সপ্তাহৰ মূৰত পোৱা বন্ধ কেতিয়াও যথেষ্ট নহয়। কংক্ৰিটৰ চহৰৰ পৰা যেতিয়া পলাই ফুৰিবলৈ কাৰোবাৰ ওচৰত মেঘালয়ৰ দৰে অসমৰ গাতে লাগি থকা সুন্দৰ বিকল্প থাকে, অৱসৰ সময় সুন্দৰ হয়।
এইবাৰ আমি মেঘালয়ৰ সদায়েই গৈ থকা খাচী পাহাৰ আৰু শ্বিলঙৰ পৰিৱৰ্তে গাৰো পাহাৰলৈ যাবলৈ মনস্থ কৰিলোঁ।
অসমৰ গোৱালপাৰা জিলাৰ পৰা আমাৰ যাত্ৰা আৰম্ভ কৰিছিলো। গোৱালপাৰাৰ পৰা পূৱ গাৰো পাহাৰৰ মূখ্য চহৰ, উইলিয়াম নগৰলৈ ৭২ কিলোমিটাৰ অতিক্ৰম কৰি উপস্থিত হ’বলৈ আমাক প্ৰায় ২ ঘণ্টা ৪৫ মিনিট সময় লাগিল। অসমৰ বাহিৰৰ পৰা কোনোবা যদি প্ৰথমবাৰৰ বাবে আহিবলৈ ইচ্ছুক তেন্তে প্ৰথমতে গুৱাহাটীস্থিত LGBI এয়াৰপৰ্ট বা গুৱাহাটী ৰেলৱে ষ্টেচনলৈকে আহিব লাগিব।
তাৰ পৰা যিকোনো গাড়ীৰে ১৮৮ কিলোমিটাৰ অতিক্ৰম কৰি উইলিয়াম নগৰত উপস্থিত হ’ব পাৰিব। ৰাস্তাৰ কাষৰ সমতলত সোণোৱালী ধাননি পথাৰ, কহুৱা বন , মনোমোহা সেউজীয়াৰে আবৰা ৰাস্তাৰ কাষৰ বননি আৰু দুৰৰ শাৰী শাৰী পাহাৰে পৰিবেষ্টিত গোৱালপাৰাৰ পৰা উইলিয়াম নগৰৰ যাত্ৰা পথটো সঁচাকৈয়ে বৰ উপভোগ্য । গাড়ীত বাজি থকা মৃদু সংগীতৰ তালে তালে কাষেদি বৈ যোৱা গাৰো পাহাৰৰ শুভ্ৰ নীলা নৈয়ে যাত্ৰা পথত আপোনাৰ মন মুহি নিব।
উইলিয়াম নগৰত থকাৰ সু ব্যৱস্থা আছে। ইয়াৰে জিলা আৱৰ্ত ভৱনৰ ঘৰুৱা পৰিৱেশত থকাৰ সু ব্যৱস্থাৰ উপৰিও পৰম্পৰাগত আহাৰৰ জুতি ল’বও পাৰিব। ইয়াৰ উপৰিও ডেৰিব’কগ্ৰেত বালকাছিন হোমষ্টেৰ পৰা ডুৰামা পাহাৰৰ সৌন্দৰ্য্য উপভোগ কৰাৰ লগতে কমলা বাগিচাৰ মনোমোহা দৃশ্যই আপোনাৰ মন কাঢ়িব।
নেংমনডালগ্ৰে মাছ সংৰক্ষিত জলাঞ্চল-
চিবক নৈৰ মাছ সংৰক্ষিত জলাঞ্চলখন উইলিয়াম নগৰৰ পৰা ৮ কিলোমিটাৰ দূৰৈত অৱস্থিত। স্থানীয় গাঁওবাসীৰ দ্বাৰা সংৰক্ষিত জলাঞ্চলত মাছ ধৰা নিষেধ। কাষৰীয়া লোকসকলৰ দায়বদ্ধতা আৰু ঐক্য বদ্ধতাই কেনেকৈ উন্নয়নত সহায় কৰে এইক্ষেত্ৰত উৎকৃষ্ট প্ৰমাণ এই জলাঞ্চলখন।
মেম’ লেক-
উইলিয়াম নগৰৰ পৰা ১০ কিলোমিটাৰ আঁতৰৰ ব’লকিংগ্ৰে গাঁৱত অৱস্থিত মেম’ হ্ৰদটো পূব গাৰো পাহাৰৰ অন্যতম আকৰ্ষণ। চিমছেং নৈৰ পৰা অপ্ৰাকৃতিক ভাবে গঠন হোৱা হ্ৰদটোত বুটিঙৰ সুবিধাও উপলব্ধ।
বেনছামগ্ৰে মাছ জলাঞ্চল-
উইলিয়াম নগৰৰ পৰা ২৬ কিলোমিটাৰ নিলগত চামণ্ডা ব্লকত অৱস্থিত জলাঞ্চলখন পূব গাৰো পাহাৰৰ অন্যতম আকৰ্ষণীয় স্থান।
ডেৰিব’কগ্ৰে ন’কপাণ্টে-
চামাণ্ডা ব্লকৰ ডুৰামা পাহাৰীয়া অঞ্চলত অৱস্থিত উইলিয়াম নগৰৰ পৰা ৩৮ কিলোমিটাৰ নিলগত থকা এক অতি আকৰ্ষণীয় ঠাই। পৰম্পৰাগত খাদ্য শৈলীৰ সোৱাদ লোৱাৰ লগতে এই ঠাইত থাকি তেওঁলোকৰ জনজাতীয় জীৱন শৈলীৰ আভাস ল’ব পাৰিব।
উইলিয়াম নগৰৰ পৰা ডেৰিব’কগ্ৰে পথটো সৰু সৰু দোকানেৰে ভৰা। থলুৱা লোকসকলে ঘৰুৱা উৎপাদিত সামগ্ৰীসমূহ ইয়াত বিক্ৰী কৰে। এই দোকানসমূহৰ পৰা সতেজ পাচলি ক্ৰয় কৰিবও পাৰিব।
গাৰো পাহাৰৰ সৌন্দৰ্য্য আৰু মেটমৰা স্মৃতি বুকুত বান্ধি এক অনাবিল প্ৰাপ্তিৰ আনন্দ মনেৰে গোৱালপাৰালৈ উভতি আহিলোঁ। এই মনোমোহা যাত্ৰা সদায় মনত ৰ’ব।
