। অসম চৰকাৰ তথা শিক্ষা বিভাগৰ চূড়ান্ত দায়িত্বহীনতাত পৰিণত হৈছে ৰাজ্যৰ ২৮ খন পলিটেকনিক শিক্ষানুষ্ঠান। পলিটেকনিকসমূহত অধ্যয়নৰত ছাত্র-ছাত্ৰীয়ে আজিৰ তাৰিখত নানা সমস্যাৰ মাজতে শিক্ষা গ্ৰহণ কৰিব লগা হৈছে।
যি সময়ত আমাৰ চৰকাৰে নতুন শিক্ষা নীতি গ্ৰহণ কৰিছে, সেই সময়তে অসমৰ বহু পলিটেকনিকত নাই ছাত্ৰাবাস। পলিটেকনিকত ছাত্ৰীনিবাস আছে যদিও কিছুমান পলিটেকনিকত ছাত্ৰীনিবাস বন্ধ হৈ আছে। যাৰ ফলত ছাত্ৰ-ছাত্ৰীয়ে বহুত সমস্যাৰ সন্মুখীন হ’ব লগা হৈছে। উল্লেখযোগ্য যে কম্পিউটাৰ ইঞ্জিনিয়াৰিং, ইলেক্ট্রিকেল, মেকানিকেল, অট’মোবাইল, চিভিল, মাইনিং কেমিকেল, বায়’ মেডিকেল, প্রিন্টিং, ইলেক্ট্রনিক্স এণ্ড টেলিকমিউনিকেচন, ফুড প্রচেছিং, আর্কিটেকচাৰ, ইণ্ডাষ্ট্ৰীয়েল প্ৰডাকচন, এগ্রিকালচাৰ, ইন্সট্রুমেন্টিচন, মডার্ণ অফিচ মেনেজমেন্ট, ফেশ্বন টেকন’লজি, টেক্সটাইল টেকন’লজি আৰু টেক্সটাইল ডিজাইন আদি বিভিন্ন বিষয়ৰ শিক্ষা পলিটেকনিকসমূহে প্ৰদান কৰি আহিছে। এইখিনিতে উল্লেখ কৰাৰ প্ৰয়োজন যে কাৰিকৰী শিক্ষা সঞ্চালকালয়ৰ অধীনত ৰাজ্যৰ পলিটেকনিক শিক্ষানুষ্ঠানসমূহ পৰিচালিত হয়।
কিন্তু পলিটেকনিকসমূহত ছাত্ৰ-ছাত্ৰীৰ সংখ্যা বৃদ্ধি পোৱাৰ বিপৰীতে বিষয় অনুপাতে শিক্ষক নাই। উদাহৰণস্বৰূপে গোৱালপাৰা পলিটেকনিকত চিভিল ইঞ্জিনিয়াৰিং বিভাগত তৃতীয় ষান্মাসিকত ছাত্ৰ-ছাত্ৰীৰ সংখ্যা হৈছে ৬০ জনৰো অধিক আৰু পঞ্চম ষান্মাসিকতো ছাত্র-ছাত্ৰীৰ সংখ্যা একেই। এই বিভাগটোত মুৰব্বী অধ্যাপক আছে যদিও তেখেত বৰ্তমান চিৰাং পলিটেকনিকৰ অধ্যক্ষৰ পদত অধিষ্ঠিত হৈ আছে। ফলস্বৰূপে ইয়াত সময় দিব নোৱাৰে। ইয়াত স্থায়ী প্ৰৱক্তা নাই, ঠিকাভিত্তিক প্ৰৱক্তাৰ সংখ্যা এজন। এনে পৰিস্থিতিত দুটা শ্ৰেণীত এজন প্ৰৱক্তাই পাঠদান কৰিবলগীয়া হৈছে। যাৰ ফলত পাঠদানত বহুত সমস্যাৰ সন্মুখীন হৈছে। যেনে এটা শ্ৰেণীত পাঠদান কৰিলে আনটো শ্ৰেণীত পাঠদান নহয়।
আন এক গুৰুত্বপূৰ্ণ দিশ হৈছে প্রায়সমূহ পলিটেকনিকত ব্যৱহাৰিক পৰীক্ষাৰ বাবে নাই যন্ত্র-পাতি, সা-সৰঞ্জাম। আনকি পৰিস্থিতি এনে পৰ্যায় পাইছেগৈ যে যন্ত্ৰপাতিৰ অভাৱত গাঁঠিৰ ধন ভাঙি এখন পলিটেকনিকৰ শিক্ষার্থীয়ে আন এখন পলিটেকনিকলৈ যাব লগা হৈছে। কোনোবা পলিটেকনিকত নাই আপডেটেড কম্পিউটাৰ ছফ্টৱেৰ, ক’ৰবাত আকৌ নাই সংশ্লিষ্ট বিষয়ৰ কিতাপ। চৰকাৰৰ উদাসীনতাত এনেদৰে দুৰ্বল আন্তঃগাঁথনিৰ মাজেৰেই ছাত্র- ছাত্রীসকল পলিটেকনিকসমূহত শিক্ষা গ্রহণ কৰি থাকিবলগীয়া হৈছে। আনহাতে পলিটেকনিসমূহত প্রায় হোষ্টেলেই জৰাজীৰ্ণ অৱস্থালৈ পর্যবসিত হৈছে। নতুনকৈ স্থাপন কৰা ১১খন পলিটেকনিকত নাই হোষ্টেলৰ সুবিধা। পৰিণতিত অধিক ধন খৰচ কৰি ছাত্ৰ-ছাত্ৰীয়ে থাকিবলগীয়া হয় ব্যক্তিগত হোষ্টেলত। পলিটেকনিকৰ ছাত্ৰ-ছাত্ৰীয়ে জৰাজীৰ্ণ অৱস্থাৰ মাজতেই শিক্ষা গ্ৰহণ কৰিব লগা হৈছে। পৰিতাপৰ কথা এইটোৱেই যে এতিয়ালৈকে শিক্ষাবিভাগে শিক্ষক নিযুক্তি দিয়া নাই। এনেকুৱা পৰিস্থিতিত চৰকাৰে কোনোধৰণৰ গুৰুত্ব প্ৰদান নকৰা কাৰ্যই চৰকাৰৰ ব্যর্থতাৰ কথা প্ৰকাশ পায় নে চৰকাৰে ইচ্ছাকৃতভাৱে ছাত্র–ছাত্ৰীৰ ভৱিষ্যত অন্ধকাৰলৈ ঠেলি দিছে সেয়া ছাত্ৰ–ছাত্ৰীৰ সমুখত এক মূল্যৱান প্ৰশ্ন।
