মহিলা ফুটবল বিশ্বকাপত আন এক অঘটন ৷ দুবাৰৰ বিশ্ব চেম্পিয়ন জাৰ্মানীয়ে দক্ষিণ কোৰিয়াৰ হাতত পৰাস্ত হৈ মহিলা বিশ্বকাপৰ গ্ৰুপ পৰ্যায়ৰ পৰা বাহিৰ হ’ল। গ্ৰুপৰ অন্তিমখন খেলত জাৰ্মানীয়ে দক্ষিণ কোৰিয়াৰ সৈতে ১-১ গ’লত সমতা স্থাপন কৰে। ফলত প্ৰথমবাৰৰ বাবে বিশ্বকাপৰ নক আউটত উপনীত হ’ব নোৱাৰিলে। আনহাতে আনখন গ্ৰুপ মেচত মৰক্কোৱে কলম্বিয়াক পৰাস্ত কৰে। গ্ৰুপ এইচৰ পৰা এই দুটা দলে নক আউটৰ বাবে যোগ্যতা অৰ্জন কৰিছে।
বৃহস্পতিবাৰে প্ৰথমখন খেল আছিল কলম্বিয়া বনাম মৰক্কো। এই বিশ্বকাপৰ প্ৰথম দুখন মেচত জয়লাভ কৰি গ্ৰুপ তালিকাৰ শীৰ্ষত আছিল কলম্বিয়া। আনহাতে মৰক্কোৱে ৩ পইণ্ট লাভ কৰে। প্ৰথমাৰ্ধৰ বিৰতিৰ ঠিক আগতেই মৰক্কোৱে পেনাল্টি পায়। অনিছা লামাৰীৰ প্ৰথমটো শ্বট গ’লৰক্ষকে ৰক্ষা কৰে যদিও ৰিবাউণ্ডত গ’ল দিয়ে। ১-০ গ’লত আগবাঢ়ি আছে মৰক্কো। দ্বিতীয়ার্ধত বহু চেষ্টাৰ পাছতো কলম্বিয়াই গ’ল দিব নোৱাৰিলে৷ ফলত দুয়োটা দলে দুখন মেচত জয়লাভ কৰি ৬ পইণ্টেৰে অন্ত পেলায়। গ’লৰ পাৰ্থক্যত কলম্বিয়াই শীৰ্ষস্থান দখল কৰে।
এই পৰিস্থিতিত জাৰ্মানীয়ে দক্ষিণ কোৰিয়াক পৰাস্ত কৰি নক আউটলৈ যাব লগা হৈছিল। কিন্তু খেল আৰম্ভ হোৱাৰ ৬ মিনিটৰ পাছত চ’ ছ’হিউনে জাৰ্মানীক ডাঙৰ আঘাত দিয়ে। লি ইংজুৰৰ পৰা বলটো পাই তেওঁ গ’ল দিয়ে। জাৰ্মানীয়ে লক্ষ্য ঘূৰাই দিবলৈ হাহাকাৰ কৰিছিল। অৱশেষত ৪২ মিনিটৰ অন্তত অধিনায়ক আলেকজেণ্ড্ৰা পপে গ’ল দিয়ে।
দ্বিতীয়াৰ্ধত জাৰ্মানীয়ে আগবাঢ়ি যাবলৈ চেষ্টা কৰে। ৫৮ মিনিটৰ পাছত পপৰ গ’লটো ৰেফাৰীয়ে প্ৰযুক্তি ব্যৱহাৰ কৰি বাতিল কৰে। শেষত কেইবাটাও সুযোগ পোৱাৰ পিছতো জাৰ্মানীয়ে গ’ল দিব নোৱাৰিলে। কেতিয়াবা বলটো বাৰত খুন্দা মাৰে। কেতিয়াবা আকৌ পোষ্টটোৰ বাহিৰলৈ ওলাই যায়। শেষত খেলখন ১-১ গ’লত ড্ৰ’ হয়। ফলত জাৰ্মানীয়ে ৪ পইণ্টেৰে তৃতীয় স্থান দখল কৰে। ১ পইণ্টেৰে গ্ৰুপৰ অন্তিম স্থানত আছে দক্ষিণ কোৰিয়া।
অৱশ্যে বিশ্বকাপৰ গ্ৰুপ এইচৰ প্ৰথমখন খেলত জাৰ্মানীৰ হাতত ৬ গ’লত পৰাস্ত হয় মৰক্কো। তাৰ পৰাই মৰক্কো পৰৱৰ্তী ৰাউণ্ডলৈ যাব বুলি কোনেও ভবা নাছিল। জাৰ্মানীয়ে প্ৰথমে কলম্বিয়াৰ হাতত পৰাস্ত হ’বলগীয়া হৈছিল। পুৰুষৰ বিশ্বকাপ ২০১৮ত পূৰ্বৰ বিশ্বকাপ চেম্পিয়ন জাৰ্মানীয়ে গ্ৰুপৰ অন্তিমখন খেলত দক্ষিণ কোৰিয়াৰ হাতত পৰাস্ত হৈছিল। মহিলা বিশ্বকাপত দক্ষিণ কোৰিয়াৰ হাতত স্বপ্নভংগ হ’ল জার্মানীৰ ৷
